İsveçin “Hexagon AB” şirkəti ən inkişaf etmiş insanabənzər robot olan “AEON”u təqdim edib. Bu, “NVIDIA”nın süni zəka və superkompüterlər sahəsindəki təcrübəsi, robototexnika üzrə geniş proqram təminatı və güclü çiplər sayəsində mümkün olub. Geniş sənaye tapşırıqlarını yerinə yetirmək üçün yaradılmış “AEON” avtomobil, nəqliyyat, aerokosmik, istehsalat, anbar və logistika sahələrində istifadə ediləcək. İnnovativ robotun əsas xüsusiyyətlərindən biri onun reallığı rəqəmsallaşdırmaq və obyektlərdən tutmuş otaqlara və ərazilərə qədər hər şeyin rəqəmsal əkizlərini yaratmaq qabiliyyətidir.
“Hexagon AB” 3D skanerləri və lazer məsafəölçənləri ilə tanınır. “İstehsalat və logistika kimi sahələrdə 50 milyon vakant iş yerinin boş qaldığı qlobal işçi qüvvəsi çatışmazlığı şəraitində, ölçmə texnologiyaları sahəsində dünya lideri olan Hexagon şirkəti kömək göstərə biləcək insanabənzər robotlar hazırlayır”, - deyə “NVIDIA”nın bloqunda qeyd olunur. İstehsalçılara görə, “AEON” xüsusilə reallığın tanıması prosesində effektiv olacaq. Bu proses obyektlərin, sənaye məkanlarının və ətraf mühitin avtomatik planlaşdırılması və skan edilməsini, nəticədə 3D modellərin yaradılmasını əhatə edir.
Əldə edilən məlumatlar sonradan “Hexagon”un “Digital Reality” platformasında genişləndirilmiş vizuallaşdırma və əməkdaşlıq üçün istifadə olunur. Bu platforma çərçivəsində “Hexagon Reality Cloud Studio” da fəaliyyət göstərir. Bundan əlavə, robot sənaye və istehsalat mühitində müxtəlif manipulyasiyaları, məsələn, detalların çeşidlənməsi və daşınmasını yerinə yetirə biləcək. Obyektləri skan etmə qabiliyyəti isə detalların yoxlanılmasında, qüsurların aşkarlanması və ya texniki spesifikasiyalara uyğunluğun yoxlanılması kimi məsələlərdə kömək edəcək. Robotun öyrədiləcəyi sənaye əməliyyatları yüksək dəqiqlik tələb edən texniki tapşırıqları əhatə edəcək. Bunlara avadanlıqlarla işləmək, yüksək keyfiyyətli skanerlərlə detalların skan olunması, eləcə də teleoperasiya, yəni operator-insanın robot mexanizmləri vasitəsilə məsafədən müdaxiləsi daxildir.
“AEON”un yaradılması üçün şirkət “NVIDIA”nın 3 hesablama platformasından istifadə edib. Bu platformalar süni zəkanın fiziki sistemlərə inteqrasiyasına kömək göstərib. Xüsusilə, süni zəka ilə təchiz edilmiş superkompüterlər güclü təməl modellərin öyrədilməsi və tənzimlənməsi üçün istifadə olunub.
Ülkər XASPOLADOVA,
“Azərbaycan”
png_1765896393.png)
