Xəbər verildiyi kimi, dünən ABŞ Prezidenti Donald Tramp İran və İsrail arasında atəşkəsin qüvvəyə mindiyini bildirmiş və münaqişə tərəflərindən onu pozmamağı xahiş etmişdi. "Atəşkəs artıq qüvvədədir. Xahiş edirəm, onu pozmayın!" - deyə o, "Truth" sosial şəbəkəsindəki səhifəsində yazmışdı.
Bundan əvvəl ABŞ Prezidenti NBC News telekanalına müsahibəsində bildirmişdi ki, İsrail və İran arasında atəşkəs "əbədi" davam edəcək. Qeyd etmişdi ki, İsrail və İran arasında gərginliyin artması nəticəsində çoxlu insan həlak olub və vəziyyət daha da pisləşə, "bütün Yaxın Şərqi məhv edə bilər". Eyni zamanda Tramp iki ölkə arasında atəşkəsin vacibliyinə diqqət çəkmişdi: "Bu, Amerika üçün əla gündür. Bu, Yaxın Şərq üçün əla gündür. İşi bitirə bildiyim üçün çox şadam". Münaqişə tərəfləri arasında atəşkəsin müddəti barədə danışan Tramp atəşkəsin müddətsiz olacağını bildirmişdi: "Mən hesab edirəm ki, atəşkəs daimidir. Bu, əbədi olaraq davam edəcək". "İsrail və İran 12 saat ərzində atəşkəsin olacağına dair razılığa gəliblər, bu zaman müharibə başa çatmış hesab olunacaq", - Tramp "Truth" sosial şəbəkəsində yazmışdı.
O qeyd etmişdi ki, atəşkəs rejiminə ilk olaraq İran, 12 saat sonra isə İsrail təşəbbüs göstərəcək, 24 saatdan sonra isə "dünya 12 günlük müharibənin bitməsini qeyd edəcək": "Hər şeyin guman etdiyimiz kimi olacağını fərz etsək, mən hər iki dövləti - İsraili və İranı "12 günlük müharibə" adlandırılmalı olan savaşı dayandırmaq üçün dözüm, cəsarət və zəkaya sahib olduqlarına görə təbrik etmək istərdim. Bu müharibə illərlə davam edə və bütün Yaxın Şərqi məhv edə bilərdi, amma belə olmadı və heç vaxt da olmayacaq!" İsrailin Baş naziri Benyamin Netanyahu da İranla müharibədə atəşkəs elan etmişdi.
Lakin bir neçə saatdan sonra İsrailin müdafiə naziri İsrael Kats İranın atəşkəsi pozduğunu bildirib və hərbçilərə Tehrana yeni zərbələr endirməyi əmr edib. "Mən İsrail ordusuna İranın atəşkəsi pozmasına Tehranın mərkəzindəki hədəflərə güclü zərbələrlə cavab verməyi tapşırmışam", - deyə Kats deyib. Bundan sonra Tehran yenidən bombardmana məruz qalıb.
İranın dövlət mediası yazır ki, İsrailin ittihamlarına cavab olaraq Tehran atəşkəs başlayandan sonra İsrailə raket atılması xəbərini təkzib edir. İran Milli Təhlükəsizlik Şurası da öz növbəsində atəşkəs elan edən bəyanat yayıb.
İranın Ali Milli Təhlükəsizlik Şurasının Katibliyindən verilən açıqlamada 12 günlük müharibədə "düşmənin hər bir təxribatına sarsıdıcı cavab" verildiyi və "xalqın misilsiz birliyi"ndən bəhs edilib.
Tramp deyib ki, İsrail və İran atəşkəsi pozub və o, hər iki tərəfdən "narazıdır". ABŞ Prezidenti İsraildən İrana hücum etməməyi xahiş edib. "İsrail, o bombaları atmayın. Əgər atsanız, bu, böyük pozuntu olacaq. Pilotlarınızı geri çağırın".
Axşam saatlarında Tramp İsrail-İran qarşıdurması ilə bağlı növbəti açıqlama verərək bir daha İsraili elan olunmuş atəşkəsə əməl etməyə səsləyib: "Mən İsraili sakitləşdirməliyəm. Atəşkəs elan edildikdən sonra İsrail əvvəlkilərdən daha çox bomba atıb".
Son məlumata görə, ABŞ Prezidenti Donald Tramp və Baş nazir Benyamin Netanyahu arasında telefon danışığından sonra İsrail raket zərbələrini dayandırıb.
Öz növbəsində İran Prezidenti Məsud Pezeşkian bildirib ki, əgər İsrail də buna əməl edərsə, Tehran ABŞ Prezidenti Donald Trampın elan etdiyi atəşkəsə hörmətlə yanaşacaq.
Rizvan CƏFƏROV,
"Azərbaycan"
png_1765896393.png)
