Fevralın 14-də “Azərkitab” Kitab Mərkəzində yazıçı-dramaturq Hüseynbala Mirələmovun “Yurda fəda üç paşa” trilogiyasının ilk əsəri olan “Ənvər Paşa” kitabının təqdimat mərasimi keçirilib. Tədbir sözügedən kitabla bağlı video-slaydın nümayişi ilə başlayıb.
Millət vəkillərinin və tanınmış ziyalıların iştirak etdiyi mərasimi giriş sözü ilə “Yada düşdü” jurnalının baş redaktor müavini, telejurnalist Kəmalə Mirzəyeva açıb: “ Yazıçı Hüseynbala Mirələmovun “Ənvər Paşa” kitabı gözəl bədii dillə qələmə alınmış bir tarixi roman olmaqdan əlavə, həm də bir-birini ürəkdən sevən iki insanın- Ənvərin və Naciyənin misilsiz eşq dastanıdır. Müəllif əsərdə Ənvər Paşanın həm hərb naziri, həm sərkərdə, həm də incə ruhlu bir aşiq obrazını böyük ustalıqla yaradıb. Dəyərli yazıçımızı bu uğurlu əsərə görə ürəkdən təbrik edir və “Yurda fəda üç paşa” trilogiyasının digər romanlarının nəşrini də səbirsizliklə gözləyirik”.
Milli Məclisin deputatı, akademik Nizami Cəfərov təqdim olunan kitabın ədəbi - bədii məziyyətləri haqqında söz açaraq Tacikistanın Bəlcivan əyalətində ömrünün 41-ci ilində şəhid olan Ənvər Paşa haqqında Azərbaycanda ilk dəfə belə təfərrüatlı kitab meydana çıxdığını vurğulayıb: “Görkəmli yazıçımız Hüseynbala Mirələmovun "Yurda fəda üç paşa" trilogiyasının birinci romanı olan "Ənvər Paşa" bədii-ideya məzmunu, bədii quruluşu etibarilə də sanballı əsərdir. Vaxtilə Azərbaycanda böyük şöhrət sahibi olmuş bu qeyri-adi tarixi şəxsiyyət barəsində bizdə ilk dəfədir ki, belə təfərrüatlı bir əsər meydana çıxır. “Ənvər Paşa” nə sənədliliyi bədiliyinə, nə də bədiiliyi sənədliliyinə kölgə salmayan bir romandır. İnanıram ki, oxucular əsəri böyük maraqla oxuyacaqlar. “Ənvər Paşa” kitabı ilə tanış olduqdan sonra oxucular məhz azərbaycanlı qələm adamının məsələyə neçə on illərdən sonrakı münasibətini öyrənərək təsəvvürlərindəki ziddiyyətliliyə yeni və xeyli dərəcədə obyektiv məlumatlar əsasında müəyyən harmoniya gətirə biləcəklər”.
Millət vəkili Eldar İbrahimov “Ənvər Paşa” kitabının tariximizi öyrənmək baxımından əhəmiyyətini qeyd edib: “Yazıçı Hüseynbala Mirələmov tariximiz barəsində, xüsusilə Qarabağ haqqında silsilə əsərlər qələmə alaraq bəzən qarabağlılardan daha artıq qarabağlı olduğunu sübut edib. Heydər Əliyev tərəfindən əsası qoyulan Azərbaycan-Türkiyə qardaslığının bu gün cənab Prezidentimiz İlham Əliyev və Türkiyənin cümhurbaşqanı Rəcəb Tayyib Ərdoğan tərəfindən davam etdirilməsi hamımıza məlumdur. Yazıçının bu nüansı əsas tutaraq “Ənvər Paşa” kitabını Azərbaycan - Türkiyə qardaşlığına və adlarını çəkdiyim böyük tarixi şəxsiyyətlərə ithaf etməsi də çox önəmli məsələdir. “Ənvər Paşa” tariximizi öyrənmək istəyən gənclərin stolüstü kitabı olmalıdır”.
Milli Məclisin deputatı Cavanşir Paşazadə “Ənvər Paşa” romanını gənclərin vətənpərvərlik ruhunda tərbiyəsi istiqamətində çox dəyərli əsər kimi səciyyələndirib.
“Yada düşdü” ədəbi-bədii, nostalji jurnalın baş redaktoru Nəzakət Məmmədova yazıçını yeni kitabı münasibətilə təbrik edərək indiyə qədər onun bir sıra tarixi mövzularda sanballı əsərlər qələmə aldığını bildirib. Nəzakət Məmmədova rəhbərlik etdiyi dərginin mərasimdə qonaqlara təqdim edilən, yaxın tarixdə işıq üzü görmüş 40-cı sayının xüsusi buraxılışının bütövlükdə yazıçı Hüseynbala Mirələmovun yaradıcılığına həsr olunduğunu və oxucular tərəfindən maraqla qarşılandığını xatırladıb.
Azərbaycan Mətbuat Şurasının sədri Əflatun Amaşov çıxışına maraqlı bir xatirə ilə başlayıb: “Yazıçı Hüseynbala Mirələmov mənim ilk redaktorum olub. Yeddinci sinifdə oxuyanda yazdığım şeirləri “Azərbaycan pioneri” qəzetinə yollamışdım, şeirlərim o vaxt həmin qəzetdə çalışan Hüseynbala müəllimin redaktorluğu ilə dərc edilmişdi.
Hüseynbala Mirələmov güclü bədii əsərlərlə yanaşı, ulu öndər Heydər Əliyev, cənab İlham Əliyev, Zərifə xanım Əliyeva, Mehriban xanım Əliyeva haqqında siyasi publisistika janrında qələmə aldığı sanballı nəşrləri ilə də Azərbaycan ədəbiyyatında özünəməxsus yer tutur. Bu gün təqdim olunan “Ənvər Paşa” bədiilik və tarixiliyi özündə birləşdirən, tarixi hadisələrə müasir yanaşma baxımından çox önəmli əsərdir”.
Xalq artisti Əli Nur “Ənvər Paşa” romanı ilə yazıçının “Sonuncu fateh”, “Gəncə qapıları”, “Xəcalət” kimi onlarla məşhur əsəri sırasına daha bir sanballı kitabın daxil olduğunu bildirib.
“525-ci qəzet”in baş redaktoru, Yazıçılar Birliyinin sədr müavini Rəşad Məcid çıxışında kitab təqdimatlarının hər zaman sevindirici hadisə olduğunu qeyd edərək yazıçı Hüseynbala Mirələmovun indiyədək çox sayda bədii və tarixi romanların, siyasi- publisistik janrda kitabların, oxunaqlı səfər təəssüratlarının, teatrsevərlər tərəfindən maraqla qarşılanan dram əsərlərinin müəllifi olduğunu vurğulayıb: “Bundan əvvəl yazıçının bu yaxınlarda nəşr edilən “İki şah, iki sultan” trilogiyasına daxil olan “Süqut”, “Bənövşəyi əncir” və “Çaldıran yolu” romanlarını da oxumuşam. Bu tarixi əsərlərə görə də yazıçımıza böyük təşəkkür düşür. Adını çəkdiyim trilogiyadakı əsərlərdə polemika yatadacaq maraqlı mövzular var. “Yurda fəda üç paşa” kitabının ilk romanı olan “Ənvər Paşa”nın da maraqla oxunacağına inanıram. Hüseynbala müəllim harada olsa, orada xoş ovqatlı kitab bayramıdır. Bu xoş ovqatın daimi olmasını arzulayıram”.
“Ənvər Paşa” kitabı vaxtilə Bakını azad edən qəhrəmanlara qoyulan böyük ədəbi abidədir. Belə tarixi nəşrləri qardaşlıq körpüsü adlandırıram və bu dəyərli kitabı ərsəyə gətirdiyinə görə hörmətli yazıçımıza ürəkdən minnətdarlığımı bildirirəm”. Bu fikirləri “Ənvər Paşa” kitabının həmredaktoru, professor Minaxanım Nuriyeva-Təkəli səsləndirib.
Jurnalist Dilman Musayev “Ənvər Paşa”nı birnəfəsə oxunan maraqlı əsər kimi səciyyələndirib.
“Çox sevinirəm ki, yazıçı Hüseynbala Mirələmov bu kitabla Ənvər Paşanın ədəbi-bədii monumentini Azərbaycan ədəbiyyatına gətirib. Əsərdə türkçülüyün gerçək tarixi bədii şirinliklə qələmə alınıb”. Tədbirdə bu fikirləri yazıçı Vaqif Nəsib qeyd edib.
Professor Elman Quliyev bildirib ki, “Ənvər Paşa” əsəri həm bədii dil aspektindən, həm də türk hərb tarixinə müasir və irfani yanaşma baxımından əhəmiyyətli əsərlərdəndir.
Sonda yazıçı Hüseynbala Mirələmov tədbirin təşkilatçılarına və iştirakçılarına təşəkkür edib və qonaqlar üçün “Ənvər Paşa” kitabını imzalayıb.
