Azərbaycan 20-yə yaxın ölkəyə hərbi təyinatlı məhsullar ixrac edir
2025-ci ilin dövlət büdcəsindən müdafiə və milli təhlükəsizlik xərclərinə 8,1 milyard manat vəsait ayrılıb. Bu isə əvvəlki ilin məbləğindən 23 faiz çoxdur. Ümumilikdə ötən il 1,4 milyard manat dəyərində hərbi təyinatlı məhsul istehsal edilib. Bu gün Azərbaycan 20-yə yaxın ölkəyə hərbi təyinatlı məhsullar ixrac edir.
Bu fikirləri martın 13-də Milli Məclisin yaz sessiyasında növbəti plenar iclasda Baş nazir Əli Əsədov söyləyib. Baş nazir təhsil, səhiyyə və sosial müdafiəyə ayrılan vəsaitlərdən danışıb. Əli Əsədov vurğulayıb ki, mövcud geosiyasi şərait nəzərə alınaraq, əldə olunmuş nəticələrin qorunması, ölkənin təhlükəsizliyinin möhkəmləndirilməsi, müdafiə qabiliyyətinin artırılması və dövlət sərhədlərinin toxunulmazlığının təmin olunması istiqamətində tədbirlər bundan sonra da ardıcıl şəkildə davam etdiriləcəkdir.
Azərbaycanın dövlət büdcəsindən müdafiə və milli təhlükəsizlik sahəsinə ayrılan vəsait, ölkənin təhlükəsizlik strategiyasının inkişafı və regional sabitlik baxımından mühüm əhəmiyyət kəsb edir. 2025-ci il üçün ayrılan 8,1 milyard manatlıq vəsait ölkənin hərbi gücünü artırmaq və milli təhlükəsizliyi təmin etmək məqsədinə xidmət edir.
Müdafiə və milli təhlükəsizlik sahələri hər bir suveren dövlətin ən vacib prioritetlərindən biridir. Azərbaycanın 8,1 milyard manatlıq xərcləri yalnız ordu quruculuğu və silahlanma deyil, həmçinin beynəlxalq təhlükəsizlik məsələlərinə qarşı hazırlıq məqsədini də güdüb.
Azərbaycanın yerləşdiyi region geosiyasi baxımdan çox önəmli olduğu üçün bu vəsaitlərin istiqamətlənməsi həm müdafiə potensialının artırılmasına, həm də milli təhlükəsizliyin təmin edilməsinə yönəlib. Azərbaycanın strateji məqsədi müstəqilliyinin və ərazi bütövlüyünün qorunması, eləcə də beynəlxalq müttəfiqlərlə əlaqələrin gücləndirilməsidir.
Son illərdə Azərbaycanın müdafiə sahəsində etdiyi yatırımlar ordu quruculuğunun modernləşdirilməsi və yeni texnologiyaların tətbiqini əhatə edir. Bu vəsaitlərin bir hissəsi ən son texnologiyalara sahib olan müasir silah sistemlərinin alınmasına, hərbi təlimlərin inkişaf etdirilməsinə və hərbi infrastrukturun yenilənməsinə sərf olunacaq.
Ölkəmiz həmçinin müasir döyüş texnologiyalarına sahib olmaqla yanaşı, milli təhlükəsizlik sahəsində kiber təhlükəsizlik kimi yeni təhdidlərə qarşı da ciddi tədbirlər həyata keçirir. Bu, müasir dünyada ən önəmli sahələrdən biridir, çünki rəqəmsal mühitdəki təhdidlər ənənəvi hərbi təhdidlərdən daha böyük risklərə yol açmağa qadirdir.
Azərbaycanın müdafiə və milli təhlükəsizlik sahəsinə ayrılan vəsait yalnız ordu quruculuğu ilə məhdudlaşmır. Ölkə həmçinin regional sabitlik və ərazi bütövlüyünü təmin etmək məqsədilə sərhəd təhlükəsizliyinə və daxili təhlükəsizlik orqanlarının gücləndirilməsinə də önəm verir. Bu vəsait, sərhəd qoşunlarının modernləşdirilməsi milli təhlükəsizlik və kəşfiyyat orqanlarının işinin daha effektiv və çevik olmasına yönəlib.
Azərbaycanın sərhəd təhlükəsizliyinə olan yatırımlar xüsusi önəm kəsb edir. Ordu və təhlükəsizlik orqanlarının gücləndirilməsi, gələcəkdə hər hansı bir potensial təhdidə qarşı hazırlıqlı olmaq günün vacib məsələsidir.
Azərbaycan həmçinin beynəlxalq təhlükəsizlik mühitindəki vəziyyətləri nəzərə alaraq, milli təhlükəsizlik strategiyasını formalaşdırır. Bu, yalnız hərbi qüvvələrdən ibarət deyil, həm də ölkənin diplomatik və beynəlxalq müttəfiqlərlə olan əlaqələrinin gücləndirilməsi baxımından da əhəmiyyətlidir.
Eyni zamanda hərbi xidmətə çağırılan vətəndaşlar üçün daha yaxşı şəraitlərin yaradılması, onların sosial təminatının artırılması da bu vəsaitlərin daxilində nəzərdə tutulub. Həmçinin ordu içərisindəki kadrların təhsili və peşəkar bacarıqlarının inkişafı üçün təlim proqramlarının gücləndirilməsi də diqqətdə saxlanılır.
2026-cı ilin dövlət büdcəsində də müdafiə və milli təhlükəsizlik xərcləri artırılıb. Bu rəqəm 2025-ci ilin müvafiq büdcə göstəricisindən təxminən 318 milyon manat çoxdur və müdafiə qabiliyyətinin gücləndirilməsinə əsas prioritet kimi yanaşıldığını göstərir.
Azərbaycanın son illərdə hərbi təyinatlı məhsul istehsalı və bu gün 20-yə yaxın dövlətə hərbi təyinatlı məhsulların ixracı ölkənin bu sahədə qısa zamanda böyük uğurlar əldə etdiyini bir daha təsdiqləyir. Bu göstərici həm də Azərbaycanın hərbi sənayesi sahəsindəki inkişafını və beynəlxalq bazarda artan rolunun bariz təcəssümüdür.
Azərbaycanın hərbi sənayesi ölkənin müstəqillik qazandığı dövrdən bəri inkişaf etməyə başlayıb. Xüsusilə son 10 ildə dövlətin hərbi sənayenin modernləşdirilməsi və yeni texnologiyalarla silahlanması istiqamətindəki yatırımları, ölkəni regional bazarda müasir hərbi məhsul istehsalı sahəsində rəqabətə girməyə hazırlayıb.
Orta və ağır silahlar, döyüş maşınları, raket sistemləri və digər hərbi təyinatlı avadanlıqların istehsalı sahəsində əldə edilən müvəffəqiyyətlər, Azərbaycanı yalnız öz müdafiə ehtiyaclarını qarşılayan deyil, eyni zamanda qlobal bazara ixrac edən ölkəyə çevirib.
Azərbaycanın hərbi təyinatlı məhsul ixrac etdiyi ölkələr arasında geniş bir coğrafiya mövcuddur. Bu ölkələr əsasən Orta Asiya, Yaxın Şərq, Şimali Afrika və bəzi postsovet məkanlarındadır. Azərbaycan bu bazarlarda hərbi texnologiyaların yüksək keyfiyyətini və qənaətcil qiymətlərini təklif etməklə, böyük rəqabət üstünlüyü qazanıb.
Hərbi təyinatlı məhsul ixracı Azərbaycanın iqtisadiyyatına müsbət təsir göstərir. Bu sahədəki inkişaf ölkənin yerli istehsal gücünü artırır, texnoloji inkişafı sürətləndirir və yeni iş yerlərinin açılmasına səbəb olur.
İxrac edilən hərbi məhsulların keyfiyyəti və rəqabət qabiliyyəti Azərbaycanı bu sahədə daha böyük bir oyunçuya çevirir. Ölkəmizin hərbi sənayesinin inkişafı, digər sahələrə, xüsusilə infrastruktur və yüksək texnologiyalara investisiyaların artırılmasına da töhfə verir.
Bir sözlə, Azərbaycan hərbi təyinatlı məhsullarının ixracı ilə həm də qlobal təhlükəsizlik bazarında da söz sahibinə çevrilməkdədir. Bu, Azərbaycanı, sadəcə, iqtisadi cəhətdən deyil, həm də diplomatik və hərbi baxımdan da daha möhkəm bir mövqeyə çıxarır.
Bu cür yüksəliş tempi onu deməyə əsas verir ki, Azərbaycanın hərbi məhsul ixracı, gələcəkdə daha da inkişaf edəcək və yeni bazarlara daxil olmaq üçün geniş imkanlar yaradacaq. İxrac edilən məhsulların çeşidinin genişlənməsi, yeni texnologiyaların tətbiqi və beynəlxalq bazarda daha da tanınan bir markaya çevrilmə prosesi Azərbaycanın hərbi sənayesini dünya səviyyəsində tanıtmağa imkan verəcək.
Rəşad BAXŞƏLİYEV,
"Azərbaycan"
