VIII "Muğam" Televiziya Müsabiqəsinə Şuşa şəhərində yekun vuruldu

Onu əbəs yerə Azərbaycan musiqisinin beşiyi adlandırmırlar. Bu şəhərin hər daşına, qayasına, ab-havasına muğam  hopub. O muğam ki, xalqımızın təlatümlü keçmişinin sədaları əbədiləşib onda. Bu günümüzün arzularına qol-qanad, ümidli sabahlarımızdan soraq verir, dinləyənlərə əsrarəngiz duyğular, heyrətamiz hisslər bəxş edir. Sevincimizə ortaq, dərdimizə şərik, yaralarımıza məlhəm olur...

Azad Şuşa tarixi günlər yaşayır

2020-ci ilin 8 noyabrı Azərbaycan tarixinə Zəfər günü kimi yazıldı. Prezident, Ali Baş Komandan İlham Əliyev xalqa müraciətində dedi: "İyirmi səkkiz il yarım işğal altında olan Şuşa azad edildi! Şuşa indi azaddır! Biz Şuşaya qayıtmışıq! Biz bu tarixi Qələbəni döyüş meydanında qazandıq. 2020-ci il noyabrın 8-i Azərbaycan tarixində əbədi qalacaqdır. Bu tarix əbədi yaşayacaq. Bu, bizim şanlı Qələbəmizin, zəfərimizin günüdür!"

Erməni işğalında qaldığı illərdə Şərqi Zəngəzurun və Qarabağın digər əraziləri kimi Şuşa şəhərinin də başı çox müsibətlər çəkdi. İndi isə azad Şuşanın yeni növrağı başlayıb. 2021-ci il mayın 7-də Prezident İlham Əliyev "Şuşa şəhərinin Azərbaycanın mədəniyyət paytaxtı elan edilməsi haqqında" Sərəncam imzaladı. 2022-ci ili isə dövlət başçısı "Şuşa ili" elan etdi. Nəinki Şuşada, bütün ölkə miqyasında "Şuşa ili" çərçivəsində bir-birindən maraqlı, yaddaqalan, möhtəşəm tədbirlər düzənlənir.

Şuşa qısa müddətdə sürətlə inkişaf edir. Az vaxtda inşa edilən Zəfər yolu tarixi torpaqlarımıza qayıdışımızın ilk əlaməti oldu. Uzun ayrılıqdan sonra bu qədim tarixi şəhərimiz öz əzəli və əbədi sakinlərinə qucaq açdı.

Şuşada tikinti, quruculuq işləri uğurla davam edir, tarixi, mədəni, dini abidələrin bərpası aparılır. Artıq Bülbülün Ev-Muzeyi təmir edilib. Üzeyir Hacıbəylinin Ev-Muzeyinin təmiri başa çatmaqdadır. Üç məsciddə təmir-bərpa işləri həyata keçirilir. Bir sözlə, 2020-ci il noyabrın 8-də Prezident İlham Əliyevin Şuşanın işğaldan azad olunması ilə əlaqədar xalqa müraciətində dediyi "Şuşa, biz səni dirçəldəcəyik!" - sözləri reallığa çevrilir.

Dünyaya səs salan tədbirlərin keçirildiyi məkan

1992-ci ildə təcavüzkar ermənilərin işğalına məruz qalanadək bu şəhər çox möhtəşəm təbirlərin keçirildiyi məkan kimi də tanınırdı. İşğala məruz qalması ilə Şuşada düzənlənən silsilə tədbirlər də dayandırıldı. Azərbaycan Prezidenti, Silahlı Qüvvələrin Ali Baş Komandanı İlham Əliyev Şuşanın azad edilməsi münasibətilə xalqa müraciətində əmin etdi ki, Qarabağın tacı olan bu şəhər tezliklə dirçəldiləcək, özünün əvvəlki şöhrətini qaytaracaq. Artıq Şuşa həmin günlərini yaşayır.

Azərbaycanın mədəniyyət paytaxtı bu dəfə də musiqisevərləri, muğamsevərləri xoş ovqatla qarşılayıb. Avqustun 5-də Şuşa daha bir möhtəşəm tədbirə evsahibliyi etdi. Heydər Əliyev Fondunun dəstəyi, Mədəniyyət Nazirliyi və Azərbaycan Televiziyasının təşkilatçılığı ilə keçirilən VIII "Muğam" Televiziya Müsabiqəsinə musiqi beşiyində yekun vuruldu. Müsabiqənin finalı və qala-konserti Şuşada təşkil olundu. Belə ki, final gecəsi avqustun 5-də keçirildi.

Finala tanınmış sənət adamları, mədəniyyət və incəsənət xadimləri dəvət olunmuşdu. Final gecəsinin açılışını Xalq artisti Mənsum İbrahimov etdi. Sonra iştirakçıların ifaları dinlənildi, münsiflər heyətinin məşvərətindən sonra qaliblər elan olundu.

Müsabiqənin finalı Bülbülün Ev-Muzeyinin həyətində təşkil olundu.

Qeyd edək ki, "Muğam" Televiziya Müsabiqəsi Heydər Əliyev Fondunun uğurlu layihələrindən biridir. 2005-ci ildən başlanan muğam müsabiqəsi 8-ci dəfədir ki, gənc muğam ifaçılarına öz istedad və bacarıqlarını geniş auditoriyadan nümayiş etdirmək imkanı verir. İndiyədək keçirilən muğam müsabiqələri iştirakçılarının bir çoxu ölkəmizdə, eləcə də onun hüdudlarından kənarda muğam sənətimizi layiqincə təmsil və təbliğ edirlər.

2005-ci ildən etibarən keçirilən "Muğam" müsabiqəsinin builki özəlliyi yarışmaya azyaşlı muğam ifaçılarının da qatılması və mükafatlar uğrunda mübarizə aparması olub.

VIII "Muğam" Televiziya Müsabiqəsinin seçim turları aprelin 9-da başlanıb, müsabiqə Ağdam, Füzuli və digər işğaldan azad olunmuş ərazilərlə yanaşı, bütün regionları əhatə edib. Mayın 10-da yarışmaya start verilib. Müsabiqə üç ay müddətində həftədə iki dəfə olmaqla Azərbaycan Televiziyası vasitəsilə canlı yayımlanıb.

Finalın Şuşada keçirilməsi VIII "Muğam" Müsabiqəsinin məhz "Şuşa ili"nə təsadüf etməsi ilə bağlıdır. Muğamın beşiyi olan mədəniyyət paytaxtımızda yarışmaya yekun vurulması "Şuşa ili"nə töhfədir. Eyni zamanda bu tədbirlər Şuşanın həsrətini çəkdiyi musiqili, muğamlı günlərinə dönüşüdür.

Zöhrə FƏRƏCOVA,

"Azərbaycan"