2–5 dekabr tarixlərində İran İslam Respublikasının Məşhəd şəhərində Asiya Parlament Assambleyasının (APA) Siyasi məsələlər üzrə daimi komitəsinin iclası keçirilib. İclasda Azərbaycan Respublikası Milli Məclisinin APA-dakı nümayəndə heyətinin rəhbəri Rizvan Nəbiyev iştirak edib.
İclasın açılış mərasimində İran İslam Şurası Məclisinin sədri Məhəmməd Baqer Qalibaf, APA-nın baş katibi Məhəmməd Rza Məcidi, Milli Məclisin APA-dakı nümayəndə heyətinin rəhbəri Rizvan Nəbiyev və Xorasan Rəzəvi vilayətinin Baş Qubernatoru Qolamhüseyn Moazzəffəri çıxış ediblər.
Bu barədə qəzetimizə açıqlama verən Rizvan Nəbiyev bildirib ki, çıxışında parlament diplomatiyasının artan əhəmiyyətini vurğulayaraq Milli Məclisin sədrliyi dövründə APA-nın fəaliyyəti barədə məlumat verib. Deputat deyib: “Bugünkü mürəkkəb qlobal mühitdə parlament diplomatiyası beynəlxalq münasibətlər sistemində multilateralizmin təşviqi üçün mühüm əhəmiyyət kəsb edir. APA kimi parlament assambleyaları həm regional, həm də qlobal səviyyədə qarşıda duran çağırışların həllində aparıcı qurumlardan birinə çevrilməkdədir”.
Deputat həmçinin, Azərbaycan Prezidenti İlham Əliyevin sülh gündəliyi və regionda yaranmış yeni siyasi reallıq barədə danışıb. Xüsusilə vurğulayıb ki, onilliklər ərzində ilk dəfə olaraq Cənubi Qafqazda de-fakto sülh bərqərar edilmişdir. Azərbaycanın qələbəsi regionada yeni siyasi reallıq yaratmaqla Asiya ilə Avropa arasında, eləcə də Asiya ölkələri arasında iqtisadi əməkdaşlığın genişlənməsi üçün yeni imkanlar yaradıb.
Rizvan Nəbiyev Zəngəzur dəhlizinin Orta dəhlizin vacib seqmenti kimi əhəmiyyətindən danışaraq, onun Şərq-Qərb və Şimal-Cənub nəqliyyat-ticarət əlaqələrinin intensivləşməsindəki potensial rolunu diqqətə çatdırıb. Bildirib ki, Şərq-Qərb və Şimal-Cənub dəhlizləri kimi əlaqələndirici layihələr Azərbaycan ərazisindən keçir. Azərbaycan tərəfi əmindir ki, Zəngəzur dəhlizi yaxın zamanda həmçinin Şimal-Cənub dəhlizinin mühüm seqmentinə çevriləcək və bu da sülhün, çoxtərəfli tərəfdaşlığın möhkəmlənməsinə töhfə verəcəkdir. Zəngəzur dəhlizi Azərbaycanın sərhədlərinin şərqində, qərbində, şimalında və cənubunda yerləşən yaxın və uzaq qonşularına fayda gətirəcəkdir.
Rizvan Nəbiyev çıxışında Azərbaycan-İran əməkdaşlığının iki və çoxtərəfli platformalarda inkişafından danışaraq, 2025-ci il ərzində İran Prezidenti Məsud Pezeşkianın Azərbaycana etdiyi səfərlərin əhəmiyyətini qeyd edib.
Milli Məclisin deputatı çıxışını Prezident İlham Əliyevin BMT Baş Assambleyasının 80-ci sessiyasında səsləndirdiyi fikirlərlə tamamlayıb:
“Son illərin nailiyyətləri yalnız Azərbaycanın qələbəsi və uğuru deyil. Onlar həm də göstərir ki, beynəlxalq hüquq sonda mütləq üstün olmalıdır. Bizim baxışımız aydındır: beynəlxalq hüquqa əsaslanan, dövlətlərin daxili işlərinə qarışmamaq prinsipini, qarşılıqlı hörmət və əməkdaşlığı özündə ehtiva edən sülh və inkişaf.
Gəlin birlikdə ikili standartların olmadığı, ədalətin selektiv xarakter daşımadığı, hüququn aliliyinə hörmət göstərildiyi və sülhün yalnız sözlərlə deyil, əməli addımlarla təmin olunduğu bir dünya quraq”.
Rəşad CƏFƏRLİ,
«Azərbaycan»
