Ümumdünya Meteorologiya Təşkilatının (ÜMT) İqlim xidmətləri sektorunun direktoru Kristofer Hyuit bütün dünyada bərpaolunan enerji mənbələrindən istifadəni artırmaq səylərini “həvəsləndirici” adlandırıb.
AZƏRTAC xəbər verir ki, ÜMT nümayəndəsi BMT-nin İqlim Dəyişikliyi üzrə Çərçivə Konvensiyasının Tərəflər Konfransının Azərbaycanda keçirilən 29-cu sessiyasından (COP29) gözləntilərini jurnalistlərlə bölüşüb.
Onun sözlərinə görə, iqlim dəyişikliyi ilə uğurla mübarizə aparan əsas maneə istixana qazları emissiyaları olaraq qalır. “Bərpaolunan enerji mənbələrindən istifadə böhranla mübarizəyə töhfə verir. Bu gün biz bərpaolunan enerji mənbələrindən enerji istehsalının payında aktiv artımı qeyd edə bilərik. Bununla belə, bəşəriyyətin hələ bu istiqamətdə qət etməli olduğu çox uzun yol var”, - deyə Hyuit bildirib.
O, COP29 iştirakçılarının iqlim maliyyəsi üzrə razılığa gələ biləcəklərinə ümid etdiyini bildirib.
Hyuit ÜMT-nin planetin ekologiyasının vəziyyətini əks etdirən hesabatların hazırlanmasını xatırladıb. “Bu sənədlər siyasətçilərin də diqqətinə çatdırılır. Ümid edirik ki, səylərimiz ekoloji böhranla mübarizənin irəliləməsinə töhfə verəcək”, -deyə Ümumdünya Meteorologiya Təşkilatının nümayəndəsi bildirib.
O, həmçinin Yer kürəsində iqlim dəyişikliyinin modelləşdirilməsinin vacibliyinə diqqət çəkərək, tezliklə bu məqsədlər üçün təkcə superkompüterlərdən deyil, həm də süni intellekt texnologiyalarından istifadə ediləcəyini bildirib.
Hyuit qeyd edib ki, artıq Bakıda keçirilən iqlim sammitinin ilk günündə təmsil etdiyi qurum bu ilin yanvar-sentyabr ayları üzrə təşkilatın ölçmə məlumatlarını əks etdirən ətraf mühitə dair yeni hesabatı təqdim edib.
"Toplanan məlumatlara görə, 2024-cü il ölçmələr tarixində ən isti il olacaq" deyən Hyuit əlavə edib ki, ÜMT-nin məlumatlarının təbii fəlakətlərlə bağlı erkən xəbərdarlıq edilməsində, eləcə də təbii sərvətlərin və əmlakın mühafizəsinin təmin olunmasında kömək etməyə davam edəcəyinə ümid edir.
