İnkişafın bundan real göstəricisi olarmı?!
Astara ölkəmizin dilbər guşələrindən biridir. Dağları, dərələri, meşələri, çayları, bulaqları, subtropik meyvə bağları var bu diyarın. Mavigözlü Xəzər bu gözəlliyə başqa bir gözəllik də qataraq onu daha əsrarəngiz edir.
Bu məkanda yaşayan insanlar isə uca Tanrının onlara bəxş etdiyi əvəzsiz nemətləri qorumaq, zənginləşdirmək üçün əllərindən gələni əsirgəmirlər. Elə buna görə də ölkəmizin Cənub qapısı sayılan Astara ildən-ilə inkişaf edir, yaşamaq üçün daha abad və rahat olur.
Bir neçə il əvvəl yazdığımız "Dünənin hara, bu günün hara, Astara" adlı məqalə yadımıza düşür. O yazıda rayonda aparılan quruculuq işlərindən, xüsusən şəhər boyu salınan dənizkənarı bulvardan geniş söhbət açmışdıq. Bizi buna sövq edən az vaxtda görülən çoxsaylı işlər idi. Bir ilin ərzində dənizin sahilindəki qamışlıqdan əsər-əlamət qalmamışdı. Onun yerində bənzərsiz bir istirahət parkı salınmışdı. Çəkinmədən bu parkı ən böyük şəhərlərin dənizkənarı parkları, bulvarları ilə müqayisə etmək olar. Bal kimi təmiz havalı bu məkanda uşaqların, gənclərin, yaşlıların istirahəti üçün hər bir şərait yaradılmışdır. Bulvarda qonaqlar və turistlər üçün mehmanxanalar, koteclər, kafe və restoranlar fəaliyyət göstərir.
Səni tanımadım, varlı olacan.
Gör dünənin hara, bu günün hara!
Burda göz oxşayır hər tərəf, hər yan,
Mübarək dondasan indi, Astara.
Astara bu gün də inkişafdan qalmır. 2024-cü ilin nəticələri belə deməyə əsas verir. Rayon iqtisadiyyatının əsas sahələri - sənaye, kənd təsərrüfatı, meşə, balıqçılıq, tikinti, ticarət, nəqliyyat və rabitə təsərrüfatı, habelə göstərilən digər xidmətlərin həcmi əvvəlki illə müqayisədə 5 faiz artıb. Ötən il 231,5 hektar çay plantasiyasından 667 ton yaşıl çay yarpağı toplanıb, 290 hektar çəltik sahəsindən 190,2 ton məhsul əldə edilib. Kənd təsərrüfatının digər sahələrində də uğurlu nəticələr qazanılıb.
Astara deyəndə ilk olaraq göz önünə sitrus meyvə bağları və çay plantasiyaları gəlir. Prezident İlham Əliyevin çayçılığın, çəltikçiliyin, sitrus meyvəçiliyinin inkişafına dair imzaladığı sərəncamlardan sonra rayonda innovativ üsullarla salınan sitrus və subtropik meyvə bağlarının həcmi 2 min 600 hektardan 4 min 564 hektara çatdırıldı. Keçən il həmin bağlardan ümumilikdə 67,8 min ton məhsul yığıldı, torpaq mülkiyyətçiləri və sahibkarlar yetişdirdikləri məhsulun satışından 60 milyon manatdan çox qazanc əldə etdilər. Son illər rayonda ekzotik meyvələrin əkilib-becərilməsinə də maraq xeyli artıb. Azərbaycanda, ümumiyyətlə, Cənubi Qafqazda ilk olaraq Astarada 42 hektarlıq belə bağ salınıb.
Astarada tikinti-quruculuq, abadlıq işləri də davam edib, təhsil, səhiyyə, mədəniyyət obyektlərinin tikintisi, əsaslı və cari təmiri diqqətdə saxlanılıb. Əhalinin, habelə qeyri-yaşayış sahələrinin, istehsal müəssisələrinin fasiləsiz olaraq elektrik enerjisi, təbii qaz, içməli su təminatını yaxşılaşdırmaq üçün bir sıra təxirəsalınmaz tədbirlər həyata keçirilib.
Yol iqtisadiyyatın, mədəniyyətin, bütövlükdə inkişafın başlıca göstəricisidir. Dağ kəndlərinə gedən yolların asfaltlaşdırılması, bəzi yollara çınqıl döşənməsi, yollar boyu çaylar üzərində yeni körpülərin salınması, köhnələrinin təmir edilməsi həmin ərazilərdə yaşayan əhalinin rayon mərkəzinə, buradan paytaxt Bakıya və digər yerlərə gediş-gəlişini xeyli asanlaşdırıb.
Bütün bunlar rayonda turizmin inkişafı üçün də geniş imkanlar yaradıb. Bu gün Astaraya gələn turistlərin sayı-hesabı yoxdur. Ən əsası Rusiyada, keçmiş SSRİ-nin digər respublikalarında yaşayan astaralılar bu abadlığı, şəraiti görüb öz doğma el-obalarına qayıdırlar. İnkişafın bundan real göstəricisi olarmı?!
Seyran CAVADOV,
"Azərbaycan"
jpg_1762509871.jpg)
