Xocalı soyqırımının 34-cü ildönümü ilə əlaqədar ABŞ-nin Kolumbiya Universitetində anım tədbiri keçirilib.
Bu barədə AZƏRTAC-a Diasporla İş üzrə Dövlət Komitəsindən məlumat verilib.
Bildirilib ki, Dövlət Komitəsinin dəstəyi, Azərbaycan-Amerika Gənclər Federasiyasının birgə təşkilatçılığı ilə keçirilən tədbirdə hər iki ölkənin Dövlət himnləri səsləndirilib, Xocalı soyqırımı qurbanlarının əziz xatirəsi bir dəqiqəlik sükutla yad edilib.
Azərbaycanın BMT yanında daimi nümayəndəsi, səfir Tofiq Musayev çıxışında Xocalı soyqırımı ilə bağlı tarixi faktlara diqqət çəkərək, beynəlxalq ictimaiyyətin bu faciəyə hüquqi-siyasi qiymət verməsinin vacibliyini vurğulayıb.
Nyu-Yorkda fəaliyyət göstərən Milli Musiqi və Qlobal Mədəniyyət Cəmiyyətinin rəhbəri, Amerika-Azərbaycan Təşkilatları Alyansının rəhbəri Nərgiz Əlyarova xocalılılara qarşı törədilən amansız cinayətlərdən bəhs edib. Faciənin soydaşlarımızın yaddaşında silinməz iz qoyduğunu bildirib.
BMT-nin keçmiş sözçüsü və “Al-Quds Al-Arabi” qəzetinin BMT bürosunun rəhbəri Abdelhamid Siyam Xocalı həqiqətlərindən, sülh və humanizm dəyərlərinin təşviqinin əhəmiyyətindən danışıb.
Anım tədbirində Nyu-Yorkda fəaliyyət göstərən “My Way” Uşaq-Gənclər Yaradıcılıq İnkişaf Mərkəzinin şagirdlərinin Xocalı hadisələrinə həsr etdikləri rəsmləri sərgilənib. Həmçinin Mərkəzin mədəniyyət üzrə direktoru, azərbaycanlı rəssam-heykəltəraş Emin Quliyevin hazırladığı "Xocalı harayı" və Nyu-Yorkda yaşayan azərbaycanlı rəssam Çingiz Mahir Musayevin "Xocalı" kompozisiyaları nümayiş olunub.
jpg_1772663158.jpg)
19 (1)jpg_1771885865.jpg)
