10 qadın fermerə müxtəlif təyinatlı avadanlıqlar verilmişdir
Kənd Təsərrüfatı Nazirliyi tərəfindən "Paşa Holdinq"in dəstəyi ilə həyata keçirilən "Aqrar fəaliyyətli Azərbaycan qadınları" (AFAQ) və "Şəhərdən kəndə" layihələri çərçivəsində Göygöl rayonunda kənd təsərrüfatı sahəsində fəaliyyət göstərən bir qrup fermerə dəstək verilmişdir.
Layihələrin təqdimatı ilə bağlı rayonun Şəhriyar kəndində yerləşən Aqroturizm təsərrüfatında görüş keçirilmişdir. Kənd təsərrüfatı nazirinin müavini İlhamə Qədimova, Göygöl Rayon İcra Hakimiyyətinin başçısı Elvin Paşayev, Kənd Təsərrüfatı Nazirliyinin tabeliyindəki "Aqrar Tədarük və Təchizat" ASC-nin İdarə Heyətinin sədri Aqil Quliyev və fermerlərin iştirak etdikləri tədbirdə fermer İftixar Hüseynovun təsərrüfatı haqqında ətraflı məlumat verilmişdir. Qeyd edilmişdir ki, təsərrüfat, əsasən, aqroturizm, bağçılıq və quşçuluq, eləcə də bostançılıq üzrə fəaliyyət göstərir. Təsərrüfatın sahəsində göl də mövcuddur. "Şəhərdən kəndə" layihəsi çərçivəsində yenidənqurma işlərinin aparıldığı təsərrüfatda uşaq meydançası yaradılmış, təndir və ev quşları saxlamaq üçün hin inşa edilmişdir. Xidmət səviyyəsinin artırılması məqsədi ilə təsərrüfat bir sıra avadanlıq və ləvazimatlarla (manqal, oturacaqlar, lövhələr və s.) təmin olunmuşdur.
Tədbirdə 10 qadın fermerə əvvəlcədən aparılan sorğu əsasında AFAQ layihəsi çərçivəsində avadanlıqlar verilmişdir. Qırıqlı, Mollacəlilli, Çaylı, Quşqara, Çaykənd, Nadel və Yeni Zod kəndlərindən olan xanım fermerlər yemüyüdən avadanlıq, arı yeşikləri, südsağan aparat, südçəkən maşın və balsüzənlə təmin olunmuşlar.
Onu da bildirək ki, layihə çərçivəsində bu günə qədər yerli və əcnəbi mütəxəssislər tərəfindən həyata keçirilən təlimlərdə 221 təsərrüfat sahibi iştirak etmişdir. Ümumilikdə isə layihəyə qoşulmaq üçün 200-dən artıq aqrar sahibkar qeydiyyatdan keçmişdir. Baxış keçirilən 177 fermer təsərrüfatından 130-u aqroturizm fəaliyyəti üçün uyğun hesab edilmişdir.
Məlumat üçün bildirək ki, AFAQ layihəsi qadınların məşğulluğunun, onların informasiya, resurs və bazarlara çıxış imkanlarının, eyni zamanda qadınlar tərəfindən idarə olunan aqrar biznes subyektlərinin sayının artırılmasına və regionlarda sosial-iqtisadi rifahın yaxşılaşdırılmasına xidmət edir. Bu günədək layihəyə 1310-a yaxın müraciət daxil olmuş, layihə kriteriyalarına cavab verən 234 müraciətçinin təsərrüfatına baxış keçirilərək qiymətləndirmə sorğusu aparılmışdır. Layihənin tələblərinə cavab verən ümumilikdə 161 təsərrüfat sahibinə müvafiq avadanlıqlar və aktivlərlə dəstək verilmişdir. Layihə çərçivəsində 218 qadın fermer nəzəri və praktik təlimlərdə iştirak etmişdir.
Sabir ƏLİYEV,
"Azərbaycan"
jpeg_1766151155.jpeg)
