İllərdən, əsrlərdən bəri yaşanmış və qazanılmış tarixi təcrübə
göstərir ki, xalqın milli-mənəvi irsini,
qan yaddaşını, kimliyini, özünəməxsusluğunu gələcək nəsillərə ötürmək,
suverenliyinə, ərazi bütövlüyünə qovuşdurmaq, ən ümdəsi isə müstəqilliyini
qoruyub saxlamaq kimi çox çətin missiyalar fenomenal şəxsiyyətlərin fəaliyyəti
ilə bağlıdır.
Azərbaycan xalqının, Azərbaycan dövlətinin qurtuluşu, tərəqqisi
də xalqımızın Ümummilli Lideri Heydər Əliyevin adı ilə sıx bağlıdır. Ulu Öndər
ölkəmizə rəhbərlik etdiyi bütün dövrlərdə Azərbaycanın hərtərəfli inkişafına
böyük töhfələr verərək onun gələcək strategiyasını müəyyənləşdirmişdir.
1991-ci ilin sonlarında müstəqilliyini bərpa edən Azərbaycan
mürəkkəb ictimai-siyasi vəziyyətlə üz-üzə qalmışdı. Ali Sovet Azərbaycan
Respublikasının Silahlı Qüvvələrinin yaradılması barədə müvafiq qərar qəbul etsə
də, müstəqilliyin ilk illərində başqa sahələrlə yanaşı, ordu quruculuğu istiqamətində
də inamlı addımlar atılmırdı. Ciddi qüsurlara yol verilir, ordunun yaranması
haqqında qəbul edilmiş qərarlar kağız üzərində qalırdı. Həmin dövrdə hakimiyyətdə
olanların yaratdığı mürəkkəb vəziyyət, cəmiyyətdə hökm sürən xaos, özbaşınalıq,
hərc-mərclik müstəqilliyimizi təhlükə altında qoyurdu. Ölkədə yaranmış vəziyyətdən
istifadə edən erməni separatçıları təkcə Qarabağa deyil, Ermənistanla həmsərhəd
olan bölgələrə də hücum çəkərək torpaqlarımızı işğal edirdilər. Evləri
yandırır, kəndləri ələ keçirir, azərbaycanlıları doğma ocaqlarından didərgin
salırdılar. Həmin dövrdə yaradılmış ayrı-ayrı silahlı birləşmələr isə
separatçılarla döyüşmək əvəzinə müxtəlif qrupların maraqlarına xidmət edirdilər.
Qarşısı alınmadığına görə hadisələr getdikcə gərgin xarakter
alırdı. 1993-cü ilin yayında Ümummilli Lider Heydər Əliyevin xalqın təkidli tələbi
ilə hakimiyyətə qayıdışından sonra başqa sahələrlə yanaşı, ordu quruculuğu
istiqamətində də mühüm addımlar atıldı. Ayrı-ayrı silahlı birləşmələr ləğv
edildi, vahid komandanlığa tabe olan hərbi hissələr yaradıldı. Bundan sonra
ordu quruculuğu daha da sürətləndi. Ulu Öndərin uğurla həyata keçirdiyi siyasət
nəticəsində Silahlı Qüvvələrin maddi-texniki təminatının yaxşılaşdırılmasına, şəxsi
heyətin mənəvi-psixoloji hazırlığının yüksəlməsinə, döyüş ruhunun yüksəldilməsinə
diqqət artırıldı.
Ümummilli Lider yalnız müstəqillik illərində deyil, keçmiş
ittifaqın qadağalarının hökm sürdüyü 1969-cu ildə hakimiyyətə gələndə də Azərbaycanda
hərbi kadrların hazırlanması prosesinə böyük önəm vermişdir. Ulu Öndərin təşəbbüsü
ilə Bakıda Cəmşid Naxçıvanski adına Hərbi Məktəb yaradılmışdır. O zaman bu qərarı
vermək böyük cəsarət tələb edirdi. Sonralar həmin illəri xatırlayan Ulu Öndər
deyirdi: "Biz Cəmşid Naxçıvanski adına Hərbi Liseyin ilk bünövrə daşlarını
qoyanda o bizim üçün nəzəriyyə deyildi, böyük gələcəyə, Azərbaycanın gələcəyinə
baxış idi. Azərbaycanın milli zabit kadrlarının hazırlanması üçün ilk uğurlu
addımlar idi. Biz bu addımları atarkən düşünürdük ki, zaman gələcək, Azərbaycan
xalqı öz milli azadlığına qovuşacaq, öz dövlət müstəqilliyini əldə edəcək, müstəqil
Azərbaycan dövləti yaranacaq. Yarandı da. Məhz bugünkü müstəqilliyimizə görə mən
bu məktəbi yaratdım, yaşatdım, böyütdüm. Bilirsiniz, sizə səmimi deyirəm,
C.Naxçıvanski adına lisey mənim üçün bir övladdır. Ona öz övladım kimi baxıram
və nə qədər yaşayıramsa, ona bax, bu cür baxacağam".
Heydər Əliyevin uğurla həyata keçirdiyi siyasət nəticəsində
Azərbaycan Xalq Cümhuriyyətinin əsasını qoyduğu milli dövlətçilik düşüncəsi
müstəqil Azərbaycan dövlətinin yaradılması ilə reallığa çevrildi. Ümummilli
Liderin böyük fədakarlıqları hesabına ata-babalarımızın qurub-yaratdığı dövlətin
sarsılmazlığı, demokratik yüksəlişi, müstəqilliyinin əbədiliyi təmin olundu.
Ulu Öndərin Azərbaycanın sosial-iqtisadi, siyasi, hərbi və mədəni yüksəlişi
üçün həyata keçirdiyi tədbirlər milli şüurun oyanışına təkan verdi.
Azərbaycanın qarşılaşa biləcəyi çətinlikləri böyük uzaqgörənliklə
əvvəlcədən hiss edib proqnozlaşdıran Ümummilli Lider Heydər Əliyev zamanı
qabaqlayaraq ölkəmizin sürətli və davamlı inkişafı, strateji maraqlarının təmin
olunması üçün zəruri və qəti addımlar atdı. Ulu Öndər dövlətin suverenliyinin və
ərazi bütövlüyünün təminatçısı olan ordu quruculuğuna böyük önəm verdi. Vahid
komandanlıq sisteminə əsaslanan nizami və mütəşəkkil, müstəqilliyimizə və dövlətçiliyimizə
qarşı yarana biləcək hər hansı bir təhlükənin qarşısını almağa qadir və hazır
olan ordu yaratmağa başladı.
Ümummilli Lider Azərbaycan Ordusunu və onun formalaşması
prosesini daim diqqət mərkəzində saxlayırdı. Apardığı məqsədyönlü, qətiyyətli
siyasət, eləcə də göstərdiyi diqqət və qayğı nəticəsində qısa müddətdə nizami
Silahlı Qüvvələrin yaradılması ilə bağlı təxirəsalınmaz tədbirlər görüldü, hərbi
hissə və birləşmələrdə intizam möhkəmləndirildi. Eyni zamanda dövlətin və cəmiyyətin
orduya münasibəti kökündən dəyişdi, gənclər böyük həvəslə ali hərbi məktəblərə
və orduya axışdı.
Azərbaycanda ali hərbi məktəblər sisteminin təkmilləşdirilməsi,
onun tədris prosesinin NATO-ya üzv olan ölkələrin hərbi təhsil sisteminə uyğun
olaraq qurulması müsbət nəticələr verdi.
Aparılan islahatlar nəticəsində Azərbaycan Ordusu ciddi, hazırlıqlı, vətənpərvər
zabit kadrları ilə təchiz edildi, maddi-texniki bazası daha da möhkəmləndirildi.
Dövlətçiliyi və hərbi andı uca tutan, həyat amalı hesab edən, hərbçi olmağı
özünə şərəf bilən zabitlər hərbi hissələrin rəhbərliyinə cəlb olundular. Şəxsi
heyətin mənəvi-psixoloji hazırlığının yüksəldilməsi istiqamətində də səmərəli
addımlar atıldı. Silahlı Qüvvələrin mükəmməl qanunvericilik bazası yaradıldı.
Ulu Öndər Heydər Əliyev Azərbaycan Ordusunun təşkilatlanmasını,
qurulmasının böyük qüvvəyə çevrilməsini məmnunluqla qeyd edərək demişdir:
"1993-cü ilin sonlarından başlayaraq həyata keçirilmiş xüsusi tədbirlər nəticəsində
Milli Ordu quruculuğu keyfiyyətcə yeni mərhələyə qədəm qoydu, qısa müddətdə
vahid komandanlığa tabe olan nizami ordu formalaşdırıldı. Hazırda Azərbaycanın
Silahlı Qüvvələri müasir hərbi texnika ilə təchiz edilmiş, möhkəm
nizam-intizam, yüksək döyüş ruhu ilə seçilən, düşmənə sarsıdıcı zərbə vurmağa
qadir olan bir ordudur. Milli Ordumuz müstəqil dövlətimizin ən böyük dayağı,
xalqımızın təhlükəsizliyinin və ölkəmizin ərazi bütövlüyünün təminatçısıdır".
Qısa zamanda Azərbaycan Ordusunun bölgənin ən güclü silahlı
qüvvəsinə çevrilməsinin başlıca səbəbi Heydər Əliyevin onu daim diqqət mərkəzində
saxlaması, ordu quruculuğuna rəhbərlik etməsi idi. Azərbaycanın müstəqilliyinə,
xalqının milli maraqlarına ürəkdən bağlı olan Ulu Öndər ordu quruculuğu prosesinin
gedişini böyük incəlik və dəqiqliklə müəyyənləşdirmiş və sonda müqəddəs məqsədinə
nail olmuş, güclü və qüdrətli, düşmən üzərində Zəfər qazanmağa qadir olan
ordunun təməlini qoymuşdur.
Ulu Öndər Heydər Əliyev tərəfindən 1993-cü ildə başladılan
ordu quruculuğu istiqamətində aparılan islahatlar sonrakı illər Prezident İlham
Əliyev tərəfindən uğurla davam etdirildi. Dünyanın ən güclü orduları sırasında
layiqli yer tutan ordumuz özünü beynəlxalq aləmə qalib ölkənin qalib ordusu
kimi tanıtdı. Əsasını Ümummilli Lider Heydər Əliyevin qoyduğu ordumuz 30 il həsrətini
çəkdiyimiz Qarabağı, eləcə də işğal
olunmuş başqa bölgələrimizi 44 gün davam edən İkinci Qarabağ müharibəsində
Silahlı Qüvvələrin Müzəffər Ali Baş Komandanı İlham Əliyevin sərkərdəliyi
altında erməni işğalçılarından azad etdi. Ermənistan silahlı qüvvələri
darmadağın olundu.
2020-ci il dekabrın
10-da keçirilən Azərbaycan Ordusunun Zəfər paradında Prezident, Müzəffər Ali
Baş Komandan bununla bağlı demişdir: "Bu zəfər tarixi zəfərdir. Azərbaycan
xalqı bu günü 30 ilə yaxın müddət ərzində gözləyirdi, 30 ilə yaxın müddət ərzində
Ali Baş Komandanın əmrini gözləyirdi. Mən dəfələrlə Azərbaycan xalqına müraciət
edərkən deyirdim ki, biz daha güclü olmalıyıq və nəyi nə vaxt, necə etmək
lazımdır, biz bilirik. Həyat göstərdi ki, vaxtında addımlar atdıq, bütün
gücümüzü səfərbər edərək bir "dəmir yumruq" yaradıb düşmənin başını əzdik.
Müharibə dövründə mən deyirdim ki, bizim "dəmir yumruğ"umuz həm
birliyimizi, həm də gücümüzü təcəssüm etdirir. Bu "dəmir yumruq" düşmənin
belini qırdı, düşmənin başını əzdi. Bu gün biz qəhrəman xalq kimi bu bayramı
qeyd edirik. Azərbaycanın müzəffər ordusu öz tarixi missiyasını yerinə yetirdi,
Ermənistanı məğlub etdi".
Vahid MƏHƏRRƏMOV,
"Azərbaycan"
