İranın bizə "bağışlaya bilmədiyi" yeddi məqam
Bu gün heç kimdə zərrə qədər də olsa, şübhə yoxdur ki, İranın (daha dəqiq ifadə etsək, fars-molla rejiminin) özünə düşmən saydığı dövlətlər sırasında müstəqil Azərbaycan ilk yerlərdən birində dayanır.
Bunu biz havadan demirik, faktlara əsaslanıb söyləyirik.
Gəlin birlikdə olanları yenidən yada salaq.
Biz həmişə İranı özümüzə dost, qardaş hesab etsək də, mədəni, dini və tarixi əlaqələrin və bağların qədimliyini etiraf edib sərhədin o tayında qırx milyon qan qardaşımızın yaşadığını xatırladaraq xarici əlaqə və münasibətlərdə onu nəzərə alsaq da, əvəzində qarşı tərəfdən analoji münasibəti heç zaman görməmişik.
Əksini isə təsdiq edən kifayət qədər fakt və misallar mövcuddur.
MƏSƏLƏN, İranın fars-molla rejimi:
* Azərbaycan sərhədlərinin pozulmasını və müstəqil Azərbaycan ərazilərinin işğalını özünün "qırmızı xətti" olduğunu heç zaman Hayastana xatırlatmadı;
* Bir dəfə də olsun Hayastanı işğalçı dövlət adlandıraraq qınamadı;
* Tarixi, mədəni, dini abidələrimizin dağıdılmasına dözümlülük göstərdi;
* Ərazimizdəki məscidlərin uçurulmasına və mal-qara tövləsinə, donuz damına çevrilməsinə göz yumdu;
* Ermənilərə qoşularaq Qarabağ və Şərqi Zəngəzurda qalan evlərimizi qarət etdi;
* Din qardaşlarının halal evlərindən oğurladıqları haram tikinti materiallarını öz ərazilərindəki bazarlarda satıb pula çevirdi;
* İşğal altındakı Azərbaycan torpaqlarını ermənilərdən icarəyə götürməklə kənd təsərrüfatı məhsulları əkib-becərdi;
* Bizim torpaqlarda haylarla şərikinə narkoplantasiyalar saldı;
* İkinci Qarabağ müharibəsində öz hava məkanını Hayastana gecə-gündüz silah-sursat daşıyan dövlətlərin ixtiyarına verdi;
* Hayastan ordusunu yanacaq, sürtkü yağları, ərzaq sarıdan korluq çəkməyə qoymadı;
* Hayastanın Azərbaycan torpaqlarını daim işğalda saxlaması üçün əlindən gələn bütün köməyi göstərdi;
* Ən nəhayət, tez-tələsik Qafanda konsulluğunu açaraq Hayastanın məğlubiyyətdən aldığı yaralarının sağalması üçün yanında olduğunu əməli işi ilə isbat etdi!
Biz müstəqillik əldə edərək sevincimizi bölmək üçün ilk addımlardan biri kimi İranla aramızda olan tikanlı məftilləri qırıb-dağıtmışdıq...
İndi özünüz qiymət verin:
Bu bizim ürəyimiz, səmimi münasibətlərimiz və kişiliyimiz, bu da İranın!
***
İranı bütün dünya necə tanıyır - hamı bilir!
İran dünyada nə işlə məşğuldur - hər kəsə bəllidir!
İrana niyə sanksiyalar qoyulur - o da aydın məsələdir!
İran niyə hörmətsiz, urvatsız, küncə qısnanmış dövlət sayılır - bunda da heç bir sirr-filan yoxdur!
Lap qısaca desək, İran terrorçu, terrora dəstək verən, narkotika istehsal edən, insan hüquqlarını qəbul etməyən, beynəlxalq hüququ saya salmayan, öz vətəndaşlarına güllə atıb, hüquqlarını tələb edənlərini boğazından kəndirlə asan bir dövlətdir!
Bəs İranın ona heç bir pisliyi dəyməmiş müstəqil Azərbaycana bu qədər kin, qəzəb və nifrətinin əsl səbəbi nədir?
Axı indiyədək ölkəmiz ona heç nə etməyib!
Fars-molla rejiminin demokratik, müstəqil siyasət yürüdən, dünya dövlətləri ilə qarşılıqlı maraqlara əsaslanan münasibətlər quran, sülhpərvər Azərbaycanı heç cür bağışlaya bilmədiyi yeddi məqam barədə qısaca söhbət açmaq istəyirik.
***
Birinci məqam: İran Azərbaycanın müstəqil və qüdrətli dövlət olmasını istəmir və bundan bərk qorxur.
Tarixin dərinliklərinə varmadan söyləyək ki, Türkmənçay və Gülüstan müqavilələrinə əsasən, Azərbaycan iki yerə parçalandı.
Azərbaycan xalqı əsl faciəsini yaşadı.
Yarıya bölünərək doğmalarına, qohumlarına, dostlarına həsrət qaldı.
Sərbəst gediş-gəlişə sovet hökuməti icazə vermədi, ciddi qadağa qoydu.
O taydakı qırx milyon qardaş və bacımız savadsızlıqdan, hüquqsuzluqdan, dilinə, təhsilinə, insani hüquqlarına tətbiq edilən qadağa və maneələrdən zillət çəkdi, ağır və yoxsul həyata məhkum olundu.
Bu taydakılar isə repressiya və sürgünlərdən keçdi, 1941-1945-ci il müharibəsində qırıldı, iki Qarabağ savaşında isə 23 mindən çox şəhid verdi, uzun sürən və ağrılı məcburi köçkün həyatı yaşadı.
SSRİ-nin süqutu ilə Sovet Azərbaycanı müstəqillik qazandı, öz sərvətlərinə və xalqına sahib çıxdı!
Otuz ilədək davam edən işğala Vətən müharibəsi ilə son qoyaraq ərazi bütövlüyünü bərpa etdi, qələbə sevincini yaşadı!
Müstəqillik illərində Azərbaycan dövləti öz vətəndaşının xoşbəxtliyi, firavan yaşayışı üçün mümkün olan hər şeyi etdi!
Bu gün əldə etdiklərimiz haqlı qürur doğurur:
*Azərbaycan müstəqil hüquqi-demokratik dövlətdir;
* Fikir plüralizmi, çoxpartiyalı sistem mövcuddur;
* Mətbuat, söz azadlığı var, insanlar sərbəst danışır, gəzir, heç bir məhdudiyyətə məruz qalmırlar;
* Hamı ana dilində orta və ali təhsil alır, istədiyi xarici ölkədə təhsilini davam etdirir;
* İnsan hüquqlarına ciddi şəkildə əməl olunur, şəxsiyyətə hörmət bəslənilir;
* Azərbaycan sürətli inkişaf yolundadır, insanlar firavan həyat sürür, şəhər və kəndlər müasir və tam təminatlıdır, xoşbəxt yaşamaqda dövlət vətəndaşına daim yardım göstərir.
İranda isə vəziyyət necədir, son aylar orada nələr baş verir – hər kəsə bəllidir!
Odur ki, baş verən vəhşilikləri və qəddarlıqları yenidən xatırlatmırıq.
İran heç vəchlə sərhədlərinin o tayında on milyon azərbaycanlının bəxtəvər, azad, firavan yaşamasını qəbul edə bilmir.
Bilir ki, ərazisindəki azərbaycanlılar hər gün yox, bəlkə də hər saat özlərini müstəqil Azərbaycanın vətəndaşları ilə müqayisə edirlər və bu müqayisə zamanı ürəklərindən nələr keçirirlər!
Bax İran məhz buna görə müstəqil Azərbaycanın qüdrətlənməsindən, ayaq üstə möhkəm dayanmasından əndişələnir.
***
İkinci məqam: Azərbaycanla İsrailin dostluğu və əməkdaşlığı İranı təkcə narahat etmir, həm də qorxudur.
Üstəlik, Azərbaycanın İsraildə səfirlik açması qonşu İranı möhkəmcə əsəbiləşdirib.
Azərbaycan əvvəldən açıq şəkildə bəyan edib ki, öz ərazisindən başqa dövlətlərə qarşı istifadə olunmasına heç zaman yol verməyəcək.
Dediyi sözün də sahibidir.
Azərbaycan-İsrail əməkdaşlığı müstəqilliyimizin ilk illərindən başlayıb və bu gün də uğurla davam edir!
Əvvəla, Azərbaycanın kiminlə dostluq edib-etməməsi onun öz işidir və bununla bağlı heç kəslə məsləhətləşməyi ağlının ucundan belə keçirmir!
İkincisi, adamdan soruşarlar ki, sən ermənini özünə dost, qardaş tutanda məndən soruşmuşdun ki, mən də səndən xəbər alım?
Üçüncüsü, İsrail nə İranda, nə də Qarabağda və Şərqi Zəngəzurda nə bir məscid dağıdıb, nə də bir məsciddə donuz saxlayıb.
Sənsə dostun hayların əməllərini hamıdan yaxşı bilsən də, özünü o yerə qoymursan.
Dördüncü, necə düşünürsünüz, işğalçıya qarşı vuruşanın yanında olanla, ədalət uğrunda mübarizə aparanla dostluq etmək doğrudur, dinə və imana uyğundur, yoxsa işğalçıya dəstək göstərib islamı təhqir edənlərin yanında dayanıb din qardaşlarının şəhid olunmasına dəstək vermək?
Bu dostluqların mahiyyətlərinin fərqindəsinizmi?
Beşinci, hansısa "yüksək poqonlu"nun İsraillə münasibətlərimizə dair bizdən "izahat tələb etməsi" Azərbaycan XİN-in bəyanatında da göstərildiyi kimi, "gülüş və istehza" doğurur.
Azərbaycan İrandakı səfirliyində törədilən terror aktının araşdırılmasının nəticələri ilə bağlı qarşı tərəfdən izahat verilməsini gözləyir!
Onun daxili işlərinə burun soxmağa çalışanlara isə zərrə qədər də əhəmiyyət vermir!
***
Üçüncü məqam: İran dövlətin əsas gəlir mənbələrindən biri sayılan və uzun illər boyu Azərbaycanın işğal ərazilərindən keçən narkotrafikin bağlanmasını hələ də həzm edə bilmir.
Əvvəla, İran dünyada terroru dəstəkləyən dövlət kimi tanınır və bu barədə ucadan danışılır.
İkinci, dünyanın bir sıra münaqişə bölgələrində, xüsusən Suriyada İranın terrorçu quruplaşmalar saxladığı və onları maliyyələşdirdiyi kimsəyə sirr deyil.
Üçüncü, İranın nüvə silahı istehsal etmək, nüvə dövlətinə çevrilmək istəyi var və bu yolda inadla iş aparır.
Dördüncü, bütün bu əməllərinə görə ABŞ-nin təşəbbüsü ilə ciddi sanksiyalara məruz qalır.
Beşincisi, zəngin təbii sərvətləri olan bu dövlət nə neft, nə də qaz satışından kifayət qədər pul qazana bilir!
Nəticədə həm dövlət büdcəsini formalaşdırmaqda, həm də terrorçuluğa və uranın saflaşdırılmasına kifayət qədər vəsait toplamaqda ciddi çətinliklər çəkir.
Çıxış yolunu isə dövlət səviyyəsində narkotik istehsalı və satışında tapıb.
Narkotik vasitəsilə həm gənclərdə aludəlik yaradaraq onları terror dəstələrinə cəlb edir, həm də terroru maliyyələşdirmək üçün pul qazanır, üstəlik, büdcəsinin yırtıq-yamağını düzəldir.
Sübut: Elə bir gün yoxdur ki, İrandan Azərbaycan ərazisinə qaçaqmalçılıq yolu ilə narkotik keçirilməsinə cəhdlər göstərilməsin.
İranın narkotik ixracı üçün istifadə etdiyi əsas marşrutlardan biri Ermənistandan başlayır, sonra işğal ərazilərini keçməklə oradan Avropaya və digər dövlətlərə rahat çıxa bilirdi.
Azərbaycan Vətən müharibəsində qalib gəlib torpaqlarını işğaldan azad etdikdən, sərhədlərini möhkəmləndirdikdən sonra İran daha bu marşrutdan bəhrələnə bilmir.
Odur ki, ən səmərəli və gəlirli narkotrafikinin tam qapanmasını Azərbaycana qətiyyən bağışlamır.
***
Dördüncü məqam: Azərbaycan-Türkiyə qardaşlığı və strateji tərəfdaşlığı İranı heç cür qane etmir.
İran özünü Cənubi Qafqazın söz sahibi qismində görmək istəyir.
Rusiya ilə dostluğu, bir sıra məsələlərdə razılığa gəlmələri, Hayastanı əlaltısına çevirməsi, yanlış olaraq Azərbaycanı və Gürcüstanı zəif hesab etməsi onun bu istəkdə özünəinamını xeyli artırır.
Lakin Türkiyənin regiona qayıdışı, Azərbaycan-Türkiyə əlaqə və münasibətlərinin ən yüksək zirvəyə ucalması gözündən yuxusunu belə qaçırıb.
Fars-molla rejimi Azərbaycanın işğal altındakı torpaqlarını qısa müddətdə azad edəcəyini, dünyanın ən güclü ordularından birini yaradacağını və kimsə ilə, xüsusən İranla hesablaşmadan yalnız öz maraqlarını əsas tutacağını ağlına belə gətirmirdi!
Üstəlik, Azərbaycan hərbi əməliyyatlar qurtarandan az sonra Şuşada Türkiyə ilə Müttəfiqlik müqaviləsi bağlayaraq özünəgüvənini daha da artırdı və möhkəmləndirdi!
Fars-molla rejimi Azərbaycanı "saya salmadığını" hər addımda nümayiş etdirməyə cəhd göstərsə də, Türkiyəyə münasibətdə çox ehtiyatlıdır.
Əslində, Tehran NATO-nun hərbi gücünə görə ikinci dövlət sayılan Türkiyədən qorxur!
İran Azərbaycanın Türkiyəni yenidən Cənubi Qafqaza gətirməsini də bağışlamaqda çətinlik çəkir.
***
Beşinci məqam: Rejim dünyada Türk dövlətləri birliyinin yaranmasını və İranın bu birlikdən kənarda qalmasını özünə yeni təhlükə sayır.
Türk dövlətləri həm də müsəlman dövlətləridir.
Fars-molla rejimində islam artıq illərdir ki, zahiri pərdə sayılsa da, əslində, İran öz iddialarını həyata keçirməkdə bu amildən daim istifadə edir.
Üstəlik, özünü "dünya şiəliyinin" rəhbəri kimi göstərməyə can atır.
Əməldə zahiri təqdimatların əksi görünsə də, məsələn, elə Azərbaycan-Ermənistan münaqişəsinin başlanğıcından indiyədək hayların yanında yer almasına baxmayaraq, yenə də islama və şiə təriqətinə sadiq olduğunu daim dildə bəyan etməkdən yorulmur.
Təbii ki, Azərbaycanın təşəbbüsü və Türkiyənin liderliyi ilə Türk Dövlətləri Təşkilatının yaradılaraq qısa müddətdə güclü quruma çevrilməsi və uğurlu perspektivlər vəd etməsi heç də fars mollalarının ürəyincə deyil!
Əlbəttə, onlar da müsəlman dövləti kimi dəvət almalarını, sayılmalarını çox istərdilər.
Amma əməllərindəki naqisliklər hər zaman belə istəklərini heçə çıxaracaqdır.
Xüsusən, Zəngəzur dəhlizinin açılması və bu hesaba TDT-nin birliyinin, əməkdaşlığının daha da möhkəmlənəcəyi ona qətiyyən sərf etmir.
Əlindən gələni isə odur ki, altdan-altdan Hayastan vasitəsilə Zəngəzur dəhlizinin açılmasını əngəlləsin.
Amma özü də yaxşı anlayır ki, bu əməllərinin də heç bir səmərəsi olmayacaq!
***
Altıncı məqam: Hayastanın haçansa blokadadan çıxa biləcəyi variantı İrana heç cür sərf etmir.
Azərbaycan 44 gün ərzində "dəmir yumruğ"u ilə Qarabağ problemini əbədi həll etdi!
Özü də təkcə Hayastanın yox, bölgəyə yaxında və uzaqda yerləşən dövlətlərin gizli və aşkar istək və niyyətlərindən asılı olmayaraq!
Üçtərəfli Bəyanatın bəndlərinə tam əməl edilməsə də, Hayastan sülh müqaviləsinin imzalanmasını inadla əngəlləməyə çalışsa da, İranqarışıq hansısa dövlətlər işğalçıya hələ də arxa durmağa çalışsalar da, necə deyərlər, artıq qatar gedib.
Azərbaycan öz istəklərinə addım-addım, inamla, Müzəffər Ali Baş Komandan İlham Əliyevin cızdığı plan üzrə, ağıl və qətiyyətlə hər gün daha da yaxınlaşmaqdadır!
Torbanın bağlanmasına lap az zaman qalıb!
Müzəffər Ali Baş Komandan İlham Əliyev böyük zəfərin ilk günlərindən ucadan və açıq şəkildə bəyan edib: "Zəngəzur dəhlizini Ermənistan istəsə də açacağıq, istəməsə də!"
Əgər İlham Əliyev bunu istəyirsə və dilinə gətirirsə, deməli, elə belə də olacaq!
Məsələni ləngidən əsl səbəb isə dəhlizə uzanan şose və dəmir yolunun çəkilişlərinin hələ başa çatmamasıdır.
Zəngəzur dəhlizi işə düşəndən sonra Hayastan blokadadan çıxmış olacaq.
Deməli, fars-molla rejiminin Hayastan bazarı da bağlanacaq.
Vəssalam, şüttamam.
Beləliklə, Hayastanın İrana ehtiyacı qalmayacaq.
Daha yaxın və əlverişli sayılan Türkiyə bazarı ilə əməkdaşlığa keçəcək.
Fars mollaları "qardaş və bazar" itkisinə dözmək istəmirlər.
***
Yeddinci məqam: Bizi nə qədər təhdid etsə də, ondan heç cür qorxmamağımız da İranı özündən çıxarır, həm də qətiyyən razı salmır.
Fars-molla rejimi müstəqillik dövründə ölkəmizə qarşı düşmənçiliyin bütün formalarını tətbiq etdi:
* Müharibə vaxtı Xudafərin körpüsü ərazisində qarşımızı qoşunla kəsərək hücum əməliyyatlarını bir qədər ləngitdi, əlavə şəhidlər verilməsinə səbəb oldu.
* Qeyd olunduğu kimi, Hayastana hərbi cəhətdən silah-sursat, yanacaq və terrorçu təminatı baxımından mümkün olan yardımını göstərdi.
* Düşmənimizi məhv edib, zəlil günə qoyduqdan sonra da onun yanından əl çəkmədi.
* Hətta əlaqələrini daha da sıxlaşdırmaq üçün Qafanda tez-tələsik bir bina inşa etdirərək hələ suvağı qurumamış orada öz konsulluğunu açdı.
* Sərhədlərimizdə bizə "xox" gəlmək üçün iki dəfə hərbi təlimlər keçirdi, Araz çayının dəf edilməsi əməliyyatını nümayiş etdirdi.
* İran KİV-ində, telekanallarında əleyhimizə mütəmadi şəkildə hədyanlar, şər-böhtanlar səsləndirdi.
* "Multfilmlər" çəkdirib sosial şəbəkələrdə nümayiş etdirməklə bizi qorxutmağa çalışdı.
* Azərbaycanın Tehrandakı səfirliyində dövlət səviyyəsində terror aktı törədərək bir əməkdaşımızı şəhid etdilər, ikisini isə yaraladılar.
* Təzəlikcə isə Təbrizdəki Konsulluğumuz qarşısında "etiraz aksiyaları" təşkil edirlər.
Fars-molla rejimi bu əməlləri ilə təkcə beynəlxalq konvensiyaları yox, həm də insanlıq normalarını tapdalayır.
Azərbaycan onlardan qorxmadıqca, əhəmiyyət verib saya salmadıqca, daha da özlərindən çıxaraq azğınlaşırlar.
Ən nəhayət, Azərbaycanın deputatlarına qarşı terror əməli törətməklə daha bir dövləti cinayətə imza atdılar.
Amma öz aramızdır, İran təkcə bizi qorxutmur, özü də bizdən qorxur ha...
Bilir ki, bizə müharibə elan edib sərhədlərimizi keçmək, səfirliyin mülki əhalisini qırmaq üçün Tehrandakı Azərbaycan ərazisinə terrorçu göndərmək qədər sadə və asan olmayacaq!
Bütün hallarda, qonşumuzu ağıllı və ədalətli, həm də uzaqgörən olmağa çağırırıq!
Bizim heç kimdən və heç nədən qorxumuz yoxdur!
Ağıla gəlmək zamanıdır!
Bəxtiyar SADIQOV
