Tələbə Qəbulu üzrə Dövlət Komissiyası (TQDK) 2014/2015-ci tədris ili üçün Azərbaycan Respublikasında baza ali tibb təhsili əsasında həkim-mütəxəssislərin hazırlanması məqsədi ilə rezidentura səviyyəsinə martın 30-da qəbul imtahanının birinci mərhələsini keçirəcəkdir.
Tələbə Qəbulu üzrə Dövlət Komissiyasından AzərTAc-a bildirmişlər ki, imtahanda iştirak etmək üçün ərizə qəbulu internet vasitəsilə bu il fevralın 11-dən 20-dək aparılmış və 1356 nəfər namizəd elektron ərizə doldurub təsdiq etdirmişdir. Onlardan 984 nəfəri qız, 372 nəfəri isə oğlandır.
İmtahan Bakı və Naxçıvan şəhərlərində keçiriləcəkdir. Bakı şəhərində imtahan 3 binada - Azərbaycan Tibb Universitetinin I və V tədris binalarında və Bakı Qızlar Universitetində, Naxçıvan şəhərində 1 binada aparılacaqdır. İmtahan bütün binalarda eyni vaxtda - saat 11.00-da başlanacaqdır. Bakı şəhərində 1336 namizədin, Naxçıvan şəhərində isə 20 namizədin imtahan verəcəyi nəzərdə tutulur. İmtahanların idarə olunması üçün 23 imtahan rəhbəri, 149 zal nəzarətçisi ayrılmışdır.
Namizədlər martın 19-dan etibarən öz elektron ərizələrinə daxil olaraq “Namizədin imtahana buraxılış vərəqi”ni çap edirlər.
Azərbaycan Tibb Universitetinin hərbi tibb fakültəsinin məzunları üçün rezidenturaya qəbul imtahanının hər iki mərhələsi 2014-cü ilin iyul ayında keçiriləcəkdir.
Birinci mərhələdə namizədlərin baza ali tibb təhsili istiqamətinə müvafiq olaraq qəbul proqramı əsasında baza fənləri üzrə bilikləri yoxlanılacaqdır. Rezidentura səviyyəsinə qəbul imtahanının ikinci mərhələsi iyulun 27-də keçiriləcək və ikinci mərhələyə imtahanın birinci mərhələsində topladığı bal 40-dan az olmayan namizədlər buraxılacaqlar.
İmtahanda iştirak etmək üçün namizədlər aşağıdakı sənədləri mütləq təqdim etməlidirlər: “Namizədin imtahana buraxılış vərəqəsi”ni, şəxsiyyəti təsdiq edən sənədin əslini.
Göstərilən sənədlərdən biri olmadıqda və ya sənədlər arasında uyğunsuzluq olduqda namizəd imtahana buraxılmayacaqdır.
İmtahanda namizədlərə baza fənləri üzrə 100 test tapşırığı təqdim olunur və hər bir test tapşırığının düzgün cavabı 1 (bir) balla qiymətləndirilir, səhv cavablar namizədin imtahan nəticəsinə təsir göstərmir. İmtahan suallarının cavablandırılmasına 2 saat 30 dəqiqə vaxt ayrılır.
Müsabiqə baza və ixtisas fənlərindən toplanılan balların cəminə əsasən aparılır. Müsabiqədə iştirak etmək üçün namizədin baza fənləri üzrə imtahanda topladığı test balı 40-dan, ixtisas fənləri üzrə imtahanda topladığı test balı isə 50-dən az olmamalıdır.
Rezidenturaya qəbul olunmaq üçün ixtisas seçimi qəbul imtahanının nəticələri elan edildikdən sonra aparılacaqdır. Namizədlər müəyyənləşmiş müddət ərzində elektron ərizələrinə daxil olaraq ali tibb təhsili bazasına uyğun (bitirdiyi fakültəyə müvafiq olan) ixtisasları seçib təsdiq etməlidirlər.
jpg_1765410473.jpg)
jpg_1765188547.jpg)
