ADSEA: İçməli və suvarma suyuna artan tələbatın ödənilməsi dövlət siyasətinin prioritet istiqamətlərindəndir  

Qlobal iqlim dəyişiklikləri, yağıntıların qeyri-sabit xarakter alması və mövcud su ehtiyatlarına artan tələbat su resurslarının idarə olunmasına yeni yanaşmaların tətbiqini zəruri edir. Bu çağırışları nəzərə alaraq Agentlik tərəfindən regionda su təminatının etibarlılığının yüksəldilməsi, infrastrukturun modernləşdirilməsi və su itkilərinin azaldılması istiqamətində ardıcıl tədbirlər həyata keçirilir. Ölkəmizin sosial-iqtisadi inkişafında içməli və suvarma suyuna artan tələbatın ödənilməsi dövlət siyasətinin prioritet istiqamətlərindən olub. Məhz Prezidentin bilavasitə təşəbbüsləri ilə son 20 ildə bu sahəyə əhəmiyyətli həcmdə dövlət vəsaiti yönəldilib, infrastruktur genişləndirilib və su ehtiyatlarının artırılması istiqamətində mühüm işlər görülüb.

AZƏRTAC xəbər verir ki, bunu Azərbaycan Dövlət Su Ehtiyatları Agentliyinin (ADSEA) sədr müavini İlham Bayramov "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı” çərçivəsində Ağcabədidə keçirilən regional müşavirədə çıxışı zamanı deyib.

İlham Bayramov bildirib ki, hazırda regionun su təminatında mühüm rol oynayan əsas su təsərrüfatı obyektləri sırasında Qarabağ suvarma kanalı, Baş Mil kanalı, Yuxarı Mil kanalı və Tərtərçay suvarma sistemi xüsusi əhəmiyyətə malikdir. Bu mənbələrdən və mövcud suvarma şəbəkələrindən səmərəli istifadə olunması Ağcabədi, Ağdam, Bərdə, Füzuli və Tərtər rayonları da daxil olmaqla, geniş ərazilərdə dayanıqlı su təminatı olan suvarma sahələrinin qorunmasına və kənd təsərrüfatı istehsalının davamlı inkişafına mühüm imkan yaradır. Bu baxımdan suvarma şəbəkələrinin istismar vəziyyətinin yaxşılaşdırılması, kanalların yenidən qurulması və təmiri, su itkilərinin azaldılması və suvarma suyunun əkin sahələrinə vaxtında çatdırılması Qarabağ iqtisadi rayonunun aqrar potensialının daha səmərəli reallaşdırılması baxımından xüsusi əhəmiyyət daşıyır.

Dövlət investisiyaları ilə yanaşı, daxili imkanlar hesabına, 2025-ci ildə su təsərrüfatı obyektlərində aparılmış əsaslı təmir işləri çərçivəsində Ağcabədi, Ağdam, Bərdə, Füzuli və Tərtər rayonlarında 2,7 kilometr kanal beton üzlüyə alınıb, 3,2 kilometr boru xətti və 96 subartezian quyusu təmir edilib. Cari il ərzində də qeyd edilən rayonlar üzrə kanalların beton üzlüyə alınması, boru xətlərinin təmiri və subartezian quyularının bərpası istiqamətində müvafiq işlərin görülməsi nəzərdə tutulur. Həyata keçirilən və planlaşdırılan bu tədbirlər suvarma sistemlərinin dayanıqlığını artırmaqla yanaşı, su itkilərinin azaldılmasına və kənd təsərrüfatının davamlı inkişafına xidmət edir.

“Əsas hədəflərimizdən biri su resurslarından rasional və qənaətli istifadə prinsiplərini formalaşdırmaqdır. Bilirsiniz ki, ənənəvi selləmə suvarma ilə müqayisədə damcı və pivot suvarma sistemlərinin tətbiqi su sərfiyyatını əhəmiyyətli dərəcədə azaltmaqla yanaşı, məhsuldarlığın artırılmasına da imkan yaradır. Dövlət Proqramında nəzərdə tutulan tədbirlərin mühüm hissəsi də məhz müasir və innovativ suvarma texnologiyalarının tətbiqinin genişləndirilməsinə, rəqəmsal monitorinq və idarəetmə sistemlərinin qurulmasına, su uçotunun təkmilləşdirilməsinə, yəni mənbələrdən başlayaraq son istehlakçılar və su istifadəçiləri ilə əməkdaşlıq mexanizmlərinin gücləndirilməsinə yönəlmişdir. Çünki müasir çağırışlara əsasən, aqrar sektorun inkişafı yalnız yeni torpaqların əkin dövriyyəsinə cəlb edilməsi və ekstensiv genişləndirilmə ilə deyil, mövcud su və torpaq ehtiyatlarından daha səmərəli istifadə olunması ilə təmin edilməlidir”, - deyə o qeyd edib.