Azərbaycanın Birinci vitse-prezident Mehriban Əliyeva tibb işçilərinin maddi rifahının yaxşılaşdırılması, onların əməyinin daha yüksək qiymətləndirilməsi və səhiyyə sistemində insan kapitalının gücləndirilməsi məqsədilə Tibbi Ərazi Bölmələrini İdarəetmə Birliyinin (TƏBİB) tabeliyində çalışan tibb işçilərinin əməkhaqlarının artırılması təşəbbüsü ilə çıxış edib. Bu təşəbbüs TƏBİB-in tabeliyindəki tibb müəssisələrində çalışan 72 min 212 tibb işçisini əhatə edəcək. İslahat nəticəsində TƏBİB sistemi üzrə illik əməkhaqqı fondu 189 milyon manat artırılıb. Birinci vitse-prezident Mehriban Əliyeva tərəfindən irəli sürülən bu təşəbbüs bütün istiqamətlərdə yüksək qiymətləndirilməlidir.
Bu fikirləri AZƏRTAC-a açıqlmasında “İnformasiya və Sosial Təşəbbüslərə Dəstək” İctimai Birliyinin sədri Cəsarət Hüseynzadə deyib.
O qeyd edib ki, əsas məqam tibb işçilərinin sosial müdafiəsinin gücləndirilməsi və onların həyat şəraitinin yaxşılaşdırılması ilə bağlıdır:”Xüsusilə pandemiya və Vətən müharibəsi kimi son dərəcə həssas və məsuliyyətli dövrlərdə tibb işçilərimiz üzərlərinə düşən mühüm missiyanı böyük fədakarlıqla yerinə yetiriblər. Bu baxımdan onların əməyinin maddi baxımdan daha yüksək qiymətləndirilməsi həm sosial ədalət, həm də dövlətin tibb işçilərinə göstərdiyi diqqətin mühüm ifadəsidir. Belə ki, tibb işçilərinin əməkhaqları 700–1550 manat aralığında artırılıb, ayrı-ayrı vəzifələr üzrə isə əməkhaqqı 3000 manata qədər yüksəlib. Bu rəqəmlər aparılan islahatın miqyasını və tibb işçilərinin əməyinin daha yüksək səviyyədə qiymətləndirilməsinə verilən önəmi aydın şəkildə göstərir. Yəni artım yalnız statistik göstəricilərdə deyil, tibb işçilərinin ailə büdcəsində və gündəlik həyatlarında real şəkildə hiss ediləcək səviyyədədir”.
Cəsarət Hüseynzadə vurğulayıb ki, tibb işçilərinin əməyinin layiqincə qiymətləndirilməsi yalnız onların sosial vəziyyətinin yaxşılaşdırılması demək deyil. Bu, eyni zamanda, peşəyə marağın artmasına, ixtisaslı kadrların səhiyyə sistemində saxlanılmasına, onların motivasiyasının yüksəlməsinə və nəticə etibarilə vətəndaşlara göstərilən tibbi xidmətin keyfiyyətinin daha da yaxşılaşmasına xidmət edir. “Bu baxımdan təşəbbüsü yalnız əməkhaqqı artımı kimi deyil, bütövlükdə Azərbaycan səhiyyəsinə, tibb işçilərinə və səhiyyə sisteminin gələcəyinə qoyulan mühüm sosial və institusional investisiya kimi qiymətləndirmək olar. Eyni zamanda, bu addım dövlət və özəl tibb müəssisələri arasında həm xidmət, həm də keyfiyyət baxımından mövcud fərqin azalmasına da müsbət təsir göstərə bilər. Çünki dövlət tibb müəssisələrində çalışan peşəkar kadrların maddi təminatının yaxşılaşdırılması bu sektorda sabitliyi və rəqabət qabiliyyətini artırır”,- deyə o bildirib.
İctimai Birliyin sədri əməkhaqqı artımının mühüm istiqamətlərindən birinin də regionlarla bağlı olduğuna diqqət çəkib: “Son illər regionlarda yeni tibb müəssisələrinin açılması, mövcud xəstəxanaların yenilənməsi və onların müasir avadanlıqlarla təchiz edilməsi istiqamətində mühüm işlər görülüb. İndi isə həyata keçirilən yeni islahat bu prosesin daha vacib mərhələsinə — kadr potensialının gücləndirilməsinə xidmət edir. Belə ki, regionlarda çalışan hədəf ixtisaslı həkimlər üçün əlavə stimullaşdırıcı artımlar tətbiq olunur. Bu mexanizm, xüsusilə regionlarda həkim təminatını gücləndirmək, ixtisaslı kadrları bölgələrə cəlb etmək və onların həmin ərazilərdə fəaliyyətini təşviq etmək məqsədi daşıyır. Başqa sözlə, regionlarda həm müasir tibbi infrastruktur, həm də peşəkar kadr təminatı formalaşdıqca, vətəndaşlar tibbi xidmətləri almaq üçün paytaxta üz tutmaq məcburiyyətində qalmayacaqlar. Beləliklə, bu islahatların əsas məqsədi yalnız tibb işçilərinin əməkhaqqını artırmaq deyil, həm də Azərbaycan vətəndaşının sağlamlığının qorunmasını, sosial rifahının yaxşılaşdırılmasını və yaşadığı bölgədən asılı olmayaraq keyfiyyətli tibbi xidmətlə təmin olunmasını gücləndirməkdir”.
jpg_1792100672.jpg)
