"Biz Azərbaycanda ən çox töhfə verə biləcəyimizə inandığımız sahələrə yönəltməklə dayanıqlı inkişaf təşəbbüslərinə dəstək göstərmək öhdəliyi götürmüşük". Ölkəmizdə ən iri neft-qaz və ixrac layihələrinin əməliyyatçısı olan BP şirkəti belə bəyan edir.
BP dayanıqlı inkişaf təşəbbüslərini, yəni sosial proqramlarını özünün əsas layihələrindəki əməliyyatlarının ayrılmaz hissəsi sayır. Şirkətin ölkədə həyata keçirdiyi geniş sosial sərmayə fəaliyyətləri və bacarıqların inkişaf etdirilməsi istiqamətindəki səyləri insanlara əhəmiyyətli faydalar gətirir.
Sosial proqramların bir çoxunu şirkət "Azəri-Çıraq-Günəşli", Bakı-Tbilisi-Ceyhan, "Şahdəniz" və Cənubi Qafqaz Boru Kəməri layihələrindəki tərəfdaşları - SOCAR, TPAO, LUKOİL, SGC, NİCO, MOL, İNPEX, "ExxonMobil", İTOCHU, "ONGC Videsh", "Eni", MVM və "TotalEnergies"lə birlikdə həyata keçirir. Bəzilərini isə bir şirkət olaraq özü gerçəkləşdirir.
Sosial sərmayələr əsasən yerli potensialın yaradılmasına, icmaların inkişafına, yerli sahibkarlıq, ətraf mühit, idman potensialının artırılmasına və digər sahələrə yönəldilir. Bunların sırasında təhsilə dəstək də mühüm yer tutur.
Elə bu günlərdə BP öz tərəfdaşları adından Bakı Dövlət Universitetinin tədris infrastrukturunun modernləşdirilməsi və genişləndirilməsinə yönəldilmiş daha bir sosial layihənin uğurla tamamlandığını bildirdi. Layihənin nəticəsi kimi universitetdə müasir və interaktiv bir tədris məkanı olan geologiya muzeyi açıldı. Bu innovativ tədris və təlim mərkəzi Azərbaycanın zəngin geoloji irsi, təbii ehtiyatları və həmin sahədəki elmi nailiyyətlərinə dair məlumatları əhatəli şəkildə təqdim etmək məqsədilə yaradılıb.
Muzey geologiya və geofizika fakültələrinin müəllim heyəti və tələbələrinə geoloji elmlər və əlaqəli sahələri öyrənmək və araşdırmaq üçün müasir vasitələrdən istifadə etmək imkanı verir. Bu mövzuları əhatə edən muzey 8 tematik guşədən ibarətdir: Azərbaycanın geologiya tarixi, bölgələrinin geoloji xüsusiyyətləri, mineral ehtiyatları, fosilləri və paleontologiyası, qeyri-adi geoloji quruluşlar və qorunan təbiət abidələri, geoloji ehtiyatlarının iqtisadi və sosial əhəmiyyəti. Muzeydə eləcə də "Heydər Əliyev və geoloji inkişaf", "Geoloji tədqiqatlar və innovasiyalar" mövzularında tematik guşələr var.
Hər bir guşə interaktiv ekranlar və xəritələr, elmi eksponatlar, multimedia materialları, sensorlu oyunlar, müasir texnoloji lövhələr, simulyatorlar və virtual reallıq elementləri ilə təchiz olunub və ziyarətçilər üçün həm maarifləndirici, həm də əyləncəli təcrübə təqdim edir. Bundan əlavə, muzeyin tərkibində açıq məkan şəklində nəzərdə tutulmuş tədris zonası da mövcuddur.
Təxminən 600 bakalavr tələbəsi (əsasən geologiya, geofizika və əlaqəli ixtisaslar üzrə təhsil alanlar) və eləcə də müəllim heyəti tədris, təlim və elmi-tədqiqat fəaliyyətləri üçün muzeydəki məzmundan faydalanacaq.
Layihə ilə bağlı BP-nin Azərbaycan, Gürcüstan və Türkiyə üzrə regional prezidenti Qəri Counz belə deyib: "Bu layihə ölkədə təhsilə və digər mühüm sosial inkişaf sahələrinə davamlı dəstəyimizin gözəl nümunəsidir. Tərəfdaşlarımızla birlikdə çox məmnunuq ki, artıq bir əsrdən çox tarixi olan və aparıcı, nüfuzlu təhsil müəssisəsi kimi geniş miqyasda tanınan Bakı Dövlət Universiteti bu cür unikal bir mərkəzə sahib olacaq. Bu mərkəz geoloji və geofiziki biliklərin zəngin məlumat bazasını innovativ şəkildə təqdim etməyə imkan verəcək. İnanırıq ki, muzeyin dizaynı, texniki təchizatı və təqdim olunan əhatəli informasiya hər bir ziyarətçiyə yer üzünün zəngin və rəngarəng sərvətlərini kəşf etmək üçün unikal bir təcrübə yaşadacaq. Ümid edirik ki, həm tələbələr, həm də digər ziyarətçilər ölkənin təbii ehtiyatlarının əsrarəngiz müxtəlifliyini və onun diqqətəlayiq geoloji irsini dərindən anlayacaq və dəyərləndirəcəklər."
Muzey üçün alınmış bütün avadanlıq, texniki və proqram təminatı da daxil olmaqla layihənin ümumi dəyəri 395810 manatdır. Layihə yerli şirkət olan ADZONE-S MMC tərəfindən icra edilib.
Azərbaycan Memarlıq və İnşaat Universitetində (AMİU) isə BP bu günlərdə tam təchiz edilmiş üç yeni laboratoriya açıb. Bu, ölkədə təhsilin inkişafına və innovasiya potensialının artırılmasına BP-nin daha bir əhəmiyyətli töhfəsidir.
Ventilyasiya, su təchizatı və istilik texnikası laboratoriyası Mühəndis sistemləri və qurğularının tikintisi kafedrasına hədiyyə edilib. Meliorasiya və su təsərrüfatı tikintisi kafedrasına təqdim olunan laboratoriya nasos və nasos qurğuları laboratoriyasıdır. Daxili yanma mühərrikləri və hidravlik intiqal laboratoriyası isə Texnoloji maşın və avadanlıqlar kafedrasına təqdim olunub.
Yeni laboratoriyalar şirkətin AMİU-ya daha öncə bağışladığı üç laboratoriyaya əlavə olaraq universitetin texniki infrastrukturunun genişləndirilməsinə xidmət edir.
Laboratoriyaların təqdim olunması tədbirində çıxış edən BP-nin Xəzər regionu üzrə vitse-prezidenti Bəxtiyar Aslanbəyli deyib: "İxtisaslaşdırılmış tədris obyektlərinin, infrastrukturun və avadanlıqların mövcudluğu tədris prosesinin müasirləşdirilməsində əsas rol oynayır. Bu, ölkə üçün yeni nəsil memar və inşaat mühəndislərinin yetişdirilməsinə zəmin yaratmaqla, qabaqcıl beynəlxalq təcrübələrdən, rəqəmsal vasitələrdən və müasir texnologiyalardan istifadə edərək yeni tədris və təlim metodlarının tətbiqinə imkan verir. Çox məmnunuq ki, Memarlıq və İnşaat Universitetinin texniki imkanlarının artırılmasını dəstəkləmək, ümumilikdə isə Azərbaycanda yüksəkkeyfiyyətli təhsilin və elmi tədqiqatların inkişafına töhfə vermək imkanımız var".
Layihənin ümumi dəyəri 170245 manatdır. Qeyd edək ki, fəaliyyətə başladığı vaxtdan indiyədək BP özü və əməliyyatçısı olduğu birgə layihələrdəki tərəfdaşları adından ölkəmizdəki sosial sərmayə proqramlarına ümumilikdə 111 milyon dollardan çox vəsait xərcləyib.
Flora SADIQLI,
"Azərbaycan"
jpg_1749076194.jpg)
