Azərbaycanda əhalinin etibarlı ərzaq təminatında taxılçılıq əsas yerlərdən birini tutur. Çünki taxıl əhalinin çörək və çörək məmulatlarına olan tələbatını ödəyir.
Odur ki, bu sahənin inkişafı daim dövlətimizin diqqət mərkəzində saxlanılmaqla, onun ildən-ilə artırılması üçün müxtəlif tədbirlər həyata keçirilir. Xüsusilə torpaq mülkiyyətçilərinə çoxsaylı güzəştlər edilir.
Ölkəmizin digər rayonları kimi, Tovuzda da bu quymətli ərzaq məhsulunun istehsalında hər il yüksək nailiyyətlər əldə olunur. Bu il də rayon taxılçılarının göstəriciləri yüksəkdir.
Qeyd edək ki, rayonda cari ilin məhsulu üçün 14 min 137 hektar sahədə taxıl əkılmişdi ki, bunun da təxminən 11 min 900 hektarı buğda, 2235 hektarı arpa olmuşdur. Həyata keçirilən yüksək aqrotexniki tədbirlər nəticəsində məhsuldarlıq əvvəlki ilə nisbətən xeyli sevndiricidir. Belə ki, buğdanın hər hektarından 33,3 sentner, arpanın hər hektarından isə 33,2 sentner məhsul götürüldü. Artıq bir neçə gündür ki, arpa biçini başa çatmışdır. Dağlıq ərazilərdə biçilməmiş 2 min hektar buğda sahəsi qalmışdır ki, bunun da əsas səbəbi hava şəraiti ilə bağlıdır. Yaxın günlərdə həmin ərazilərdə də biçin başa çatdırılacaq.
Tovuz Aqrar İnkişaf Mərkəzindən verilən məlumata görə, bu il tovuzlular sahələrdən 7 min 427 ton arpa, 33 min 555 ton buğda tədarük etmişlər ki, bu da əvvəlki ildəkindən xeyli çoxdur.
Rayonda taxılçılığın inkişafında nümunə olan çoxlu təsərrüfatlar var. Hər il olduğu kimi, bu il də "Aqro Dairy" MMC, "Tovuz Aqro" MMC, Tovuz "Aqrokompleks" MMC taxıl istehsalında fərqlənmişlər. "Aqro Dairy" MMC bu il rayonda ən yüksək göstəriciyə nail olmuşdur. Hər hektardan 51,4 sentner taxıl götürən məsul məsuliyyətli cəmiyyət bu rəqəmi son hədd hesab etmir. Kollektiv gələn il bu rəqəmi yeniləmək üçün indidən hazırlıq işlərinə başlamışdır.
Qeyd edək ki, hazırda məhsulu biçilmiş sahələrdə gələn ilin bol məhsulu üçün bünövrə qoyulur. Torpaq şumlanaraq əkin üçün yararlı hala salınır.
Sabir ƏLİYEV,
"Azərbaycan"
