Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Təhsilə yüksək diqqət və qayğı müsbət nəticələrini verir

08 Mart 2018
 

Bəşər tarixi çox aydın şəkildə sübuta yetirir ki, mütərəqqi və çevik inkişafın kökündə dayanan başlıca faktor elmi-intellektual potensialdır. Bu potensial inkişaf göstəricilərinin, bütün sahələr üzrə tərəqqi tempinin müəyyən olunmasının dinamik hərəkətverici qüvvəsi, əldə edilən uğurların əsas açarıdır. Digər tərəfdən müasir qloballaşma dövründə dövlətin beynəxlaq müstəvidə yeri və rolunun müəyyən olunmasında elmi-intellektual nailiyyətlər, bu nailiyyətləri formalaşdıran təhsilə diqqət və qayğı səviyyəsi başlıca kateqoriyadır.

Yeni müstəqillik tarixində artıq inkişafın özünəməxsus cəhətləri ilə seçilən modelini yaradan müasir Azərbaycanda möhkəm özüllər üzərində qurulan tərəqqinin başlıca meyarlarından birini məhz elmə, təhsilə verilən yüksək qiymət müəyyənləşdirir. Azərbaycanın inkişaf konsepsiyasının mühüm tərkib hissəsini məhz təhsil sektoru təşkil edir. Ulu öndər Heydər Əliyevin “cəmiyyət təhsilsiz inkişaf edə bilməz” kimi yanaşması fonunda bu mühüm sahə dövlət siyasətinin prioritet prinsipləri sırasına daxil edilib. Xatırlatmaq yerinə düşər ki, ümummilli lider hər zaman təhsilə xüsusi qayğı ilə yanaşaraq, bu səpkidə qabaqcıl dünya təcrübəsinə cavab verən islahatların əsasını qoymuş çoxsaylı sərəncamlar, fərmanlar imzalayıb, müvafiq proqrmaları təsdiq edib.
Ulu öndərin bu sahə üzrə genişmiqyaslı işlərini layiqincə davam etdirən Prezident İlham Əliyev dövrün çağırışlarına uyğun olaraq təhsil sisteminin yeni, daha yüksək səviyyəyə çatdırılması, onun keyfiyyət göstəricilərinin artırılması istiqamətində uğurlu fəaliyyətin müəllifinə çevrilib. Nəticə etibarilə yeni yüzilliyin əvvəllərindən etibarən təhsil sistemi modernləşdirmə mərhələsinə qədəm qoyaraq Azərbaycanın inkişaf göstəricilərinə müvafiq olaraq insan kapitalının formalaşması prosesinə mühüm töhfələr verib.
Təsadüfi deyil ki, dövlət başçısı seçildikdən sonra Prezident İlham Əliyevin verdiyi ilk sərəncamlardan biri “Azərbaycan Respublikasında təhsilin inkişafı üzrə Dövlət Strategiyası”nın təsdiqlənməsi olub. Bu, təhsilin keyfiyyət göstəricilərinin qabaqcıl dünya standartlarına uyğunlaşdırılması baxımından kifayət qədər vacib bir sənəd qismində çıxış edərək, təhsil sahəsinin yüksəlişində belə demək olarsa, təməl daşına çevrildi. Sözügedən sənədin ümdə əhəmiyyəti təhsilin ayrı-ayrı sahələr üzrə yox, kompleks şəkildə inkişafını təmin etməsi oldu.
24 oktyabr 2013-cü il tarixdə isə Azərbaycan Prezidenti növbəti vacib sənəd olan “Azərbaycan Respublikasında təhsilin inkişafı üzrə Dövlət Strategiyası”nı təsdiq edib. Qeyd olunan sənəd təhsil sferasında fəaliyyət perspektivlərinin müəyyənləşdirilməsi sahəsində əsas mayak rolunu oynadı.
Sonrakı dövr ərzində görülən işlər nəticəsində müasir təhsil sisteminin yaradılması fonunda davamlı, rəqabətqabiliyyətli tərəqqini ehtiva edən, insan kapitalının inkişafını ön plana çəkən elmi potensialın formalaşması istiqamətində mühüm nailiyyətlər əldə edildi. Bununla bağlı qəbul edilən yeni proqramlar, dövlət başçısının verdiyi fərman və sərəncamlar təhsilin inkişafını və beləliklə, Azərbaycanın tərəqqi göstəricilərini daha çevik hala gətirdi.
Ötən dövr ərzində Azərbaycanın iqtisadi cəhətdən daha qüdrətli dövlətə çevrilməsinə paralel olaraq təhsilə dövlət tərəfindən ayrılan xərclərin də miqdarının davamlı şəkildə, özü də dəfələrlə artırılması bu sahədə zəruri infrastukturun yaradılması ilə yanaşı, təhsilin keyfiyyətinin artmasına, qeyd olunan sahədə çalışanların maddi rifah halının yüksəlməsinə əhəmiyyətli dərəcədə təsir göstərib.
Diaqnostik qiymətləndirmə metodunun tətbiqi kontekstində isə on minlərlə təhsil işçisinin, eləcə də bu günlərdə Azərbaycan Prezidentinin müəllimlərin əməkhaqlarının artırılması ilə bağlı verdiyi sərəncamı onların sosial rifah halının yüksəlməsinə növbəti təkan verib.
Ölkəmizdə elm və təhsilin inkişaf strategiyasının uğurla reallaşmasında Heydər Əliyev Fondunun, onun rəhbəri, ölkənin Birinci vitse-prezidenti Mehriban xanım Əliyevanın kifayət qədər böyük əməyi var. Ümumiyyətlə, Heydər Əliyev Fondunun milli maarifçilik sahəsində atdığı addımlar sözün əsl mənasında, titanik xarakter daşıyaraq, bir çox sahələri, o cümlədən müasir təhsil komplekslərinin ərsəyə gəlməsindən tutmuş konkret təhsil proqramlarının həyata keçirilməsinədək çox geniş diapazonu əhatə edir.
Qabaqcıl texnologiyalara əsaslanan infrastruktura malik təhsil sisteminin yaradılması, milli təhsil modelinin qurulması, təlim-tədris prosesinə lazımi şərait yaradılması, dünya ölkələrinin mütərəqqi təhsil ənənələrinin Azərbaycana gətrilməsi Heydər Əliyev Fondunun imza atdığı nailiyyətlərin yalnız bir qismini əhatə edir.
Mehriban xanım Əliyevanın birbaşa təşəbbüsü ilə 2005-ci ildən həyata keçirilməsinə start verilən “Yeniləşən Azərbaycana yeni məktəb” layihəsi çərçivəsində isə Azərbaycanın ən müxtəlif regionlarını əhatə etməklə yüzlərlə yeni məktəb binası tikilərək istifadəyə verilib, yenə yüzlərlə məktəb binası müasir tələblər çərçivəsində əsaslı təmiri edilib, yenidən qurulub. Bura onlarca uşaq bağçası və ixtisaslaşdırılmış uşaq məktəbləri də aid edilsə, fondun təhsil sahəsində gördüyü işlərin miqyasının nə dərəcədə geniş olmasını daha aydın təsəvvür etmək olar.
Heydər Əliyev Fondunun həyata keçirdiyi layihələr həm də vacib sosial əhəmiyyət kəsb edir və bunun real təsdiqi kimi uşaq evləri və internat məktəblərinin inkişafı ilə bağlı layihəni göstərmək olar. “Təhsilə dəstək” layihəsinə uyğun olaraq daimi yaşayış yerlərini Ermənistanın işğalı nəticəsində tərk etmək zorunda qalmış qaçqın və məcburi köçkün ailələrindən olan birinci sinif şagirdlərinə hər il çanta və məktəb ləvazimatları hədiyyə olunması da sosial əhəmiyyətə malik daha bir önəmli addımdır. Bununla yanaşı, Gürcüstanın azərbaycanlılar yaşayan bölgələrindəki təhsil ocaqlarına, həmçinin Qax, Zaqatala və Balakən rayonlarında tədrisin gürcü dilində aparıldığı məktəblərə də mütəmadi olaraq yeni dərslik və tədris ləvazimatları göndərilir.
Bütün bunlar təhsil sisteminin yeniləşməsinə əvəzsiz töhfələr verməklə yanaşı, elmi-intellektual potensialın yüksəlməsinə, cəmiyyətdə kreativ təhsil düşüncəsinin formalaşmasına müsbət mənada ciddi təsirlərini göstərir. Bu da öz növbəsində ölkəmizdə insan kapitalının inkişafına təkan verərək, Azərbaycanın inkişafının daha sürətli, davamlı və dayanıqlı olmasını şərtləndirən başlıca faktorlar sırasında yer alır.

İradə MUSTAFAYEVA,
Binəqədi rayonu 135 saylı orta məktəbin müəllimi