Yaxın gələcəkdə Azərbaycan şirkətləri hərbi təyinatlı modern məhsullar istehsal edəcəklər
Azərbaycanın hərbi sənayesi ölkənin müstəqilliyini və təhlükəsizliyini təmin etmək məqsədilə mühüm işlər görür. Yerli istehsalın artırılması, müasir müdafiə texnologiyalarının tətbiqi və xarici bazarda mövqeyin möhkəmləndirilməsi Azərbaycanın silah sənayesinin inkişafında əsas hədəflərdir. Bu inkişaf Azərbaycanın beynəlxalq aləmdəki gücünü artırmağa, regional və qlobal təhlükəsizliyə müsbət təsir göstərməyə xidmət edir. Gələcəkdə Azərbaycan silah sənayesindəki uğurlarını daha da çoxaltmaq və dünyadakı mövqeyini gücləndirmək niyyətindədir.
Noyabrın 3-də Azərbaycan Milli Elmlər Akademiyasının 80 illik yubileyinə həsr olunmuş yığıncaqda çıxış edən Prezident İlham Əliyev bu məsələyə toxunaraq bildirib ki, hazırda Azərbaycanda hərbi sənaye sürətlə inkişaf edir və artıq uzun illər ərzində bu sahəyə böyük vəsait ayrılır, bu sahədə fəaliyyət göstərən şirkətlərin fəaliyyəti təkmilləşir. Eyni zamanda bu yaxınlarda dövlət bu sahəni özəl sektor üçün də açmışdır. Çünki bu istiqamətdə ən böyük uğurlar əldə etmiş ölkələrdə hərbi təyinatlı məhsullar məhz özəl şirkətlər tərəfindən istehsal olunur: "Ona görə biz də burada lisenziyaları verməklə özəl sektoru cəlb etmişik. Eyni zamanda mənim tərəfimdən də onlara çağırış olub və bu gün özəl şirkətlər artıq hərbi təyinatlı məhsulların istehsalı ilə məşğul olmağa başlamışlar. Deyə bilərəm ki, hələlik bu proses icra mərhələsindədir, amma yəqin ki, yaxın gələcəkdə bir çox Azərbaycan şirkətləri artıq dünya səviyyəli keyfiyyətli hərbi təyinatlı məhsullar istehsal edəcəklər".
Prezident vurğulayıb ki, dövlət xətti ilə bu istiqamətdə işlər aparılır və Azərbaycan öz hərbi imkanlarını artıq böyük dərəcədə yerli istehsal hesabına genişləndirir, öz tələbatımızı böyük dərəcədə ödəyirik. Artıq Azərbaycan bir çox ölkəyə hərbi təyinatlı məhsul ixrac edir və qarşıya vəzifə qoyulub ki, həm daxili tələbatı ödəmək, həm də ixrac etmək üçün bu istiqamətdə çox ciddi sənaye klasteri yaradılsın. Çünki bu, çox gəlirli sahədir və nəzərə alsaq ki, bu gün dünyanın bütün yerlərində müharibələr alovlanır, dayanmır, əfsuslar olsun ki, hərbi təyinatlı məhsullara bundan sonra da ehtiyac olacaq. Ona görə bu gün müəssisələrimiz bu istiqamətdə çox fəal işləyirlər.
Prezident çağırış edərək dövlət və özəl şirkətləri, eyni zamanda Azərbaycan alimlərini bu istiqamətdə birgə işləməyə dəvət edib.
Qeyd edək ki, 5 il öncə əldə etdiyimiz şanlı Zəfərimizdə Azərbaycan Silahlı Qüvvələrinin hərbi təchizatında öz sənaye istehsalımız da böyük üstünlük təşkil edib. Müharibədən sonra savaşı dəyərləndirən dünya birliyi Azərbaycanı ilk smart müharibə aparan dövlət kimi təqdim etdilər. Yəni bu, ilk savaş idi ki, pilotsuz uçuş aparatlarının tətbiqi həyata keçirilmişdi. Prezident də bu məsələyə toxundu və dedi ki, bunu müharibədə məhz Azərbaycan birinci tətbiq edib: "Bu gün müasir müharibələri bunsuz təsəvvür etmək mümkün deyil. Yəni bunun təməlini biz qoymuşuq və bu gün bu istiqamətdə Azərbaycanda çox böyük işlər görülür. Biz bu məhsulları həm xarici bazarlardan tədarük edirik, eyni zamanda özümüz də bir çox növdən ibarət pilotsuz uçuş aparatlarını istehsal etməyə başlamışıq və bunu davam etdirəcəyik. Burada da təbii ki, Azərbaycan elmi ictimaiyyəti üçün çox böyük fəaliyyət meydançası yaradılır".
Azərbaycanın silah sənayesinin ən mühüm inkişaf istiqamətlərindən biri də müasir müdafiə texnologiyalarına investisiya yatırılmasıdır. Azərbaycan hərbi sahədə yüksək texnologiyaların tətbiqini öz prioritetlərindən birinə çevirib. Bu məqsədlə müxtəlif dronlar, zərbə helikopterləri, raket sistemləri, eləcə də elektron müharibə vasitələri istehsal olunub.
Son illərdə Azərbaycanın silah sənayesinin inkişafı yalnız daxili bazarla məhdudlaşmır, həm də xarici bazarlarda müsbət nəticələr verir. Azərbaycan yerli istehsal etdiyi silah və hərbi texnikanın ixracını həyata keçirərək öz iqtisadiyyatını gücləndirməkdədir. Azərbaycanın silah ixracı xüsusilə də Orta Şərq və Şimali Afrika ölkələrinə artıb. Bu ölkələr Azərbaycanın yüksəkkeyfiyyətli silahlarını və hərbi texnika sahəsindəki təcrübəsini yüksək qiymətləndirirlər.
Ümumiyyətlə, Azərbaycanın silah sənayesinin gələcəyi çox böyük perspektivlərə malikdir. Hökumət hərbi sənayenin inkişafını yalnız müdafiə məqsədilə deyil, həm də iqtisadi inkişafın mühüm bir elementi kimi görür. Yaxın gələcəkdə daha çox yerli silah istehsalının artırılması, yeni texnologiyaların tətbiqi, eyni zamanda beynəlxalq bazarda Azərbaycanın silah sənayesinin daha da inkişaf etməsi gözlənilir.
Azərbaycan bu sahədə beynəlxalq əməkdaşlığa da böyük önəm verir. Silah və müdafiə sənayesinin inkişafında, həmçinin beynəlxalq bazarda Azərbaycanın mövqeyini gücləndirmək məqsədilə mühüm anlaşmalar və müqavilələr imzalanır. Bu, ölkənin təhlükəsizliyini təmin etməklə yanaşı, iqtisadiyyatına da yüksək töhfə verəcək.
Rəşad BAXŞƏLİYEV,
"Azərbaycan"
19 (1)jpg_1771885865.jpg)
