"Yekaterinburqda öldürülən həmvətənlərimizin ekspertiza nəticələri açıqlanıb
İyunun 27-də Yekaterinburq şəhərində Rusiyanın Federal Təhlükəsizlik Xidməti azərbaycanlıların yaşadığı evlərə basqın həyata keçirib.
Basqın nəticəsində iki azərbaycanlı öldürülüb, bəziləri ağır bədən xəsarətləri nəticəsində yaralanıb, 9 nəfər isə saxlanılıb. İyunun 28-də Azərbaycanın Xarici İşlər Nazirliyi bəyanat yayaraq hadisə ilə bağlı dərin narahatlığını ifadə edib. "Rusiyanın məsələ ilə bağlı təxirəsalınmaz araşdırılma aparmasını və bu qəbuledilməz zorakılığı törədənlərin qısa müddət ərzində məsuliyyətə cəlb edilməsini gözləyirik", - deyə bəyanatda vurğulanıb.
İyunun 30-da həmyerlilərimizin meyitləri təyyarə ilə ölkəmizə gətirilərək Məhkəmə-Tibbi Ekspertiza və Patoloji Anatomiya Birliyinə daxil olub, xüsusi komissiya tərəfindən müayinə edilib. Müayinənin nəticələri ilə bağlı iyulun 1-də keçirilən mətbuat konfransında Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin baş direktoru Ədalət Həsənov deyib ki, qətlə yetirilən qardaşlar iti alət və odlu silahla yox, küt alətlə vurulublar: "Biz ekspertiza zamanı 1966-cı il təvəllüdlü Hüseyn Səfərovun bədənində çox sayda xarici və daxili travma aşkarladıq. Sümüklərin yerdəyişmiş sınığı var, döş qəfəsi deformasiyaya uğrayıb, asimmetrikdir. Sol gözətrafı nahiyədə 14x12 santimetr ölçüdə hematoma, üst və alt dodaqların selikli qişası qançırlı, alnın sol və sağ qaşüstü nahiyəsində sıyrıqlar, döş qəfəsinin arxa səthində, xayalıqda, hər iki əlin arxasında qançırlar var. Sol bel nahiyəsinin köndələn istiqamətli sıyrığı, sol budun iç səthinin 17x2,5 sm ölçüdə zolaqşəkilli sıyrığı mövcuddur. Meyit daxili müayinə olunub. Başın dərisinin iç səthində geniş qansızmalar var. Məhkəmə-Tibbi Ekspertiza və Patoloji Anatomiya Birliyinin gəldiyi nəticəyə əsasən, Hüseyn Səfərovun ölüm səbəbi aldığı çoxsaylı xəsarət nəticəsində inkişaf edən posttravmatik və posthemorragik şokdur".
Baş direktor onu da bildirib ki, bir dəfə müayinə edilmiş meyitin ikinci dəfə təkrar ekspertizası çətin olur: "Meyitləri müayinə etməmişdən əvvəl onların ölüm haqda tibbi şəhadətnamələrini təqdim etdilər. Sverdlovsk vilayətinin verdiyi ölüm haqda şəhadətnaməsində Hüseyn Səfərovun ölüm səbəbi travma göstərilib".
Ədalət Həsənovun sözlərinə görə, 1970-ci il təvəllüdlü Ziyəddin Səfərovun Rusiya tərəfindən göndərilən tibbi ekspertizasında isə kəskin ziddiyyətlər müşahidə olunur. Belə ki, ekspertiza nəticəsində ölümün xəstəlikdən baş verdiyi qeyd edilib. Ona ürəyin kəskin işemik xəstəliyi diaqnozu qoyulub. Bu isə həqiqəti əks etdirmir: "Meyitin xarici müayinəsi zamanı çoxlu xəsarətlər, qançırlar, sıyrıqlar, hematomalar müşahidə etdik. Bədən başdan-başa hematoma idi. Hər iki gözün ağlı qişasında, sağ alın və gicgah nahiyələrində qansızmalar, sağ gözün üst və alt qapaqlarında, boyunun sol və sağ yarısında, döş qəfəsinin sol qoltuqaltı nahiyəsində qançırlar, sol çiyinüstü nahiyədə qançırlı sıyrıqlar müşahidə edilib. Döş qəfəsi deformasiyalı və asimmetrikdir. Döş qəfəsinin sağ yarısının yan səthində zolaqşəkilli sıyrıqlar vardı. Qarnın sağ yan səthində və qalça qanadı hüdudunda qançırlı sıyrıqlar, bud, baldır və topuq nahiyələrinin sıyrıqları və qançırları, xayalığın dərisində qeyri-müəyyən formalı qırmızımtıl, göyümtül rəngli qançırlar müşahidə olunub. Müayinə zamanı başın dəri örtüyünün iç səthinə, baş beynin sərt və yumşaq qişalarına qansızmalar, döş qəfəsinin küt travması, sıxılması aşkarlandı. Ən çox döş qəfəsində, xüsusilə iki xətt üzrə çoxsaylı sınıqlar vardı. Sol tərəfdə, eləcə də paravertebral onurğanın sağ tərəfi boyunca da sınıqlar müşahidə edildi. Bu, sol tərəfdən güclü sıxılmanın olduğunu göstərir. Solda ön tərəfdə, sağda arxa tərəfdə bütün qabırğaların hamısı sınmışdı. Kobud yerdəyişən sınıqlar ağciyəri zədələyib. Hətta qabırğalardan birini tapa bilmədik, onu yəqin Rusiyada müayinə zamanı götürüblər. Beləliklə, Ziyəddin Səfərov çoxsaylı xəsarətlərlə əlaqədar baş vermiş posttravmatik şok nəticəsində ölüb", - deyə baş direktor bildirib.
Ülkər XASPOLADOVA,
"Azərbaycan"
jpeg_1765897678.jpeg)
