Quba Mərkəzləşdirilmiş Kitabxana Sistemində rayon icra hakimiyyəti, Dini Qurumlarla İş üzrə Dövlət Komitəsinin Quba-Xaçmaz regional bölməsi, İnsan hüquqları üzrə müvəkkilin (ombudsman) Şimal regional mərkəzi və rayon kitabxanalarının birgə təşkilatçılığı ilə "Təhsil, hüquq və din: tolerantlıq mədəniyyətinin təməli" mövzusunda maarifləndirici tədbir keçirilib.
Tədbirdə Azərbaycanın əsrlərboyu formalaşmış tolerantlıq ənənələri, ölkəmizdə yaşayan müxtəlif xalqlar və dinlərin nümayəndələri arasında dostluq, qarşılıqlı hörmət və birgəyaşayış mühiti barədə ətraflı məlumat verilib, ölkəmizdə həyata keçirilən multikulturalizm siyasəti, dəyərlərin qorunub saxlanması və milli birliyin gücləndirilməsindəki rolu haqqında görülən işlərdən söz açılıb. Vurğulanıb ki, müzakirə edilən məsələ olduqca aktual və vacib bir mövzudur. Cəmiyyətin inkişafında bu üç əsas sahənin rolu danılmazdır. Tolerantlıq - fərqliliyə hörmət, başqasının fikrinə, inancına dözümlü yanaşmaq, həm təhsildə, həm hüquqda, həm də dini dəyərlərdə öz əksini tapmaqdır. Tolerantlıq isə insanlara fərqli baxışlarına, dininə, dilinə, mədəniyyətinə və həyat tərzinə hörmətlə yanaşmaqdır. Təhsil sahəsində tolerantlıq şagird və tələbələrə bərabər yanaşmanı, müxtəlif fikirlərin sərbəst ifadəsini və qarşılıqlı anlayışı təşviq edir. Humanitar sahədə tolerantlıq isə mədəniyyətlərarası dialoqu, empatiyanı və dinc birgəyaşayışı dəstəkləyir. Müasir cəmiyyətin inkişafı üçün bu anlayışın təməl dəyər kimi formalaşdırılması olduqca vacibdir. Çıxışlarda həmçinin qeyd edilib ki, tolerantlıq həm də vətəndaşların bir-birinə hörmətlə yanaşmasını və sosial sabitliyi təmin edir. Təhsil düşüncəni, hüquq ədaləti, din mənəviyyatı formalaşdırır. Bu üç sütunun üzərində qurulan tolerantlıq mədəniyyəti isə həm fərdi, həm də cəmiyyəti sülhə, qarşılıqlı anlaşmaya və sabitliyə aparır. Tolerantlıq - hüquqi baxışdan cəmiyyətdə fərqli düşüncələrə, dinlərə, millətlərə və həyat tərzinə hörmətlə yanaşmaq prinsipidir. Bu, yalnız əxlaqi yox, eyni zamanda konstitusion bir dəyərdir. Azərbaycan Respublikasının Konstitusiyası insan hüquq və azadlıqlarını təmin etməklə yanaşı, fərqli fikirlərin və kimliklərin birgə yaşamasını da qoruyur.
Sonda iştirakçılar arasında fikir mübadiləsi aparılıb.
Akif ƏLİYEV,
"Azərbaycan"
