16 nəfər barəsində cinayət işi başlanıb, 14 nəfər saxlanılıb
Ermənistanda müxalif qüvvələrin Nikol Paşinyan iqtidarına qarşı fəaliyyəti genişlənsə də, bu xüsusda keçmiş hərbi xunta yenidən önə çıxmağa cəhd etsə də, Xocalı soyqırımını törədənlərin və son savaşda məğlub olan müharibə canilərinin Paşinyanı hakimiyyətdən devirmək planlarının həyata keçirilməsi heç də asan deyil.
Belə ki, Ermənistan Milli Təhlükəsizlik Xidməti (MTX) "Müqəddəs Mübarizə" hərəkatı adı altında fəaliyyət göstərən, ölkədə çevriliş etmək istəyən qruplara qarşı ardıcıl əməliyyatlar keçirir. Xüsusilə keşiş Baqrat Qalstanyanın rəhbərlik etdiyi etiraz hərəkatı və onun "Srbasan tərəfindən bəxş edilmiş müqəddəs müqavimət" ritorikası İrəvanın siyasi gündəmini alt-üst edib.
Rəsmi mənbələrə görə, çevriliş cəhdinin arxasında duran qüvvələr əsasən keçmiş oliqarxlar, müəyyən kriminal dairələr və müxalif ruhani çevrələr olub. Onların məqsədi Ermənistan cəmiyyətində xaos və qorxu yaratmaq, hüquqi institutlara güvəni sarsıtmaq və nəticədə dövlətin idarəçiliyini zorla ələ keçirmək olub. Son günlərdə ölkə mətbuatında yer alan xəbərlərdə "Müqəddəs Mübarizə" adlı revanşist hərəkatın fəallarına qarşı keçirilən reydlər və axtarışlar da məhz bu planla əlaqələndirilirdi. Xüsusilə hərəkatın liderlərindən biri - arxiyepiskop Baqrat Qalstanyanın mənzilində aparılan axtarış vəziyyətin ciddiliyini təsdiqləyirdi.
Ermənistan Respublikasının İstintaq Komitəsi hakimiyyət çevrilişinə cəhdlə bağlı bəyanat yayıb. Qeyd edilib ki, müstəntiqin təqdimatı və nəzarəti həyata keçirən prokurorun qərarları əsasında 16 nəfər barəsində cinayət işi başlanıb, vəsatətlər təmin edilib. Hazırda müstəntiqin qərarı ilə 14 nəfər saxlanılıb.
Nikol Paşinyan öz bəyanatında xalqı ayıq-sayıq olmağa çağırıb və vurğulayıb ki, Ermənistanda hakimiyyət yalnız xalqın iradəsi ilə formalaşır və başqa heç bir qüvvə - nə kilsə, nə köhnə oliqarxlar, nə də xarici maraqlı tərəflər bu prosesi dəyişdirə bilməz: "Biz bir daha sübut etdik ki, Ermənistan artıq əvvəlki Ermənistan deyil. Heç kim xalqa qarşı qiyam qaldıraraq uğur qazana bilməz. Bu ölkədə güc xalqındır və xalqın iradəsini heç kim qıra bilməz".
Ermənistanda ehtiyatda olan polkovnik Miqran Maxsudyan İstintaq Komitəsinə aparılıb. İstintaq Komitəsinin binası qarşısında o bildirib ki, hansı əsasla saxlanıldığını və İstintaq Komitəsinə aparıldığını bilmir. O qeyd edib ki, mənzilində heç bir qanunsuz şey tapılmayıb: "Mesajım odur ki, mübarizəni davam etdirəcəyəm. Sadəcə onu deyim ki, insanlar sakit olsunlar, heç nədən qorxmasınlar".
Bundan əvvəl Maxsudyanın oğlu sosial şəbəkədə paylaşım edərək yazıb: "Bu gün səhər saatlarında hüquq-mühafizə orqanları bizim ailənin İcevan və Voskepardakı evlərində axtarış aparıblar. Axtarış zamanı qanunsuz heç nə aşkar edilməyib. Lakin hakimiyyət atam Miqran Maxsudyanı həbs etməklə qanunsuzluğa əl atıb. Hazırda o, İstintaq Komitəsinə aparılır. Bu, təkcə qanunsuzluq deyil, həm də siyasi təqibin bariz təzahürüdür".
Keçmiş erməni döyüşçü və "Səlibçilər" dəstəsinin yaradıcısı Şahe Atsemyan mövcud vəziyyəti şərh edərək deyib ki, Nikol Paşinyan komanda yoldaşları ilə birlikdə Erməni Apostol kilsəsinə və erməni patriarxa qarşı aktiv kampaniyanı davam etdirir. Paralel olaraq biznesmen və xeyriyyəçi Samvel Karapetyana qarşı kampaniya aparılır: "Nikol Paşinyan və onun komanda yoldaşlarının milli dəyərə, Erməni Apostol kilsəsinə qarşı mübarizəsi sadəcə olaraq gülüncdür və bunun bircə qısa cavabı var. Onların kilsəyə qarşı mübarizəsi çay stəkanındakı fırtınadır, keçib gedər. Bu səlahiyyətlilərin özləri də çay fincanındakı fırtınadır, keçib gedəcək".
Atsemyan əmindir ki, hakimiyyətin addımları yalnız özünə zərər verəcək, nə kilsəyə, nə də Samvel Karapetyanın reputasiyasına xələl gətirəcək: "Bütün bunlar hakimiyyətin meymunluqlarıdır. Nikol da, partiyası da keçib gedəcək, kilsə sarsılmaz qalacaq".
Görünən odur ki, Ermənistanda daxili siyasi vəziyyət tədricən mürəkkəbləşməyə doğru gedir. Bununla da ölkə sonu görünməyən daxili siyasi böhrana yuvarlanır.
Elçin CƏFƏROV,
"Azərbaycan"
jpg_1766048684.jpg)
