"Prezident İlham Əliyevin Azərbaycanın televiziya kanallarına ilin əvvəlində müsahibəsi artıq ənənəyə çevrilib. Dövlət başçımız yanvarın 7-də növbəti dəfə yerli televiziya kanallarının suallarını geniş cavablandırdı və ictimaiyyəti maraqlandıran məsələlərə, o cümlədən beynəlxalq aləmdə ölkəmizin böyük nüfuz qazanmasına, Fransanın Azərbaycana qarşı düşmənçilik mövqeyi barədə, müasir dünyada neokolonializmdən əziyyət çəkən xalqlara dövlətimizin göstərdiyi dəstəyə, dünyada baş verən siyasi proseslərə öz münasibətini bildirdi".
Bu sözləri "Azərbaycan" qəzetinə BDU-nun kafedra müdiri, professor Kamilə Əliyeva deyib. O bildirib ki, dövlət başçısının dəfələrlə qeyd etdiyi kimi, iqtisadi cəhətdən güclü olan dövlət hər şeyə qadirdir. Azərbaycanın iqtisadi gücü hər il artmaqdadır. Prezident İlham Əliyev uzun illər dövlət büdcəsi neft və qazdan asılı olan Azərbaycanı qeyri-neft məhsulları ixrac edən ölkəyə çevirib. Respublikamızda qeyri-neft sektoru hər il inkişaf etməkdədir. Uzun illər aparılan iqtisadi islahatlar, şəffaflıq, inhisarçılığa qarşı effektiv mübarizə, ölkəmizə investisiyaların cəlb edilməsi və investorlara yaradılan şəraitin yaxşılaşdırılması nəticəsində Azərbaycan beynəlxalq nüfuzlu reytinq agentliklərinin diqqətini çəkib və onların dövlətimizə münasibətində müsbət dəyişikliklər yaranıb. "Əminəm ki, Azərbaycan beynəlxalq reytinq sıralamasında daha yüksək yerdə dayanacaq. Ölkəmizin maliyyə vəziyyəti də getdikcə yaxşılaşır. Valyuta ehtiyatlarımız hər il yüksəlir, xarici borcumuzu 14 dəfə üstələyir. Dünyanın inkişaf etmiş ölkələrində belə bu göstəricilərə rast gəlinə bilməz. Beynəlxalq iqtisadi ekspertlər Azərbaycanın dövlət büdcəsini ən yüksək sosialyönümlü büdcə kimi qiymətləndirirlər. Əməkhaqlar, pensiyalar və digər müavinətlərin hər il artırılması dövlətimizin əsas sosial siyasətidir. Ölkə rəhbərinin həyata keçirdiyi iqtisadi islahatların əsasını əhalinin rifah halının yüksəldilməsi təşkil edir", - deyə o əlavə edib.
Kafedra müdiri qeyd edib ki, beynəlxalq aləmdə ölkəmizin nüfuzu yüksəldikcə dünya dövlətləri tərəfindən Azərbaycana olan böyük inam və etibar da artır. COP29-un ölkəmizdə keçirilməsinə 198 ölkənin səs verməsi buna sübutdur. Qısa zaman ərzində konfransın yüksək səviyyədə təşkil edilməsi üçün böyük işlər görüldü. Tədbirə 80 ölkənin dövlət və hökumət başçıları, ümumilikdə 197 ölkədən 76 min iştirakçı gəldi Hər kəs tədbirin yüksək səviyyədə təşkil edildiyini xüsusi vurğuladı. Fransa başda olmaqla, bir sıra Qərb dövlətləri COP29-u boykot etməyə cəhd etsələr də, bu, uğursuz oldu. Bakıda keçirilən COP29 COPlar tarixində ən mötəbər tədbir kimi qalacaq. On ildən çoxdur həllini tapmayan məsələlər Bakı Konfransında öz müsbət həllini tapdı. Azərbaycan zəngin neft-qaz ölkəsi olmasına baxmayaraq, dünyanın "yaşıl enerji"yə keçidində mühüm rol oynadığını sübut etdi.
Kamilə Əliyeva vurğulayıb ki, Azərbaycanın dünyanın nüfuzlu beynəlxalq təşkilatlarına üzv qəbul edilməsi ölkəmizin xarici siyasətinin ən böyük uğurlarındandır: "Müsəlman ölkələrini birləşdirən D-8 təşkilatına üzvlük bu uğurun bir nümunəsidir. D-8-ə üzv olmaqla Azərbaycan öz siyasi, iqtisadi gücünü artırmaqla yanaşı, təşkilatın daha da nüfuz qazanmasına öz töhfəsini verəcək".
O xatırladıb ki, Prezident İlham Əliyev müsahibəsində Azərbaycanla Ermənistan arasında mövcud vəziyyətdən danışıb və iki ölkə arasında sülhün yaranması istiqamətində ölkəmizin mövqeyini bir daha Ermənistan və onun havadarlarına çatdırıb. Ermənistanın baş naziri Paşinyan dünya ictimaiyyətini aldatmağa çalışır ki, guya Azərbaycanla sülh müqaviləsi bağlamağa hazırdır. Əslində, Ermənistan rəhbərliyi bu məsələdə qeyri-konstruktiv mövqe sərgiləyir. Azərbaycanın mövqeyi aydındır. İlk növbədə Ermənistan öz konstitusiyasında dəyişiklik etməli, Azərbaycana qarşı torpaq iddiası bəndini ləğv etməli, Minsk qrupunun fəaliyyətinin dayandırılması üçün Azərbaycanla birlikdə ATƏT-ə müraciət etməlidir. Çox təəssüf ki, bu gün Ermənistan tamamilə Fransanın nəzarətində olan bir ölkədir. Ermənistan rəhbərliyi başa düşməlidir ki, ona havadarlıq edənlər sona qədər Ermənistanın arxasında dayanmayacaqlar. Vətən müharibəsində ermənilər bunun şahidi oldu. Fransa dəfələrlə cəhd etsə də, Azərbaycanın haqlı mövqeyinə mane ola bilmədi. Fransa prezidenti Makron dəfələrlə Azərbaycana qarşı təzyiqlər və təxribatlar törətməyə çalışsa da, sonda Prezidentimizin qətiyyəti və siyasi iradəsi qarşısında məğlub oldu. Bu gün Fransa prezidenti Makron öz ölkəsini də ağır duruma salıb. Bu ölkə Afrikada öz mövqeyini itirməkdədir. Digər tərəfdən, Yeni Kaledoniyada və dənizaşırı bölgələrdə Fransa müstəmləkəsinə qarşı mübarizə başlayıb. "Makron rejimi burada yaşayan yerli xalqların haqlı etirazlarına qarşı ağır cinayətlər törədir. Təəssüflər olsun ki, dünya birliyi, eləcə də Avropa İttifaqı Fransanın bu cinayətlərinə göz yumur. Azərbaycan isə hər zaman müstəmləkəyə, zülmə məruz qalan dövlətlərə və xalqlara dəstək göstərir. Bir neçə gün bundan əvvəl Makron Azərbaycan dövlətinə qarşı əsassız ittihamlar irəli sürməyə başladı. Guya Azərbaycan Fransanın daxili işlərinə qarışır, əslində, isə Azərbaycan Fransanın neokolonist, müstəmləkəçi bir dövlət olduğunu dünyaya bəyan edir. Bu, ölkəmizin nə qədər güclü və qüdrətli bir dövlət olmasının sübutudur. Yaxın Şərqdə Ermənistanın ən yaxın müttəfiqi olan Suriya prezidenti Bəşər Əsəd hakimiyyəti də süquta uğradı. Bununla da Ermənistan rəhbərliyi bir daha ağır duruma məhkum oldu. Bəşər Əsəd rejimi Ermənistanın işğalçı siyasətini dəstəkləyərək, Azərbaycana qarşı düşmən mövqeyi sərgiləyirdi. Bütün bunlar göstərir ki, Ermənistanın yaxın dostları siyasi səhnədən silinməkdədir. Bu ölkənin varlığı və inkişafı qonşu dövlətlərlə, xüsusən Azərbaycan və Türkiyə ilə normal münasibətlərdən keçir".
Dövlət başçısının müsahibədə dünyada gedən siyasi proseslərə, gərgin geosiyasi duruma da öz münasibətini bildirdiyini qeyd edən professor Kamilə Əliyeva bildirib ki, bu gün hər bir azərbaycanlı fəxr edir ki, Azərbaycan adlı güclü və qüdrətli bir dövlətdə yaşayır və onun İlham Əliyev kimi lideri var. Prezidentimizin də qeyd etdiyi kimi, onun arxasında xalq, xalqımızın arxasında Prezident dayanır.
Əsmər QARDAŞXANOVA,
"Azərbaycan"
