Ötən il Azərbaycanda ümumi daxili məhsulun (ÜDM) həcmi 100 milyard manatı ötüb. Bu göstərici ölkə tarixində ilk dəfə qeydə alınıb. İqtisadi fəallığın kəskin yüksəlməsinə təsir göstərən əsas səbəb isə qeyri-neft-qaz sektorunun inkişafı olub. 
Mövzu ilə bağlı Milli Məclisin deputatlarının fikirlərini öyrəndik. Onların sözlərinə görə, bu, bir daha Azərbaycanda makroiqtisadi sabitliyə nail olunduğunu sübut edir.

İqtisadi artım tempi qorunur

Milli Məclisin deputatı, İqtisadi siyasət, sənaye və sahibkarlıq komitəsinin üzvü Rüfət Quliyev bildirib ki, ötən il iqtisadi fəallıqda müşahidə edilən artım ÜDM-in də yüksəlməsinə səbəb olub: "Ölkədə pandemiyadan sonrakı dövrdə iqtisadi artım tempini qoruyub saxlaya bilmişik. Bu, xoşagələn haldır. İqtisadi artımı təmin etməklə birbaşa ÜDM-in də həcminin artmasına nail ola bilmişik. Eyni zamanda ötən ildə neftin və qazın qiymətləri də yüksək olub. Bununla yanaşı, qeyri-neft-qaz sektorunda yüksək fəallıq müşahidə edilib".
Deputatın sözlərinə görə, təcrübə göstərir ki, investisiya həyata keçirən ölkələr həm ÜDM-in artımına, həm də iqtisadi artıma nail olurlar: "Ölkəmizdə də investisiyaların həcmi artır, işğaldan azad olunmuş ərazilərimizə investisiya yatırılır. Dövlət büdcəsindən Qarabağ və Şərqi Zəngəzura indiyə qədər 6,6 milyard dollar cəlb edilib. Bu göstərici durmadan artır. Həmin vəsaitlər işğaldan azad olunmuş ərazilərdə yenidənqurma, bərpa və minalardan təmizlənmə ilə bağlı işlərə, böyük infrastruktur layihələrinə ayrılıb. 
Rüfət Quliyev deyib ki, mavi qazın ixracının 12-13 milyard kubmetri keçməsi də əhəmiyyətli işdir: "Bu artımın özü də ÜDM-in artmasına birbaşa təsir göstərir. Həmçinin qeyri-neft sektorunun, kiçik və orta sahibkarlığın inkişafı da göz önündədir. Bu onu göstərir ki, Azərbaycan iqtisadiyyatı sürətlə inkişaf edir. İqtisadi artım tempinin qorunması və vətəndaşların sosial rifah halının yüksəlməsi uğurlu siyasətin bariz nümunəsidir". 

Növbəti illərdə də artım  proqnozlaşdırılır

Milli Məclisin deputatı, İqtisadi siyasət, sənaye və sahibkarlıq komitəsinin üzvü Vüqar Bayramov deyib ki, iqtisadi artıma yalnız neft sektoru deyil, həmçinin qeyri-neft sektorunun inkişafı da ciddi təsir göstərir: "2022-ci ildə neftin qiyməti yüksək olub, həmçinin mavi qazdan əldə olunan gəlirimiz də artıb. Nəticədə neft və qaz gəlirləri ÜDM-in də artımına təkan verib".
Deputatın sözlərinə görə, ÜDM-də müşahidə edilən kəskin artımın əsas səbəbi qeyri-neft sektorundan əldə edilən gəlirlərin artmasıdır: "Ötən il qeyri-neft sektorundakı artım faiz etibarilə neft sektorundakından təxminən iki dəfə çox olub. Neft və qaz gəlirlərinin ÜDM-ə təsir göstərən əsas faktorlar olmasına baxmayaraq, 2022-ci ildə məhz qeyri-neft sahəsinin inkişafı da birmənalı şəkildə ÜDM-də kəskin artımın yaranmasına gətirib çıxarıb. Beləliklə ölkə tarixində ilk dəfə ÜDM-nin həcmi 100 milyard manatı ötüb. Proqnozlara əsasən, Azərbaycanda ÜDM-in növbəti illərdə də artımını müşahidə edəcəyik".

Nəzrin QARDAŞXANOVA,
"Azərbaycan"