Milli Məclisin sədri Sahibə Qafarova Qırğız Respublikasına səfəri çərçivəsində bu ölkənin Joqorku Keneşinin sədri Marlen Mamatalıyev ilə görüşüb.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildirilib ki, görüşdə xalqlarımız arasında tarixi-mədəni, milli-mənəvi bağların əhəmiyyəti vurğulanaraq, bu gün dövlətlərimiz arasında mövcud olan yüksəksəviyyəli münasibətlərdən, həyata keçirilən qarşılıqlı səfərlərdən, görüşlərdən və təmaslardan məmnunluq ifadə olunub. Tərəflər Azərbaycan-Qırğızıstan qardaşlıq münasibətlərinin inkişafının xüsusi əhəmiyyət kəsb etdiyini təsdiqləyiblər.
Söhbət zamanı Azərbaycan Prezidenti İlham Əliyevin Qırğız Respublikasına son dövlət səfərinin mühüm hadisə olduğu və münasibətlərimizin müttəfiqlik səviyyəsinə yüksəlməsinə töhfə verdiyi vurğulanıb. Bildirilib ki, Azərbaycan və Qırğızıstanın dövlət başçılarının səyləri nəticəsində ölkələrimiz arasında əlaqələr sürətlə inkişaf edərək bir çox sahələrdə əməkdaşlıq əlaqələrinin genişlənməsini təmin edib.
Görüşdə humanitar əlaqələrin inkişafı, xalqlarımızı bir-birinə daha da yaxınlaşdıran addımların əhəmiyyəti ilə bağlı da fikirlər səsləndirilib. Marlen Mamatalıyev Ağdam rayonunun Xıdırlı kəndində Qırğızıstan xalqının hədiyyəsi olan orta məktəbin, eləcə də Bişkekdə Heydər Əliyev adına məktəb-gimnaziya kompleksinin və Nizami Gəncəvi adına məktəbin xalqlarımız arasında səmimi dostluğun və qardaşlıq münasibətlərinin rəmzi olduğunu qeyd edib. O, Bakıda Çingiz Aytmatovun abidəsinin ucaldıldığını və bunu böyük Qırğız yazıçısının xatirəsinə diqqət və ehtiram kimi yüksək qiymətləndirdiklərini deyib.
Sahibə Qafarova da xalqlarımızı birləşdirən tarixi, mədəni və mənəvi köklərin münasibətlərimizin inkişafında mühüm rol oynadığını vurğulayıb. O, parlamentlər arasında münasibətlərin bu istiqamətdə əhəmiyyətini qeyd edib.
Görüşdə iki ölkənin parlamentləri arasında əlaqələrin münasibətlərimizin yüksək səviyyəsinə uyğun olaraq daha da inkişaf etdiyi vurğulanıb, parlament komitələrinin və dostluq qruplarının fəaliyyətinin genişləndirilməsinin vacibliyi diqqətə çatdırılıb.
Söhbət zamanı parlamentlər arasında əlaqələrin daha da genişləndirilməsində Türkdilli Ölkələrin Parlament Assambleyası (TÜRKPA) çərçivəsində əməkdaşlığın mühüm rol oynadığı vurğulanıb. Həmçinin türk dövlətləri arasında parlamentlərarası əməkdaşlığın genişləndirilməsinin əhəmiyyəti diqqətə çatdırılıb.
Tərəflər beynəlxalq təşkilatlar çərçivəsində qarşılıqlı dəstəyin əhəmiyyətini də vurğulayıblar. Bu platformalarda hər zaman qarşılıqlı dəstəyin hiss olunduğu qeyd edilib və ölkələrimizin gələcəkdə də bir-birini dəstəkləməyə davam edəcəklərinə əminlik ifadə olunub.
Görüşdə parlamentlər arasında əməkdaşlığın genişləndirilməsi ilə bağlı fikir mübadiləsi aparılıb və bir sıra məsələlərə dair razılıq əldə edilib.
