Yaxın günlər yığıma başlanılacaq
Füsunkar, əsrarəngiz təbiəti ilə maraq doğuran Gədəbəy işgüzar insanları ilə də seçilir. Ölkənin xalq arasında "ikinci çörək" adlandırılan kartofla təminatında bu insanların böyük əməyi var. Həmin əmək sayəsində "Gədəbəy kartofu" çoxdan əvəzsiz brendə çevrilib.
Hər il olduğu kimi, bu il də rayon sakinləri bol məhsul yetişdiriblər. Rayon Dövlət Aqrar İnkişaf Mərkəzinin direktoru Asəf Nağıyev deyir ki, hər il kartof əkilən sahələrin həcmi genişləndirlir: "Rayon üzrə keçən il 8680 hektarda kartof əkilmiş və hər hektardan 135 sentner olmaqla, ümumilikdə 117 min 180 ton məhsul toplanmışsa, bu il əkin sahələri 8740 hektara çatmışdır. Əsasən "Telman", "Ağçiçəyim" və digər yüksək məhsuldar kartof toxumları əkilmişdir ki, bu da istehsalda daha yüksək göstəriciyə nail olunacağından xəbər verir".
Bu gün rayonda elə bir kənd yoxdur ki, orada kartof əkilməsin. Məsələn, Böyük Qaramurad kəndində fermer Zakir Qasımov hər il bol məhsul yetişdirir. Keçən il 5 hektardan yaxşı qazanc da əldə etmişdir. Uzun illərdir ki, bu sahədə zəngin təcrübə toplayan Sakit Yəhyayevin də kartofçuluqda təcrübəsi çoxdur. Fermer hər il "Tərs yer" adlanan sahədə 9 hektar kartof yetişdirir. Məhsulu da bol olur. Novosaratovka kəndindən Kənan Əmrahov, Əli Həsənov, İnəkboğan kəndindən Şahin Kazımov, Qoşabulaq kəndindən Şahin Vəliyev, Rasim Ələkbərov, Front Alıyev və Cəfər Məsimov da Gədəbəyin tanınan kartofçularındandır.
Yaxın günlər rayonda kartof yığımına başlanılacaq. Fermerlər bunun üçün geniş hazırlıq işləri görürlər. Məhsul əsasən texnika vasitəsilə çıxarılacaqdır.
S.YUNİSOĞLU,
"Azərbaycan"
