Azərbaycan Prezidenti Avropada sözünə sadiq lider, etibarlı tərəfdaş və ən arzuolunan şəxs kimi qəbul edilir
Bu gün Azərbaycan dünyada Cənubi Qafqazın iqtisadi və hərbi gücü, nəhəng enerji və nəqliyyat infrastrukturlarının müəllifi, regionda söz sahibi olan aparıcı dövlət kimi tanınır.
Artıq Azərbaycan xarici əlaqələrini, siyasi-iqtisadi, hərbi, humanitar və digər sahələrdə müttəfiqlərini, əməkdaşlıq etdiyi ölkə və beynəlxalq təşkilatları özü seçir. Təbii sərvətlərinin sahibi kimi enerji sahəsində əməkdaşlıq əlaqələrini dövlət maraqları və qarşılıqlı faydalılıq prinsipləri əsasında reallaşdırır.
Digər tərəfdən, Azərbaycan bölgədə və beynəlxalq səviyyədə əməkdaşlığa, təhlükəsizliyə mühüm töhfələr verir. Məhz bütün bunlara görə, dünya siyasətinin aparıcı qurumları, həmçinin mötəbər beynəlxalq təşkilatlar Azərbaycanın mütərəqqi xarici siyasətini regional təhlükəsizlik və qlobal inkişafa mühüm töhfə kimi qiymətləndirir və ölkəmizlə əməkdaşlığa böyük önəm verirlər.
Azərbaycanın son illərdəki mühüm geosiyasi uğurlarından biri dünya birliyində güclü mövqeyə malik olması, beynəlxalq aləmdə söz sahibinə çevrilməsidir. Prezident İlham Əliyevin həyata keçirdiyi siyasi kurs respublikamızı inkişaf yoluna çıxarmaqla yanaşı, onun regional və beynəlxalq miqyasda nüfuzunu daha da artırıb. Azərbaycan dünyanın sayılıb-seçilən, hörmət olunan, etimad göstərilən dövlətinə çevrilib. Bir çox ölkə, o cümlədən Avropa İttifaqının üzvləri Cənubi Qafqazın lideri olan Azərbaycanla strateji tərəfdaş olduqlarını elan edirlər. Dünyanın böyük siyasi və iqtisadi dairələri Azərbaycanın regiondakı liderliyini və qlobal siyasətdə rolunu daim yüksək qiymətləndirirlər.
Bütün bunlar əlbəttə ki, Azərbaycan Prezidentinin həyata keçirdiyi müstəqil, qətiyyətli siyasətinin, etibarlı tərəfdaşlıq prinsipinin və sözünə sadiqliyinin yaratdığı reallıqdır. İlham Əliyev dəfələrlə əməli ilə, gördüyü iş ilə sübut edib ki, sözü imzası qədər keçərlidir.
Avropa liderləri tərəfindən onun fəaliyyətinə verilən yüksək qiymətlər, Azərbaycanın Avropadakı strateji mövqeyini və dövlət başçısının ölkəsini dünya arenasında necə təmsil etdiyini göstərir.
Bir çox Avropa lideri, İlham Əliyevin Azərbaycanı müasir dövrün siyasi və iqtisadi tələblərinə uyğun şəkildə inkişaf etdirməkdəki mükəmməl bacarığını vurğulayıb. Onlar,
İlham Əliyevin xüsusilə beynəlxalq münasibətlərdə strateji düşüncə tərzinə malik olduğunu və Azərbaycanın müxtəlif qlobal məsələlərə münasibətini balanslı və düzgün şəkildə ortaya qoyduğunu qeyd edirlər.
Avropa ölkələrinin prezident və hökumət başçılarının İlham Əliyev haqqında söylədikləri səmimi fikirlərə diqqət etsək buna bir daha şahidlik edərik.
Dekabrın 8-də Slovakiyaya ilk rəsmi səfər edən İlham Əliyevi Bratislavada qəbul edən Prezident Peter Pelleqrinı səmimi fikirlər söyləyib: "Sizi Slovakiyada, Bratislavada qəbul etmək böyük şərəfdir. Slovakiyaya səfər etmək qərarınız bizi çox şərəfləndirdi. Bu, Slovakiya Respublikasının tarixində Azərbaycan Prezidentinin ilk rəsmi səfəridir... Siz dostlarınızın yanına gəlmisiniz. Biz Sizi, ölkənizi özümüzə dost hesab edirik, çünki Sizinlə dəfələrlə görüşmək imkanımız olub. Çox məmnunam ki, Baş nazir qismində səfərim zamanı Sizinlə görüşdüyüm vaxtda biz münasibətlərimizi gücləndirmək qərarına gəldik".
Peter Pelleqrini bəlkə də indiyədək Slovakiyaya səfər edən heç bir dövlət başçısına bu qədər səmimi, içdəngələn fikirlər söyləməyib. İkinci dəfə İlham Əliyevlə görüşən slovakiyalı həmkarının bu münasibəti Azərbaycana və onun liderinə verilən yüksək dəyərdir.
İlham Əliyev haqqında səmimi fikirlərin digər müəllifi Serbiya Prezidenti Aleksandar Vuçiçdir. Serbiyalı həmkarı, İlham Əliyevin müstəqil siyasətini dəyərləndirərək söyləyib: "Dostumuz İlham Əliyevin iştirakı olmasaydı, bizim hər birimiz üçün qaz, eləcə də elektrik enerjisi təchizatının şaxələndirilməsinə ümid etmək asan olmazdı. Əziz dostum, görürəm ki, indi Siz Avropada çox məşhurlaşmısınız. Mən sizinlə əlaqə saxlamaq istəyirəm. Mən onunla dəfələrlə danışmışam. O, Avropada çox məşhurlaşıb. Bu arada, bilmirəm o nə edib, amma etiraf edim ki, bunun sirrini mən də bilmək istərdim".
Şimali Makedoniyanın sabiq Prezidenti Stevo Pendarovski isə İlham Əliyevi Avropada ən çox arzuolunan şəxs adlandrıb.
Macarıstanın xarici işlər naziri Peter Siyarto isə daha maraqlı fikir səsləndirib: "15 il əvvəl Macarıstanla Azərbaycan arasında qarşılıqlı hörmət əsasında tərəfdaşlıq qurulanda bəzi Avropa liderləri bu təşəbbüsə istehza ilə yanaşıb. Bu gün isə həmin liderlər Azərbaycan Prezidenti ilə şəkil çəkdirmək üçün Bakıda növbəyə dururlar".
İlham Əliyevin fəaliyyəti, müstəqil siyasəti barədə ən dəyərli fikirlərdən birinin də müəllifi qardaş ölkə olan Türkiyənin Prezidenti Rəcəb Tayyib Ərdoğandır: "İlham Əliyevlə davam edən inkişafla Azərbaycan bölgədə cazibə mərkəzinə çevrilib... Azərbaycanın əmin-amanlığı, rifahı və gələcək nəsillər üçün çəkdiyi dəyərli zəhmət bütün türk dünyası tərəfindən böyük maraq və sevinc hissi ilə izlənir və örnək kimi qəbul edilir".
Dünya liderlərinin, tanınmış ictimai-siyasi xadimlərin bu cür dəyərli fikirlərinin sayını dəfələrlə artırmaq olar. Səslənən bütün səmimi fikirlərdə Azərbaycan Prezidentinin şəxsi keyfiyyətləri, prinsipial mövqeyi və qlobal liderliyini şərtləndirən xarakterik məqamlar şərh edilir. Bütün bunlar İlham Əliyevin şəxsiyyətinə və fəaliyyətinə ölkə hüdudlarından kənarda da necə böyük qiymət verildiyini təsdiqləyən reallıqdır.
Rəşad BAXŞƏLİYEV,
"Azərbaycan"
