Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli dekabrın 6-da Nizami Gəncəvi adına Daşkənd Dövlət Pedaqoji Universitetinin rektoru, professor Abdulqafor Kirgizbayevlə görüşüb.
Bu barədə AZƏRTAC-a Qərbi Azərbaycan İcmasından məlumat verilib.
Bildirilib ki, görüşdə Əziz Ələkbərli Qərbi Azərbaycan məsələsini qonağın diqqətinə çatdıraraq, Qərbi azərbaycanlıların öz tarixi torpaqlarından deportasiya olunması, bir əsrdə dörd dəfə etnik təmizləməyə məruz qalmaları və üzləşdikləri tarixi ədalətsizliklər barədə ətraflı məlumat verib. O, bu məsələnin regiondakı sülh və ədalət mexanizmlərinin əsas elementlərindən biri olduğunu qeyd edərək beynəlxalq səviyyədə daha dərindən araşdırılmasının vacibliyini vurğulayıb.
Görüş zamanı İcma sədri, həmçinin qardaş Azərbaycan və Özbəkistan xalqları arasındakı dostluq münasibətlərindən, mədəni oxşarlıqdan və tarixi bağlardan bəhs edərək, özbək dilinin Azərbaycan dilinə yaxınlığının xalqlar arasında ünsiyyəti daha da asanlaşdırdığını bildirib. Qonaq isə bu səbəbdən söhbətin tərcümə olmadan aparılmasından məmnunluğunu ifadə edib.
Əziz Ələkbərli Qarabağ torpaqlarının işğaldan azad edilməsindən sonra aparılan genişmiqyaslı bərpa işlərinə toxunaraq, məhz Özbəkistan tərəfindən Qarabağda ilk məktəbin inşa olunmasını böyük qardaşlıq rəmzi kimi qiymətləndirib. Mirzə Uluqbəy adına olan bu məktəbin Azərbaycan–Özbəkistan dostluğunun parlaq nümunəsi olduğu bildirilib.
Söhbət zamanı Əziz Ələkbərli Özbəkistanın ictimai-siyasi həyatında mühüm rol oynamış bir sıra şəxsləri, o cümlədən Maqsud Şeyxzadə kimi ziyalıları hörmətlə xatırlayıb. O, həmçinin Türk Dövlətləri Təşkilatının fəaliyyəti, Türk dünyasında inteqrasiya prosesləri və gələcək strateji hədəflər barədə fikirlərini bölüşüb.
İcma sədri ortaq türk əlifbasının artıq formalaşdığını, lakin ortaq türk dilinin müəyyən edilməsinin də gələcək əməkdaşlıq baxımından xüsusi əhəmiyyət kəsb etdiyini vurğulayıb.
Görüş zamanı Abdulqafor Kirgizbayev Ulu Öndər Heydər Əliyevin rəhbərliyi dövründə Azərbaycan–Özbəkistan əlaqələrinin hər zaman yüksək səviyyədə olduğunu, 2004-cü ildə Prezident İlham Əliyevin Özbəkistana rəsmi səfərini və böyük Azərbaycan şairi Nizami Gəncəvinin abidəsinin açılışında iştirakının hörmətlə xatırlandığını bildirib.
Söhbətin davamında Əziz Ələkbərli Özbəkistanda Qərbi Azərbaycan həqiqətlərinin tanıdılması istiqamətində tədbirlərin keçirilməsinin arzuolunan olduğunu qeyd edib və bu sahədə əməkdaşlığın genişləndirilməsinin vacibliyini vurğulayıb.
Görüşün sonunda rektor, İcma sədrinə simvolik hədiyyə təqdim edib, daha sonra görüş xatirə şəkillərinin çəkilməsi ilə başa çatıb.
İkitərəfli görüş, Azərbaycan–Özbəkistan dostluğunun daha da möhkəmlənməsinə və Qərbi Azərbaycan məsələsinin beynəlxalq platformalarda daha geniş tanıdılmasına mühüm töhfə kimi dəyərləndirilib.
