Prezident İlham Əliyev Naxçıvana səfəri çərçivəsində Azərbaycan televiziyasına verdiyi müsahibədə mühüm mesajlar səsləndirdi. Dövlətimizin başçısı ölkəmizin sosial-iqtisadi inkişafından, strateji məsələlərdən, Naxçıvanın gələcək perspektivlərindən danışmaqla yanaşı, milli kimliyimizin əsasını təşkil edən tarixi-mədəni irsimizə, milli-mənəvi dəyərlərimizə və xalqımızın tarixi yaddaşına toxundu.
Bu, heç də təsadüfi deyil. Dövlətin qüdrəti yalnız iqtisadi inkişaf və sosial rifahla məhdudlaşmır. Güclü dövlətin təməlində güclü ictimai şüur, milli ruh, tarixi yaddaş və mənəvi dəyərlər dayanır. Öz tarixini, mədəniyyətini, dilini, ədəbiyyatını və milli irsini qoruyan xalq gələcəyə daha inamla addımlayır. Prezident İlham Əliyevin siyasətinin mərkəzində bu yanaşmanın dayandığı aydın görünür. Dövlətimizin başçısı Azərbaycanın maddi inkişafı ilə yanaşı, xalqımızın mənəvi sərvətlərinin qorunmasına, tarixi abidələrimizin bərpasına və milli dəyərlərimizin gələcək nəsillərə çatdırılmasına xüsusi diqqət yetirir.
Sözsüz ki, Naxçıvan Azərbaycanın qədim dövlətçilik və mədəniyyət mərkəzlərindən biri olmaqla yanaşı, xalqımızın tarixi yaddaşında mühüm iz qoymuş diyardır. Naxçıvan şəhəri qədim Atabəylər dövlətinin paytaxtı olub. Bu torpaq əsrlər boyu Azərbaycan memarlığının, elminin, mədəniyyətinin və dövlətçilik ənənələrinin inkişafında mühüm rol oynayıb. Burada yaradılmış tarixi-mədəni abidələrin hər biri xalqımızın keçmişindən bu gününə uzanan mənəvi körpüdür. Bu səbəbdən Prezident İlham Əliyevin Naxçıvanın tarixi-mədəni abidələrinin qorunmasına və bərpasına göstərdiyi diqqət xüsusi əhəmiyyət daşıyır.
Azərbaycan memarlıq sənətinin nadir incilərindən biri, Əcəmi Naxçıvaninin yaratdığı möhtəşəm memarlıq nümunəsi - Möminə xatun məqbərəsinin bərpası və qorunması yalnız bir tarixi abidənin yenilənməsi demək deyil, həm də xalqımızın öz tarixinə və mədəniyyətinə münasibətinin göstəricisidir. Əcəmi Naxçıvani kimi böyük memarın xatirəsinin əbədiləşdirilməsi isə xalqımızın öz böyük şəxsiyyətlərinə olan ehtiramının ifadəsidir. Tarixi yaradan şəxsiyyətləri yaşatmaq, onların əsərlərini gələcək nəsillərə çatdırmaq milli yaddaşımızın qorunması deməkdir.
Prezident İlham Əliyevin müsahibəsində səsləndirdiyi mühüm fikirlərdən biri milli kimlik məsələsi ilə bağlıdır. Dövlətimizin başçısının vurğuladığı kimi, sosial-iqtisadi inkişaf nə qədər vacib olsa da, görülən bütün işlərin təməlində milli kimliyimiz, ruhumuz, mədəniyyətimiz, dilimiz, ədəbiyyatımız və tariximiz dayanır. Milli kimlik yalnız bir xalqın hansı ərazidə yaşaması ilə müəyyən olunmur, eyni zamanda həmin xalqın əsrlər boyu formalaşdırdığı dəyərlərin, dilin, mədəniyyətin, adət-ənənələrin, tarixi yaddaşın və mənəvi irsin qorunması ilə ölçülür. Əgər xalq öz tarixini unudarsa, milli yaddaş zəifləyər, milli-mənəvi dəyərlər qorunmazsa, gələcək nəsillərlə keçmiş arasında bağ qırılar. Buna görə də tarixi abidələrin qorunması, qədim şəhərlərin və memarlıq nümunələrinin bərpası, görkəmli şəxsiyyətlərin irsinin yaşadılması dövlət siyasətinin mühüm istiqamətlərindən biri kimi xüsusi əhəmiyyət daşıyır.
Ölkəmizdə son illər tarixi və mədəni irsin qorunması istiqamətində görülən işlər bu baxımdan diqqət çəkir. Bu gün Azərbaycan müasir, güclü və sürətlə inkişaf edən ölkədir. Həyata keçirilən böyük layihələr, iqtisadi inkişaf, enerji təhlükəsizliyinin təminatı, nəqliyyat və infrastruktur imkanlarının genişlənməsi Azərbaycanın gələcəyə doğru inamlı addımlar atdığını göstərir. Bu o deməkdir ki, maddi inkişafla mənəvi inkişafı bir-birindən ayırmaq mümkün deyil.
Müasir dövlət həm də öz milli dəyərlərinə sahib çıxan dövlətdir. Müasirlik milli kimlikdən uzaqlaşmaq yox, əksinə, milli kimliyi qoruyaraq dünyaya açılmaqdır. Azərbaycan bu iki istiqaməti bir-biri ilə uğurla uzlaşdırır. Prezident İlham Əliyevin Naxçıvana səfəri zamanı tarixi-mədəni abidələrin qorunması məsələsinə xüsusi diqqət yetirməsi də də bunun bariz nümunəsidir.
Naxçıvan haqqında danışarkən bu qədim torpağın xalqımıza bəxş etdiyi böyük şəxsiyyətləri xatırlamamaq mümkün deyil. Bu diyar Azərbaycana Ulu Öndər Heydər Əliyev kimi dahi şəxsiyyət bəxş etmişdir. Ümummilli Lİder Heydər Əliyevin dövlətçilik irsi müasir Azərbaycan tarixinin mühüm səhifələrindəndir. Ulu Öndərin həyat və fəaliyyəti Azərbaycan dövlətçiliyinin möhkəmləndirilməsi, milli şüurun inkişafı və xalqımızın milli-mənəvi dəyərlərinin qorunması ilə sıx bağlıdır. Bu gün Heydər Əliyevin siyasi irsinin davam etdirilməsi elə Azərbaycanın inkişafı deməkdir.
Amma milli-mənəvi dəyərlərin qorunması yalnız dövlətin işi deyil, bu, hər bir Azərbaycan vətəndaşının mənəvi məsuliyyətidir. Dövlət tarixi abidələri bərpa edə, mədəniyyət ocaqları yarada, milli irsin qorunması üçün layihələr həyata keçirə bilər. Lakin həmin irsin yaşadılması üçün xalqın öz tarixini bilməsi, dilinə, mədəniyyətinə və mənəvi dəyərlərinə hörmət etməsi olduqca vacibdir. Bu gün bizdən sonra gələcək nəsillərə yalnız inkişaf etmiş Azərbaycan deyil, həm də tarixini bilən, milli ruhunu qoruyan, öz köklərinə bağlı Azərbaycan miras qoymaq tələb olunur. Möminə xatun məqbərəsi də, Əcəmi Naxçıvaninin yaradıcılığı da, Naxçıvanın qədim dövlətçilik və mədəniyyət tarixi də bizə bunu xatırladır – ölkənin tarixini qorumaq onun gələcəyini qurmaqdır.
Dövlətimizin başçısı İlham Əliyevin Naxçıvana səfəri zamanı Azərbaycan televiziyasına verdiyi müsahibədə milli kimlik, ruh, tarix və mədəniyyət haqqında səsləndirdiyi fikirlər bu baxımdan xüsusi əhəmiyyət daşıyır. Bu fikirlər bir daha göstərir ki, Azərbaycan dövlətinin inkişaf strategiyasında maddi tərəqqi ilə milli-mənəvi dəyərlər bir-birini tamamlayır. Güclü iqtisadiyyat, müasir infrastruktur və böyük layihələrlə yanaşı, tariximizə, dilimizə, mədəniyyətimizə, ədəbiyyatımıza və milli yaddaşımıza sahib çıxmaq da dövlətimizin siyasətinin əsas prioritetidir. Biz tariximizlə, mədəniyyətimizlə və böyük şəxsiyyətlərimizlə fəxr edə bilərik. Lakin fəxr etmək kifayət deyil, onları qorumaq, öyrənmək və gələcək nəsillərə çatdırmaq lazımdır ki, bunlar da bizim müqəddəs borcumuz olmalıdır.
Elşən QƏNİYEV
“Azərbaycan”
