Avqustun 12-də Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva Uşaq Səfirlər Məclisinin məzunları və yeni seçilmiş üzvləri ilə görüşüb.
Dövlət Komitəsindən AZƏRTAC-a bildirilib ki, görüşdə Məclisin fəaliyyəti, əldə olunan nəticələr, uşaqların hüquqlarının müdafiəsi və ictimai həyatda fəal iştirakının təmin edilməsi istiqamətində görülən işlər müzakirə olunub.
Aynur Sofiyeva Uşaq Səfirlər Məclisinin uşaqların şəxsi inkişafı, liderlik keyfiyyətlərinin formalaşması və yeni təcrübə qazanması baxımından Dövlət Komitəsinin uğurlu layihələrindən biri olduğunu vurğulayıb.
O, Məclisin hər bir üzvünün Azərbaycan gəncinin layiqli nümunəsi olduğunu qeyd edərək, məzunların qazandıqları bilik və təcrübənin gələcək həyatlarında mühüm rol oynayacağını bildirib.
Məzunlara gələcək fəaliyyətlərində uğurlar arzulayan A.Sofiyeva onlara öz potensiallarını reallaşdırmaq üçün yaradılan imkanlardan səmərəli istifadəni tövsiyə edib.
Sonra məzunlara təşəkkürnamələr təqdim edilib.
Qeyd edək ki, Uşaq Səfirlər Məclisinin məzunlarının hər biri dünyanın nüfuzlu universitetlərində təhsil almaq hüququ qazanıb. Onlardan üçü “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”nın iştirakçısı olub.
Görüşdə Məclisin yeni üzvləri seçilmiş səfirlərlə fikir mübadiləsi aparılıb. A.Sofiyeva yeni səfirlərə fəal iştirak və uşaqların hüquqlarının müdafiəsi istiqamətində təşəbbüslərlə çıxış etməyi tövsiyə edib.
Göstərilən etimada görə təşəkkürlərini bildirən səfirlər Azərbaycan uşaqlarının hüquq və mənafelərinin müdafiəsində fəal iştirak edəcəklərini bildiriblər.
Yekunda yeni səfirlərə üzvlük kartları təqdim edilib, xatirə fotosu çəkilib.
