Türk Dövlətləri Təşkilatına (TDT) üzv ölkələrin birgə hərbi təlimlər keçirməsi təşəbbüsünün əhəmiyyəti ondan ibarətdir ki, bu, təşkilat tarixində ilk belə praktiki hərbi əməkdaşlıq formatı olacaq. Mövcud qlobal şəraitdə bu addım son dərəcə aktual və zəruridir.
Bu fikirləri AZƏRTAC-a açıqlamasında qazaxıstanlı siyasi şərhçi Zamir Karajanov deyib.
Onun sözlərinə görə, bu gün dünya getdikcə proqnozlaşdırılması mümkün olmayan mərhələyə daxil olur, dövlətlərin suverenliyi, ərazi bütövlüyü və daxili işlərinə qarışmama prinsiplərini ehtiva edən beynəlxalq hüquq isə böyük güclərin fəaliyyəti nəticəsində faktiki olaraq dəyərsizləşir: “Belə bir şəraitdə regionda qarşılıqlı etimada əsaslanan təhlükəsizlik mərkəzinin formalaşması artıq reallıqdır”.
Z.Karajanov qeyd edib ki, TDT çərçivəsində əməkdaşlıq çoxdan ticarət və investisiya müstəvisindən kənara çıxaraq müdafiə sektorunu da əhatə edir: “Bu gün artıq kollektiv təhlükəsizliyin ayrı-ayrı elementləri fəaliyyət göstərir. Terrorizmə, separatizmə və ekstremizmə qarşı birgə mübarizə, kəşfiyyat məlumatlarının mübadiləsi, hərbi texnikanın standartlaşdırılması istiqamətində işlər aparılır”.
Siyasi şərhçi vurğulayıb ki, bu məsələlər TDT-yə üzv dövlətlərin əksəriyyətinin, Türkiyə istisna olmaqla, açıq dənizlərə birbaşa çıxışının olmaması fonunda daha da aktuallaşır. Coğrafi baxımdan qapalı mövqedə yerləşən ölkələr quru logistikasından və nəticə etibarilə bir-birindən daha çox asılıdır. Fors-major vəziyyətlərdə, xüsusilə təcili hərbi təchizat tələb olunduqda, təminat yalnız təşkilata üzv ölkələrin ümumi sərhədləri üzərindən həyata keçirilə bilər.
“Bu səbəbdən TDT ölkələri arasında hərbi yüklərin maneəsiz tranzitini təmin edən hüquqi mexanizmlərin yaradılması vacibdir. Məhz bu kontekstdə Orta Dəhlizin inkişafı sırf iqtisadi layihə olmaqdan çıxaraq, milli təhlükəsizliyin təmin olunması baxımından həyati əhəmiyyət kəsb edən məsələyə çevrilir”, - deyə Zamir Karajanov bildirib.
O sonda qeyd edib ki, birgə hərbi təlimlər və təhlükəsizlik sahəsində institusional əməkdaşlıq TDT-ni regionda sabitlik yaradan real güc mərkəzinə çevirən əsas amillərdən biri olacaq.
