Qiymətləndiricilər Palatası bu sahədə müsbət dəyişikliklər üçün geniş imkanlar yaradacaq
Dövlət İmtahan Mərkəzi (DİM) "Qiymətləndirmə fəaliyyəti haqqında" yeni qanunun tələbinə uyğun olaraq ilk dəfə qiymətləndiricilərin ixtisas imtahanını keçirib.
Azərbaycan Qiymətləndiricilər Cəmiyyətinin (AQC) sədri, Türk Dövlətləri Qiymətləndiricilər Birlikləri Şurasının (CAATS) prezidenti Vüqar Oruc imtahanın yekunları və digər mövzular ətrafında "Azərbaycan" qəzetinə açıqlamasında bildirib ki, DİM tərəfindən təşkil edilən imtahanda 144 namizəd iştirak edib. Onlardan 106-sı uğur qazanıb. İmtahanlar 9 istiqamət üzrə keçirilsə də, iddialıların əksəriyyəti əsasən 2 istiqamət, daşınmaz və daşınar əmlakın qiymətləndirilməsi istiqamətlərinə üstünlük verib.
V.Oruc xatırladıb ki, 2022-ci ilin may ayında Azərbaycan Qiymətləndiricilər Cəmiyyətinin sədri seçilərkən hesabat-seçki yığıncağında "Qiymətləndirmə fəaliyyəti haqqında" 1998-ci ildə qəbul olunmuş qanunun yenilənməsi təklifi verilib: "Qiymətləndiricilər Palatasının yaradılması da təkliflərimiz sırasında idi. Belə bir təkliflə çıxış etməyimizin əsas səbəbi cənab Prezident İlham Əliyevin rəhbərliyi altında ölkə miqyasında çoxvektorlu islahatlar həyata keçirilməsi, demək olar ki, bütün sahələrin yenilənməsi idi. Hesab edirdik ki, qiymətləndirmə fəaliyyəti də bu prosesdən kənarda qalmamalıdır və müasir dövrün tələblərinə uyğun fəaliyyət modelinə keçid etməlidir. Ötən ilin payızından etibarən qanun layihəsi hazırlanmağa başlandı və AQC olaraq biz də Milli Məclisdə təşkil olunan müzakirələrdə iştirak etdik. 2023-cü ilin sonunda isə qanun qəbul edilərək, Prezident İlham Əliyevin 8 dekabr 2023-cü il tarixli fərmanı ilə təsdiq olundu. Dövlət başçısının fərmanına uyğun olaraq Baş nazir Əli Əsədovun sərəncamı ilə Qiymətləndiricilər Palatasını təsis etmək üçün İqtisadiyyat və Maliyyə nazirliklərinin rəsmilərindən ibarət Təşkilat Komitəsi yaradıldı. Qanunla palatanı təsis etmək hüququ qiymətləndirmə imtahanından keçən qiymətləndiricilərə həvalə edilib. Biz Təşkilat Komitəsinin, İqtisadiyyat, Maliyyə, Ədliyyə nazirliklərinin, Mərkəzi Bankın və Dövlət İmtahan Mərkəzinin birgə müzakirələrində yaxından iştirak etdik".
Sədr qeyd edib ki, Dövlət İmtahan Mərkəzinin imtahanlara hazırlıq məqsədilə təşkil etdiyi prosesdə də AQC fəal iştirak edib və qiymətləndirmə mütəxəssisləri, iqtisadçı alimlərlə birlikdə imtahanın yüksək səviyyədə keçirilməsinə töhfələrini veriblər. O bildirib ki, imtahanla bağlı hər hansı neqativ fikri yoxdur və ölkə qiymətləndiriciləri sektor üçün yenilik sayılan mərhələni uğurla adlayıblar.
"Qiymətləndirmə fəaliyyəti haqqında" qanuna müvafiq olaraq Qiymətləndiricilər Palatası təsis olunmalıdır" deyən V.Oruc bildirib ki, artıq palatanın üzvləri məlumdur: "İmtahanda müvəffəqiyyət qazanan qiymətləndiricilər palatada təmsil olunmaq hüququnu qazanıblar. Təsis yığıncağını isə Nazirlər Kabinetinin yaratdığı Təşkilat Komitəsi təşkil edəcək. Bundan sonra qiymətləndirmə sektorunun tənzimlənməsi ilə bağlı qərarları palata və onun rəhbərliyi verəcək. Rəhbərliyə gəldikdə isə təsis yığıncağında seçilən sədr və müavinləri avtomatik olaraq Rəyasət Heyətində təmsilçilik qazanacaq. Bundan əlavə, Rəyasət Heyətinə daha 6 sərbəst üzv seçiləcək. Eyni zamanda yığıncaqda qurumun İntizam Komissiyası da formalaşdırılacaq. Onu da deyim ki, ölkəmizin ilk assosiativ peşə birliklərindən olan AQC qiymətləndirmə sektorunun tərəqqisi üçün mühüm işlər görüb. Faktiki olaraq tənzimləyici qurum funksiyasını həyata keçirib və bu əsnada qiymətləndiricilər arasında faydalı və qarşılıqlı təmasların artırılmasına, koordinasiyalı fəaliyyətin təşkilinə nail olub. Dövlət qurumları, maliyyə təsisatları, beynəlxalq təşkilatlar, vətəndaş cəmiyyəti institutları, kütləvi informasiya vasitələri, assosiativ birliklərlə fəal əməkdaşlıq edən cəmiyyət bu günə qədər qiymətləndiricilərin təlim, tədris, sertifikasiya prosesini də həyata keçirib. 7 türk dövlətinin, 700 qiymətləndirmə şirkətinin və minlərlə qiymətləndiricinin təmsil olunduğu Türk Dövlətləri Qiymətləndiricilər Birlikləri Şurasının formalaşmasında yaxından iştirak edib və bu gün AQC sədri olaraq bu beynəlxalq təşkilata rəhbərlik edirəm. Qiymətləndirmə sektorunun idarə olunması sahəsində xüsusilə son illərdə təkmilləşdirilmiş zəngin ənənə var. Ümidvarıq ki, bu amil nəzərə alınacaq və peşəkar qiymətləndiricilər Qiymətləndiricilər Palatasının rəhbərliyində təmsil olunacaqlar".
Sədr qeyd edib ki, AQC ictimai birlik, peşə birliyi olaraq fəaliyyətini bundan sonra da davam etdirəcək. Azərbaycanda bir çox sahələr hökumət orqanları tərəfindən tənzimlənsə də, həmin sahələrə aid ictimai birliklər də fəaliyyət göstərirlər. Yəni palatanın formalaşması AQC-nin fəaliyyətinə mane olmur, əksinə, cəmiyyətin qarşısında yeni və geniş imkanlar açır. AQC-nin bundan sonrakı fəaliyyəti heç şübhəsiz Qiymətləndiricilər Palatası ilə koordinasiyalı şəkildə davam edəcək.
Qiymətləndiricilər Palatasının formalaşmasının Prezident İlham Əliyevin rəhbərliyi altında həyata keçirilən islahatlar prosesinin tərkib hissəsi olduğunu qeyd edən V.Oruc deyib ki, bu prosesə qanunvericilik bazasının yenilənməsi, müasir idarəetməyə keçidin təmini baxımından çox böyük önəm verilir və ölkəboyu həyata keçirilən çoxvektorlu islahatların nəticəsi müsbət olduğu kimi, bu prosesin də ümumilikdə qiymətləndirmə sektorunun tərəqqisinə yol açacağına şübhə etmir.
Əsmər QARDAŞXANOVA,
"Azərbaycan"
jpg_1761237395.jpg)
