Ölkəmizdə idmanın inkişafına və kütləviləşməsinə dövlət səviyyəsində böyük dəstək verilir və xüsusi diqqət göstərilir. Sahənin maddi-texniki bazası ildən-ilə gücləndirilir, paytaxtda və bölgələrdə müasir tələblərə cavab verən olimpiya idman kompleksləri, stadionlar inşa edilir. Məqsəd gənc və yeniyetmələrin sağlam və gümrah böyüməsini, öz asudə vaxtlarını səmərəli keçirmələrini təmin etməkdir.
Bərdə rayonunda da gənc idmançılar üçün şərait diqqətəlayiqdir. Bundan güc alan bərdəli idmançılar böyük uğurlara imza atırlar. 
Rayonun Samux kəndində dünyaya göz açan Nihad Ağakişizadə taleyini idmana bağlayıb. Hələ uşaq yaşlarından tez-tez tay-tuşları ilə güləşər, dostlarının kürəyini asanlıqla yerə qoyardı. Hələ kənd tam orta məktəbində oxuduğu illərdə sərbəst güləş üzrə müxtəlif yarışlarda iştirak edib, yüksək yerləri tutub, çoxsaylı meydanlar, diplomlar, fəxri fərmanlar alıb. 
İndi Nihat Azərbaycan Dövlət Bədən Tərbiyəsi və İdman Akademiyasının tələbəsidir. Akademiyada da bacarığı, səmimiyyəti ilə seçilir. Hazırda Bolqarıstanda keçirilən beynəlxalq güləş yarışında iştirak edir. Qalib olmaq üçün ciddi hazırlıq mərhələsi keçib. Arzusu ona zəhmət çəkən müəllim və məşqçilərin etimadını doğrultmaq, dövlət bayrağımızın qaldırılmasına, himnimizin səsləndirilməsinə nail olmaqdır.
Nihad qatıldığı hər yarışa, getdiyi hər ölkəyə canından artıq sevdiyi üçrəngli, ay-ulduzlu bayrağımızı özü ilə götürür, ondan güc-qüvvət alır, onunla qürur duyur. Deyir ki, bayrağımızın aşiqidir. Çünki o həm də bizim Zəfər rəmzimizdir.

 Lazım QULİYEV,
"Azərbaycan"