Səhmlərinin birjada ticarət olunmağa başlaması ilə "Anthropic" dünyanın ən dəyərli açıq şirkətlərindən birinə çevrilib və onun bazar dəyəri təxminən 1,76 trilyon dollara (1,34 trilyon funt sterlinq) çatıb.
Süni intellekt sahəsində fəaliyyət göstərən bu şirkətin "Nasdaq" birjasında debüt etməsi, texnologiyanın inkişafına yatırılan nəhəng vəsaitlər nəzərə alınmaqla, bütün sənaye üçün mühüm sınaq hesab olunurdu.
"Anthropic"in səhmlərinin qiyməti ilkin təklif qiyməti olan 83 dolları xeyli üstələyib. Bu da süni intellekt sahəsinə böyük maraq və həvəsin olduğunu nümayiş etdirir.
Bununla belə süni intellekt əsaslı "Claude" çatbotunun yaradıcısı olan şirkət qarşıdakı aylarda diqqət mərkəzində qalmağa davam edəcək. Belə ki, o, süni intellektlə bağlı əsas suala – "bütün bunlara dəyərmi?" sualına cavab verməli olacaq.
"Anthropic"in səhmlərinin ticarətə başladığı ilk bir neçə saat ərzində investorların süni intellektin gələcək inkişaf istiqaməti ilə bağlı hələ də qərarsız olduqları müşahidə edildi. Səhm qiyməti dərhal 111,53 dollara yüksələrək şirkətin bazar dəyərini təxminən 2 trilyon dollara çatdırdı, lakin günün sonunda eniş yaşandı və səhmlər 97,17 dollar səviyyəsində bağlandı.
Bəzi investorlar "Anthropic"in debütünü uğurlu hesab etdilər, çünki gün ərzində səhmlər təxminən 17% bahalaşdı, lakin ümumilikdə, texnologiya bazarında vəziyyət o qədər də yaxşı deyildi.
Texnoloji şirkətlərin üstünlük təşkil etdiyi "Nasdaq Composite" indeksi gün sonunda təxminən 2,3% ucuzlaşdı. Ən böyük texnologiya şirkətlərinin səhmləri dəyər itirdi. "Google"un ana şirkəti olan "Alphabet"in səhmləri 2,9%, "Amazon"un səhmləri isə təxminən 3,9% ucuzlaşdı.
Süni intellektin hazırkı inkişaf mərhələsi texnologiya tarixində ən bahalı təşəbbüslərdən biridir. Təkcə son bir il ərzində bir neçə iri texnologiya şirkəti bu sahəyə 1 trilyon dollardan çox vəsait xərcləyib.
Əsmər QARDAŞXANOVA,
“Azərbaycan”