Neftçalada Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və "Kür-Xəzər" Xeyriyyə İctimai Birliyinin təşkilatçılığı ilə "Ənənələrə sadiqlik, israfdan uzaq" layihəsi çərçivəsində toy və yas mərasimlərində israfçılığın azaldılması və milli-mənəvi dəyərlərin qorunmasına həsr olunmuş maarifləndirici tədbir keçirilib.
Tədbirdə çıxış edən "Kür-Xəzər" Xeyriyyə İctimai Birliyinin sədri və layihə rəhbəri Akif Kərimov mərasimlərdə həddindən artıq israfçılıq məsələsinə diqqət çəkərək xüsusilə yas mərasimlərinin mahiyyətindən uzaqlaşdırılmamasının vacibliyini bildirib. Yas məclislərində təşkil olunan təmtəraqlı süfrələr əvəzinə sadə yanaşmanın tətbiqini vacib sayan A.Kərimov həmin vəsaitlərin abadlıq, təhsil, yol və digər sosial infrastruktur layihələrinə yönəldilməsinin icma üçün daha faydalı olduğunu qeyd edib. Şadlıq mərasimlərindəki qida israfına da toxunan layihə rəhbəri vətəndaşları resurslardan daha qənaətlə istifadə etməyə çağırıb.
Kulturoloq Əbülfəz Babazadə cəmiyyətdə mənfi adətlərə qarşı yalnız təbliğatın kifayət etmədiyini, insanlarda mənəvi-mədəni immunitetin formalaşdırılmalı olduğunu bildirib. O, toyların maddi yükə çevrilməməli olduğunu, xarici təcrübələrdən milli dəyərlərə uyğun şəkildə yararlanmağın və yaslarda təmtəraq əvəzinə ehtiyacı olanlara əl tutmağın vacibliyini diqqətə çatdırıb.
"İnformasiya və sosial təşəbbüslərə dəstək" İctimai Birliyinin sədri Cəsarət Hüseynzadə isə mərasimlərdəki israfçılığın qarşısının alınmasının yalnız dövlətin deyil, bütün cəmiyyətin, ziyalıların və din xadimlərinin ortaq vəzifəsi olduğunu vurğulayıb. O, ehsanın əleyhinə olmadıqlarını, lakin onun ziyafətə çevrilməsinin və ailələrin borca düşməsinin yolverilməzliyini, imkanlı şəxslərin sadə məclislərlə nümunə olmalı olduğunu qeyd edib.
Çıxış edən digər ziyalılar, din xadimləri və ağsaqqallar da dəbdəbəli məclislərin cəmiyyətə vurduğu maddi-mənəvi zərərlərdən söz açıblar. Vurğulayıblar ki, israfçılıqla mübarizədə ilk növbədə nüfuzlu şəxslər nümunə göstərməlidirlər. Qeyd olunub ki, toylarda qida tullantılarının qarşısı alınmalı, yas mərasimləri isə nümayişkaranə təmtəraqdan azad edilərək ilkin mahiyyətinə qaytarılmalıdır.
Sonda iştirakçıları maraqlandıran suallar cavablandırılıb, mövzu ətrafında qarşılıqlı müzakirələr aparılıb.
S.QUBADOĞLU,
"Azərbaycan"
