Ötən ili müxtəlif sahələrdə nailiyyətlərlə yola salan göygöllülər indi cari ildə görüləcək işləri götür-qoy edir, üzərlərinə düşən vəzifələri müəyyənləşdirirlər. 2025-ci ilin sosial-iqtisadi inkişafının yekunlarına və qarşıda duran vəzifələrə həsr olunmuş yığıncaqda da bu barədə ətraflı söhbət getdi.
Rayon icra hakimiyyətinin başçısı Vüqar Novruzovun hesabat məruzəsindən məlum oldu ki, keçən il Göygöl üzrə 4857 hektarda taxıl əkilmiş, hər hektardan 30,6 sentner olmaqla 14897 ton məhsul götürülmüşdür. Bu, əvvəlki ildəkindən 4 sentner çoxdur. Cari ilin məhsulu üçün isə 6459 hektar payızlıq şum aparılmış, 5369,5 hektara taxıl toxumu səpilmişdir.
Heyvandarlıq sahəsində də uğurlu göstərcilərə nail olunmuşdur. Öncə onu qeyd edək ki, hazırda rayon üzrə 20,4 min baş qaramal, 117,2 min baş davar heyvan var. Ötən il ət istehsalı 3018,6, süd istehsalı 23605,3 tona, yumurta istehsalı 9,7 milyon ədədə çatmışdır.
Hesabatdan o da məlum oldu ki, ötən il də rayonda abadlıq və quruculuq, yaşıllaşdırma işləri genişlənmiş, sakinlərin rahatlığının təmin olunması üçün müxtəlif infrastruktur layihələri həyata keçirilmişdir. İlk növbədə Heydər Əliyev xiyabanında cari təmir işləri aparılmış, eləcə də şəhərin mərkəzi küçələrində evlərin fasadlarında əsaslı təmir işləri görülmüş, su arxları və səkilər təmir edilmişdir. Paralel olaraq Gəncə-Kəlbəcər-Laçın avtomobil yolunun kənarında yerləşən yaşayış və qeyri-yaşayış sahələrinin fasad hissələri təmir olunmuş, yararsız dam örtükləri yenisi ilə əvəzlənmişdir. Şəhidlər xiyabanı da əsaslı təmir olunmuşdur. Yaşıllaşdırmaya da diqqət artırılmışdır. Təkcə keçən il 6 hektarda 10 mindən artıq ağac əkilmişdir.
Keçən il rayonun bir çox yaşayış məntəqələrinin qaz xətləri də yenilənmişdir. Tədbirlər Planına uyğun olaraq, rayon mərkəzinin bəzi küçələrində, Quşqara və Çaylı kəndlərində ümumilikdə 3300 poqonometr qaz xətləri dəyişdirilmişdir. Eyni zamanda yeni tipli 11 qaz tənzimləyici qurğu quraşdırılmış, 9 qaz bağlayıcı siyirtmə yenisi ilə əvəz olunmuşdur.
Əhalinin dayanıqlı su təminatına gəldikdə, bu məqsədlə Bənövşəli ərazisində 144 kubmetrlik sututarının tikintisinə başlanılmışdır. Obyektin cari ilin birinci rübündə yekunlaşması nəzərdə tutulur. Qızılqaya və Mollacılilli kəndlərində isə daxili su şəbəkəsinin qurulması ilə bağlı layihə-smeta sənədləri hazırlanmışdır.
Keçən il Göygöl beynəlxalq səviyyəli idman yarışlarına evsahibliyi etməsi ilə də fərqlənmişdir. Cüdo üzrə Avropa Kuboku və III MDB Oyunları çərçivəsində sambo və cüdo yarışları Göygöl Olimpiya İdman Kompleksində keçirilmişdir. Tədbirlərdən söz düşmüşkən, 2025-ci ildə Göygöldə keçirilən bir neçə tədbir yaddaqalan olmuşdur. Avqustda Yeni Zod kəndi ərazisində keçirilən "IV Milli Yaylaq Festivalı"nda unikal elat mədəniyyəti təbliğ olunmuşdur. Bundan başqa, Keşkü kəndi ərazisində keçirilən "II Moruq Festivalı" da regionda geniş əks-səda doğurmuşdur. Belə bir əks-sədalı tədbir "Göygöl Brendi-Konyak Günü" olmuşdur. Tədbirin açılış mərasimində Almaniya, İsveç, Latviya, Avstriya və digər ölkələrin Azərbaycandakı səfirləri və bir sıra səlahiyyətli nümayəndələr iştirak etmişlər.
Yığıncaqda o da vurğulandı ki, 2025-ci il ölkəmizdə "Konstitusiya və suverenlik İli" kimi yadda qalmışdır. Rayon icra hakimiyyəti il ərzində bununla bağlı bir çox tədbir keçirmiş, Konstitusiya dəyərlərinin təbliği, dövlət suverenliyinin möhkəmləndirilməsi və vətəndaşların hüquqi maarifləndirilməsi məqsədilə konfranslar, "dəyirmi masa"lar, seminarlar və digər tədbirlər keçirmişdir. Tədbirlərdə Ulu Öndər Heydər Əliyevin müstəqilliyimizin qorunması, milli Konstitusiyamızın qəbul olunması və dövlətçilik ənənələrinin inkişafında göstərdiyi müstəsna xidmətlərdən, Prezident İlham Əliyevin rəhbərliyi ilə Azərbaycan xalqının Vətən müharibəsində qazandığı tarixi Zəfərdən ətraflı söhbət açılmışdır.
Sonra yığıncaqda keçən il görülən işlərlə bağlı çıxışlar dinlənilmişdir. Cari ilin hədəflərini əks etdirən qərar qəbul olunduqdan sonra yığıncaq iştirakçıları Prezident İlham Əliyevə müraciət qəbul etmişlər.
Sabir ƏLİYEV,
"Azərbaycan"
19 (1)jpg_1771885865.jpg)
