ABŞ Rusiya ilə START üzrə danışıqların bərpasına hazırdır

Vaşinqton Moskva ilə START müqaviləsi (Strateji Hücum Silahlarının Azaldılması və Məhdudlaşdırılması Tədbirləri haqqında Müqavilə/START-Strategic Arms Reduction Treaty) üzrə danışıqların bərpasında və strateji obyektlərdə yoxlamaların davam etdirilməsində son dərəcə maraqlıdır. 
Bu barədə brifinq zamanı jurnalistlərə məlumat verən ABŞ dövlət katibinin silahlara nəzarət üzrə müavini Bonni Cenkins deyib: "Məqsədimiz Rusiyaya aydın şəkildə anlatmaqdır ki, onlar istədikləri  anda biz görüşməyə hazırıq. Təəssüf ki, onlar bunu Ukraynada baş verənlərlə əlaqələndirirlər".
Moskva isə öz növbəsində dəfələrlə bəyan edib ki,  START üzrə konstruktiv dialoqu bərpa etməyə hazırdır, lakin bunun üçün "heç bir minnət olmamalıdır". Həmçinin qeyd olunub ki, ABŞ-dən danışıqların bərpası ilə bağlı siqnallar var.
Rusiya xarici işlər nazirinin müavini Sergey Ryabkov ABŞ-lə münasibətlərdə ən problemli məqamlar barədə danışıb. Onun dediyinə görə, Rusiya START-dan imtina etmir və müqavilə üzrə bütün öhdəliklərini yerinə yetirir, ABŞ isə öz öhdəliklərinə kifayət qədər sərbəst yanaşır: "Biz əlimizi uzadıb onların arxasınca getmirik, heç bir lütf istəmirik".
Diplomat həmçinin əlavə edib ki, amerikalılar START məsələsi ilə bağlı Rusiyaya qarşı açıq iddialar irəli sürüb və Moskvanın guya müqavilə şərtlərini pozduğunu bildirib. S.Ryabkov ABŞ-nin Moskvadakı yeni səfiri Linn Treysi ilə müqavilə ətrafında vəziyyəti müzakirə edib. O bildirib ki, Rusiya ABŞ-lə Strateji Hücum Silahlarının Azaldılması və Məhdudlaşdırılması Tədbirləri haqqında Müqavilə və təhlükəsizlik məsələlərinə dair işləməyə hazırdır: "Əgər amerikalılar buna hazır olarlarsa, biz dialoqu bərpa etməyə hazırıq, əlbəttə, bacararıq və bunu istəyirik. Hər şey Vaşinqtondan asılıdır".
O, Vaşinqtonun Rusiya Federasiyası ilə təhlükəsizliklə bağlı danışıqlarda gündəmi dəyişmək cəhdlərini strateji səhv adlandırıb. Nazir müavini əlavə edib ki, Rusiya ilə ABŞ arasında təmaslar kəsilmir və davam edir. Eyni zamanda o bildirib ki, Moskva birtərəfli güzəştlərə getməyəcək: "Ötən illər ərzində biz daim vurğulamışıq ki, Rusiya tərəfdən heç bir birtərəfli güzəşt olmayacaq".
Xatırladaq ki, 2021-ci ilin yanvarında Rusiya və ABŞ prezidentləri Vladimir Putin və Co Bayden START müqaviləsini əlavə şərtlər olmadan daha beş il, 2026-cı il fevralın 5-nə qədər uzatmaq barədə razılığa gəliblər. Lakin Ukraynada başlayan müharibə müqavilənin icrasında problemlər yaradıb.
Bu günlərdə Rusiya  Prezidenti Vladimir Putinin mətbuat katibi Dmitri Peskov vurğulayıb ki, Rusiya START-ın qüvvədə qalmasının davam etdirilməsini çox vacib hesab edir. Eyni zamanda o qeyd edib ki, ABŞ faktiki olaraq silahlara nəzarət və təhlükəsizlik sahəsində qanunvericilik bazasını dağıdıb, Rusiya Federasiyası ilə  düşmənçilik şəraiti yaradıb.

Rizvan CƏFƏROV,
"Azərbaycan"