Festivallar xalqların həyatında böyük mədəni hadisədir. Dünyada elə şəhərlər var ki, adı məhz orada keçirilən festivalların adları ilə bağlıdır. İslam dünyasının mədəniyyət paytaxtı Şuşa şəhərində keçirilən VII "Xarıbülbül" Beynəlxalq Musiqi Festivalı "Şuşa - islam dünyasının mədəniyyət paytaxtı 2024"də tarixi əhəmiyyəti və rəngarəngliyi ilə dünyanın diqqət mərkəzini cəlb edən əsl mədəniyyət hadisəsi idi.
Dünyanın bir çox ölkəsindən çoxsaylı musiqiçilərin iştirak etdikləri bu dostluq və musiqi bayramı mədəni irsimizin zəngin ənənələrinin qorunub saxlanılması ilə yanaşı, müxtəlif ölkələri təmsil edən musiqiçilərə ünsiyyət və əməkdaşlıq üçün əlverişli şərait yaradaraq mədəniyyətlərarası dialoqun möhkəmləndirilməsinə töhfə verir.
Şuşa yalnız məkan baxımından əzəmətli dağların zirvəsində qərar tutmayıb. Şuşa həm də bütünlüklə Qafqazda musiqinin paytaxtı, təsviri sənətin məkanı, Azərbaycan xalçasının vətəni, fikir və şairlər yurdu olması ilə zirvədə qərar tutan bir şəhərdir.
Şuşa dünyada bir mədəniyyət ocağı kimi tanınsa da, həm də qəhrəmanlıq rəmzidir, zəfər rəmzidir və sülhün rəmzidir.
VII "Xarıbülbül" Beynəlxalq Musiqi Festivalında qonaqları səmimiyyətlə salamlayan Prezident İlham Əliyev vurğulamışdır: "Builki "Xarıbülbül" festivalı bu hadisəyə - Şuşanın islam dünyasının mədəniyyət paytaxtı elan olunmasına həsr edilib. Bu gün bir çox müsəlman ölkələrinin kollektivləri bizim üçün müqəddəs olan Cıdır düzündə öz məharətlərini ifadə edəcəklər. Bu, birlik bayramı olacaq, bu, həmrəylik bayramı olacaq".
Şuşa 2021-ci ildə Azərbaycanın mədəniyyət paytaxtı, 2023-cü ildə türk dünyasının mədəniyyət paytaxtı seçildi. Dünyada az şəhər tapılar ki, üç il mədəniyyət paytaxtı adına layiq olsun. Bu şəhər 2024-cü ilin bu günündə isə İslam dünyasının mədəniyyət paytaxtı kimi qürurverici bir statusa sahiblənib.
VII "Xarıbülbül" Beynəlxalq Musiqi Festivalının açılışında çıxış edən ICESCO-nun Baş direktoru Salim bin Məhəmməd əl-Malik Şuşa və şuşalıları belə təsvir etdi: "Şuşa paklıq, saflıq və xoş ab-hava şəhəridir. Şəhərin adı da elə buradan gəlir. Bizlərdən kimsə dünyada adı saflığa və təmizliyə uyğun gələn başqa şəhər tanıyırmı? Buranın havası təmiz, insanların hissləri pakdır".
İşğaldan azad olduğu gündən Şuşa dünyada sülh, əmin-amanlıq, musiqi və dostluq şəhəri ənənəsini davam etdirir. 32 ildən sonra şuşalıların doğma yurdlarına qayıdışı da festival iştirakçılarına ruh verirdi. Sanki doğma insanlarının nəfəsini duyan dağların da gözləri gülürdü. ICESCO-ya üzv ölkələrin bayraqları ilə 27 Qarabağ atından ibarət süvari dəstənin Cıdır düzünə daxil olması isə coşqunu daha da artırdı.
Heydər Əliyev Fondunun və Mədəniyyət Nazirliyinin təşkilatçılığı ilə keçirilən builki festivalın proqramı ifaçıların və repertuarın zənginliyi, fərqli təqdimatlar ilə seçilirdi. Builki festival ICESCO-ya üzv ölkələrin ifaçıları və yaradıcı kollektivlərinin yer alması ilə fərqlənirdi. Festivalda müxtəlif ölkələrdən məşhur ifaçılar - Azərbaycandan Xalq artistləri Arif Babayev, Polad Bülbüloğlu, Zeynəb Xanlarova, Gülyanaq Məmmədova, Zülfiyyə Xanbabayeva, Sevda Ələkbərzadə, Əməkdar artist Rəşad İlyasov, Qazaxıstandan Əməkdar artist Əlişir Kərimov, Qvineyadan Aboubakar Silla, Özbəkistandan Xalq artisti Nəsibə Abdullayeva, Türkiyədən Hüsnü Şenlendirici, həmçinin "Aşıqlar qrupu", Azərbaycan Dövlət Rəqs Ansamblı, "Natiq" ritm qrupu, Birləşmiş Ərəb Əmirliklərindən "Almazyood", İndoneziyadan "Sendja Community", Qətərdən "Qılınc rəqqasları", Mərakeşdən "Tizwit" qrupları, Özbəkistandan "Navbahor" Mahnı və Rəqs Ansamblı, Türkiyədən "Anadolu atəşi" rəqs qrupu və digərləri çıxış etdilər. Konsert iştirakçılarının ifasında festivalı rəmzi olaraq təcəssüm etdirən "Səsin gəlsin, xarıbülbül" mahnısı ilə Şuşada yekunlaşan VII Beynəlxalq Musiqi Festivalı mayın 13-də Laçında "Aşıq mahnıları yeni səslənmədə" adlı konsert proqramı ilə Həkəri çayı ətrafında açıq səma altında davam etdirilib. Konsertdə Xalq artistləri Aygün Kazımova, Nazpəri Dostəliyeva, Tünzalə Ağayeva, Əməkdar artistlər Ehtiram Hüseynov, Lalə Məmmədova, Elnarə Abdullayeva və digərləri tanınmış aşıqlarımızla duet oxuyublar. Festival iştirakçıların birgə ifasında səslənən "Bütöv Azərbaycan" mahnısı ilə başa çatıb. Artıq bütün dünya bir həqiqəti görür və anlayır. İşğaldan azad edilmiş ərazilərdə insanlar məskən salır, sürətlə abadlıq-quruculuq işləri gedir. Bir zamanlar dünyanın münaqişə ocağı kimi tanıdığı Qarabağa müxtəlif xalqların musiqisi səslənir. İndi Qarabağda silahlar yox, musiqi alətləri daşınır. İndi Qarabağda sülh, qardaşlıq marşları çalınır.
Elşən QƏNİYEV,
"Azərbaycan"
