Böyük maarifçi Həsən bəy Zərdabi: "Yaxşı kitab çox qiymətli xəzinədir", - deyib. Kitabxanalar həmin dəyərli xəzinənin yalnız toplandığı və saxlandığı yer deyil. Eyni zamanda ondan bəhrələnmək istəyənlərin üz tutacaqları məkandır.
Bu gün bir çoxu oxucuların sayının azalmasından, xüsusilə də gənclərin kitablara marağının qaneedici səviyyədə olmamasından gileylənir. Oxucularının əksəriyyəti tələbə gənclər olan Bakı Dövlət Universitetinin Elmi Kitabxanasının direktoru Nigar İsmayılova bu məsələdə pessimist olmadığını söyləyir: "Bir şeyi nəzərə almaq lazımdır ki, internetin geniş imkanları artıq ənənəvi kitablara da təsir göstərmişdir. Belə ki, müasir dövrdə internetin zəngin informasiya ehtiyatları ilə yanaşı, kağız kitabları əvəzləyən elektron formatda kitabların, elektron kitabxana və elektron resursların meydana gəlməsi həyatın bütün sahələrinə təsir etməkdədir və qəbul etməliyik ki, bu təsirdən qaçış yoxdur. Amma bütün bunların fonunda yenə də bizim oxucuların kitabxanaya və kitablara olan marağı bizi qane edir".
Qeyd edək ki, BDU-nun Elmi Kitabxanası oxuculara xidmət işinin təşkili, oxucu tələbatının ödənilməsində ali məktəb kitabxanaları arasında ən böyük məlumat-biblioqrafiya aparatına və mükəmməl kataloq sisteminə malik olan kitabxanadır. Elmi Kitabxana Universitetin professor-müəllim heyəti, əməkdaş və tələbələri ilə yanaşı, elmi-tədqiqat işi ilə məşğul olan bütün tədqiqatçılara xidmət göstərir.
Müsahibimiz özü də 1995-1999-cu illərdə Bakı Dövlət Universitetində təhsil alıb. İnformasiya və sənəd menecmenti (Kitabxanaçılıq) fakültəsinin əyani şöbəsinin bakalavriatura pilləsini, 1999-2001-ci illərdə isə həmin fakültənin magistratura pilləsini kitabxanaşünaslıq ixtisası üzrə fərqlənmə diplomu ilə bitirib. Tarix üzrə fəlsəfə doktorudur. 
Nigar İsmayılova 2020-ci ildən BDU-nun Elmi Kitabxanasının direktoru və BDU Elmi Şurasının üzvüdür. 
Müsahibim qeyd edir ki, ümumiyyətlə, respublikamızda Prezident İlham Əliyevin siyasi iradəsinə uyğun olaraq gənclərə göstərilən dövlət qayğısının əhatə dairəsi kifayət qədər genişdir. Gənclər isə öz növbələrində dövlətin qayğısından, onlar üçün yaradılan əlverişli şəraitdən maksimum dərəcədə bəhrələnərək müstəqil Azərbaycanın inkişafı naminə böyük fəallıq nümayiş etdirirlər. 
Mütaliəyə marağın yüksək olması qədər oxumaq üçün hansı kitabların seçilməsi də əhəmiyyətlidir. BDU-nun Elmi Kitabxanasının direktoru deyir: "Oxucularımızın böyük əksəriyyətinin tələbələr olduğunu nəzərə alaraq, tam əminliklə deyə bilərəm ki, daha çox üstünlük elmi-tədris ədəbiyyatına verilir. Təbii ki, bu o demək deyil ki, bədii ədəbiyyata ehtiyac duyulmur. Kitabxanamızın fondlarında qorunan "Klassik Azərbaycan ədəbiyyatı", "Müasir Azərbaycan ədəbiyyatı", "Azərbaycan antologiyaları", "Ədəbiyyat antologiyaları", "Dünya ədəbiyyatı", "Dünya ədəbiyyatı klassikləri", "Dünya uşaq ədəbiyyatı" və s. bu kimi seriyalarda nəşr olunan kitablara da daim tələbat vardır. Ali məktəb tələbələri isə hazırda daha çox ingilis dilli kitablara maraq göstərirlər. 
- Bir zamanlar bu universitetdə təhsil alanlar lazım olan dərslikləri ya tapa bilmirdilər, ya da ana dilimizdə olmurdu. Bəs bugünkü tələbələr necə, belə problemlərlə qarşılaşırlarmı? 
Sualımızı cavablandıran Nigar İsmayılova bildirir ki, hal-hazırda fondlarımızda müxtəlif səviyyələrdə təhsil alan tələbələr üçün tədris prosesində tələb olunan dərslik və dərs vəsaitlərinin böyük əksəriyyəti mövcuddur: "Bunların içində ana dilində olanların da sayı yetəri qədərdir. Bir şeyi də vurğulamaq istəyirəm ki, Bakı Dövlət Universitetinin "Nəşr evi" universitetin professor-müəllim heyətinin elmin müxtəlif sahələrinə dair fundamental əsərlərini çap edərək kitabxanaya təqdim edir".
Kitabxananın direktoru 2000-ci illərdə artıq Elmi Kitabxanada elektron kataloq və elektron kitabxananın yaradılması işlərinə başlanıldığını deyir. Bu iş hazırda da davam etdirilir. 
Elmi Kitabxananın beynəlxalq nəşriyyatlarla əməkdaşlığı sayəsində istifadəçilər üçün 13000-dən çox elektron jurnal, 8000-ə yaxın elektron kitab və müxtəlifməzmunlu məlumat bazalarından istifadə imkanı yaradılıb. Elmi Kitabxananın oxucuları daha çox "Academic Search Premier", "MasterFILE", "GreenFILE", "Library", "İnformation Science & Technology Abstracts", "Business Source Premier", "eBooks" məlumat bazalarının elektron resurslarından istifadə edirlər.

Zöhrə FƏRƏCOVA,
"Azərbaycan"