Təbrizdə nəşr olunan “Nəsr” qəzeti və “Xəbər Farsi” informasiya agentliyi Azərbaycanın Ümummilli Lideri Heydər Əliyevə həsr olunmuş geniş məqalə dərc edib.
AZƏRTAC xəbər verir ki, Azərbaycanın Təbrizdəki baş konsulluğunun təşəbbüsü ilə Ulu Öndərin anadan olmasının 102-ci ildönümü ərəfəsində dərc olunan “Zəfərin zirvəsində. Ən yeni Azərbaycan” sərlövhəli məqalədə qeyd edilir: “Müstəqil və müasir Azərbaycanın həyatında baş verən bütün tarixi hadisələr “biz həmişə azərbaycançılıq ideyası ətrafında birləşməliyik” çağırışı ilə başladı. Dəyanətli lider uzaqgörən siyasəti, güclü iradəsi və əzmi ilə xalqın birlik, bütövlük məfkurəsini ucaltdı. Bu nailiyyət keşməkeşli tarix yaşayan bir dövlət, xalq üçün asan deyildi. Amma Ulu Öndər “Ən güclü və ən yeni Azərbaycan”ın Zəfər zirvəsində üç rəngli Bayrağı və dövlət adını imzalar sırasına əbədi həkk etdi”.
Məqalədə qeyd olunub ki, bu gün torpaqlarını Ermənistanın işğalından azad edərək ərazi bütövlüyünü, tam suverenliyini bərpa edən Azərbaycan Ulu Öndərin siyasətini rəhbər tutur. Prezident İlham Əliyevin yürütdüyü müstəqil siyasət qarşıya qoyulan bütün hədəflərin uğurla reallaşmasına yol açır. Dahi şəxsiyyətin dövlətçilik prinsipləri əsasında qurulan müstəqil Azərbaycan özünün sülh, dostluq humanizm siyasəti ilə dünya müstəvisində öz imzası seçilir.
Müəllif Ümummilli Lider Heydər Əliyevin hakimiyyətə qayıdışından sonra Azərbaycanda əldə olunan böyük nailiyyətlər barədə ətraflı məlumat verərək yazıb: “Heydər Əliyev xalqın bütövlüyü, həmrəyliyi, milli birliyi naminə bütün gücünü səfərbər etdi. Bu qayıdış həm də gələcək Zəfər yolunun sarsılmaz təməli oldu. Neft strategiyasının ilk addımı olan “Əsrin müqaviləsi” də bu qəbildəndir. Sözü gedən sənədin uğurlu taleyi ölkəmizə marağı artırdı. O, şəxsi nüfuzu, uzaqgörən siyasəti ilə dünyanın iri neft şirkətlərini Azərbaycanla əməkdaşlığa cəlb etdi”.
Yazıda Ulu Öndərin hələ sovet dövründə Azərbaycanda həyata keçirdiyi quruculuq işləri, daha sonra Moskvada Siyasi Büronun üzvü və SSRİ Nazirlər Soveti sədrinin birinci müavini vəzifəsində çoxşaxəli fəaliyyəti barədə oxuculara geniş məlumat verilib. Vurğulanıb ki, Azərbaycanın bugünkü uğurları məhz onun canından artıq sevdiyi Vətəni, xalqı üçün göstərdiyi xidmətlərin nəticəsidir.
Daha sonra təbrizli oxuculara Ulu Öndərin kursunun davamçısı olan Prezident İlham Əliyevin rəhbərliyi ilə həyata keçirilən nəhəng transmilli neft-qaz, infrastruktur və nəqliyyat layihələri haqqında məlumat verilib.
Məqalədə qeyd olunub ki, “Şuşasız Qarabağ, Qarabağsız isə Azərbaycan yoxdur!” deyən dahi şəxsiyyətin arzularını Ali Baş Komandan İlham Əliyev özünün siyasi iradəsi və güclü məntiqi ilə yerinə yetirdi. Dövlətimiz dünyaya sülh, sabitlik, qarşılıqlı əməkdaşlıq, dostluq mesajları ilə çağırış etdi. Ölkəmiz regionda sabitlik, dünyada iqtisadi dirçəliş əlaqələri ilə yeni inkişaf konsepsiyasını təqdim etdi. Hazırda Azərbaycan regionda sülh, inkişaf və tərəqqi nümayiş etdirir. Bunu Qarabağda aparılan “Böyük qayıdış” proqramı da təsdiqləyir. Bu gün Qarabağ beynəlxalq görüşlərə, rəsmi və mədəni tədbirlərə, festivallara ev sahibliyi edir. Azərbaycan xalqı azad və qədim torpaqlarında əsrin tarixi anlarını yaşayır. Buna dünya ictimaiyyəti də şahidlik edir.
Yazının sonunda vurğulanıb: “Azərbaycan dövlətinin qurucusu, görkəmli siyasi və dövlət xadimi Heydər Əliyev irsinin öyrənilməsi, araşdırılması, gələcək nəsillərə çatdırılması qalib ölkənin müstəqillik tarixinin gələcəyi baxımından önəmlidir. Dahi şəxsiyyətin xatirəsi, gördüyü işlər, xalqımız qarşısındakı misilsiz xidmətləri böyük bir fədakarlıqdır”.
