Tacikistanın paytaxtı Düşənbədə 28 May - Müstəqillik Günü münasibətilə rəsmi qəbul keçirilib.
AZƏRTAC xəbər verir ki, Azərbaycanın Tacikistandakı səfirliyi tərəfindən təşkil olunan tədbirə Tacikistan Sənaye və Yeni Texnologiyalar naziri Şerali Kabir, Prezidentin xarici siyasət məsələləri üzrə köməkçisi Əzəmşo Şərifi, Tacikistan-Azərbaycan Parlamentlərarası dostluq qrupunun həmsədri Qeyrət Əzizzodə, hökumət və parlament üzvləri, diplomatik missiyaların rəhbərləri, iş adamları və Tacikistanda yaşayan azərbaycanlılar qatılıblar.
Hər iki ölkənin Dövlət himnlərinin səsləndirilməsindən sonra Azərbaycanın Tacikistandakı səfiri Əlimirzamin Əskərov çıxış edib. O, 108 il əvvəl müsəlman Şərqində yaradılan ilk demokratik, hüquqi, dünyəvi respublika olan Azərbaycan Xalq Cümhuriyyətinin tarixi əhəmiyyətindən danışıb.
Səfir, həmçinin müstəqilliyin bərpasından sonra qazanılan uğurlardan, Ümummilli Lider Heydər Əliyevin dövlət quruculuğundakı misilsiz xidmətlərindən söz açıb. O, Prezident İlham Əliyevin rəhbərliyi ilə Azərbaycanın siyasi, iqtisadi və hərbi sahələrdə böyük nailiyyətlər qazandığını vurğulayıb. Əlimirzamin Əskərov Ümumdünya Şəhərsalma Forumunun 13-cü Sessiyasının (WUF13) may ayında Bakıda uğurla keçirildiyini və bunun Azərbaycanın etibarlı beynəlxalq tərəfdaş kimi nüfuzunun göstəricisi olduğunu bildirib.
Səfir, eyni zamanda, 2020-ci ildə 44 günlük Vətən müharibəsi və 2023-cü ildəki antiterror əməliyyatı nəticəsində Azərbaycanın ərazi bütövlüyünün tam bərpa olunduğunu, azad edilən ərazilərdə quruculuq işlərinin aparıldığını bildirib. O, Birinci Qarabağ müharibəsi zamanı itkin düşən şəxslər və ölkəmizin üzləşdiyi mina təhlükəsi barədə də tədbir iştirakçılarını məlumatlandırıb.
Ziyafətdə Tacikistan Dövlət Akademik Opera və Balet Teatrının solisti Doston Xolovun ifasında Azərbaycan musiqiləri səsləndirilib, Azərbaycan-Tacikistan münasibətlərinə həsr olunan sərgi təqdim edilib, ölkəmizlə bağlı videoçarxlar nümayiş olunub. Qonaqlara Azərbaycanın milli mətbəxinin nümunələri təqdim edilib.
jpg_1780648528.jpg)
jpg_1780643496.jpg)
jpg_1780592803.jpg)
