Metan qısaömürlü, lakin çox güclü iqlim çirkləndiricisidir, onun emissiyalarının azaldılması isə qlobal istiləşməni yavaşlatmaq üçün ən sürətli və iqtisadi cəhətdən ən səmərəli imkanlardan biridir.
AZƏRTAC xəbər verir ki, bunu Serbiyanın ətraf mühitin mühafizəsi naziri Sara Pavkov Ümumdünya Ətraf Mühit Gününə həsr olunmuş beynəlxalq tədbir çərçivəsində keçirilən “Metan Emissiyalarının Azaldılması üçün Birgə Fəaliyyət: Kənd Təsərrüfatı, Enerji və Tullantılar üzrə Həll Yolları” adlı panel tədbirdə çıxış edərkən deyib.
Onun sözlərinə görə, bu sahədə fəaliyyət yalnız ekoloji zərurət deyil, eyni zamanda, ictimai sağlamlıq, enerji səmərəliliyi və resursların idarə olunması baxımından real faydalar gətirən inkişaf prioritetidir.
“Serbiyanın Ətraf Mühitin Mühafizəsi Nazirliyində metan emissiyalarının azaldılması onun yüksək iqlim təsiri və iqtisadi baxımdan əlçatan azaltma həllərinin mövcudluğu səbəbindən strateji prioritet hesab olunur. Bizim siyasət yanaşmamız müxtəlif sektorlarda konkret emissiya mənbələrinin müəyyənləşdirilməsinə, qısa və orta müddətdə ölçüləbilən nəticələr verən real, tətbiq edilə bilən tədbirlərin həyata keçirilməsinə əsaslanır. Serbiya 2021-ci ildə COP26 çərçivəsində Avropa İttifaqı tərəfindən irəli sürülmüş Qlobal Metan Öhdəliyinə verdiyi dəstəyə uyğun olaraq metan emissiyalarının azaldılması istiqamətində səylərini davam etdirir. Ümumilikdə son hesabat dövründən bəri Serbiyanın əldə etdiyi irəliləyişlər koordinasiyalı qanunvericilik islahatları, daha dərin analitik araşdırmalar və xüsusilə nəqliyyat sektorunda yüksəktəsirli metan azaltma tədbirlərinin prioritetləşdirilməsi ilə xarakterizə olunur. Bu isə Serbiyanın Qlobal Metan Öhdəliyi üzrə götürdüyü öhdəliklərə uyğunluğunu daha da gücləndirir. Bizim mövqeyimizə görə, metan emissiyalarının azaldılması ayrıca şəkildə həll edilə bilməz. Bu, inteqrə olunmuş siyasətlər, güclü institusional koordinasiya və ölkələr arasında sıx əməkdaşlıq tələb edir. Regional və beynəlxalq tərəfdaşlıqlar texnologiyaların paylaşılması, potensialın gücləndirilməsi və genişmiqyaslı tətbiqlər üçün zəruri investisiyaların səfərbər olunması baxımından xüsusi əhəmiyyət daşıyır. Serbiya qlobal iqlim məqsədlərinə uyğun konkret və ölçüləbilən tədbirlərin təşviqinə sadiq qalır. Eyni zamanda, keçidin real, sosial baxımdan əsaslandırılmış, balanslı və iqtisadi cəhətdən dayanıqlı olmasını vacib hesab edir. Biz tərəfdaşlarla birlikdə fəaliyyət göstərərək bütün sektorlarda metan emissiyalarının azaldılması səylərini sürətləndirməyə hazırıq”, - deyə Sara Pavkov diqqətə çatdırıb.
