Türkiyənin Azərbaycandakı səfirliyinin təhsil müşaviri Ali Rza Altunel Gəncə Dövlət Universitetinin (GDU) rektoru, professor Yusif Yusibov ilə görüşüb.

AZƏRTAC-ın bölgə müxbiri xəbər verir ki, görüşdə Türkiyə Respublikasının Gəncədəki Baş konsulu Zeki Öztürk, Bakı Anadolu Liseyinin müdür yardımçısı Sadiq Qafarov, Gəncə Dövlət Universitetinin tədris işləri üzrə prorektoru Şahin Xurşudov və universitetin İnnovasiyalar Departamentinin direktoru Vasif Həsənov iştirak edib.

Yusif Yusibov qonaqları salamlayaraq yüksək səviyyədə inkişaf edən Türkiyə-Azərbaycan münasibətlərinin bütün türk dünyası üçün nümunə olduğunu qeyd edib. Rektor universitetdə həyata keçirilən islahatlar, tələbələrin təhsil almaları üçün yaradılan şərait, universitetin maddi-texniki bazası, yataqxana kompleksi eləcə də beynəlxalq əlaqələrin genişləndirilməsi çərçivəsində həyata keçirilən tədbirlər haqqında ətraflı məlumat verib. Bildirilib ki, Gəncə Dövlət Universitetinin Türkiyə universitetləri ilə yüksək əməkdaşlıq müqavilələri mövcuddur. Gələcəkdə bu əməkdaşlıq daha da genişləndiriləcək, Türkiyə univesitetləri ilə ikili diplom layihəsi reallaşdırılacaq.

Türkiyənin Azərbaycandakı səfirliyinin təhsil müşaviri Ali Rza Altunel görüşdən məmnunluğunu ifadə edib, iki ölkə arasında qardaşlıq əlaqələrinin əhəmiyyətindən danışıb. Qeyd edib ki, Azərbaycan və Türkiyə arasında bütün sahələrdə olduğu kimi təhsil sahəsində də əməkdaşlıq nümayiş etdirilir.

Fikir mübadiləsi zamanı Gəncə Dövlət Universiteti ilə reallaşması gözlənilən ikili diplom layihəsinin tezliklə həyata keçiriləcəyinə əminlik ifadə olunub.

Türkiyənin Azərbaycandakı səfirliyinin təhsil müşaviri Ali Rza Altunel universitetdə təhsil alan Türkiyədən olan tələbələr haqqında maraqlanıb.

Görüşün sonunda qonaqlara hədiyyələr təqdim edilib.