II Azərbaycan Beynəlxalq İnvestisiya Forumunun əhəmiyyətini yalnız xarici investorların Bakıda toplaşması ilə məhdudlaşdırmaq olmaz. Forum Azərbaycanın uzunmüddətli iqtisadi strategiyasının – kapitalın cəlbi, qeyri-neft sektorunun şaxələndirilməsi, texnoloji modernləşmə və ölkənin regional iqtisadi mərkəzə çevrilməsi siyasətinin praktik platformasıdır.
Milli Məclisin deputatı Aydın Hüseynov qəzetimizə açıqlamasında deyib ki, Prezident İlham Əliyevin Forum çərçivəsində səsləndirdiyi göstəricilər Azərbaycanın investor qarşısına artıq formalaşmış makroiqtisadi baza ilə çıxdığını göstərir: "Son 20 ildə ölkə iqtisadiyyatına 350 milyard ABŞ dollarından çox investisiya cəlb olunub və bunun təxminən yarısını birbaşa xarici investisiyalar təşkil edib. Dövlət borcunun ÜDM-ə nisbətinin təxminən 20 faiz, xarici borcun isə 5,6 faiz səviyyəsində olması, valyuta ehtiyatlarının xarici borcu dəfələrlə üstələməsi investor üçün fiskal dayanıqlılıq və maliyyə sabitliyi göstəricisidir".
Forumun digər mühüm tərəfinin Azərbaycanın coğrafi mövqeyinin iqtisadi kapitala çevrilməsi olduğunu deyən A.Hüseynov əlavə edib ki, 2026-cı ildə ölkə ərazisindən tranzit yükdaşımalarının 16 milyon tona çatması, 2030-cu ilədək isə Şərq-Qərb və Şimal-Cənub istiqamətlərində bu göstəricinin 25 milyon tona və daha yuxarı səviyyəyə yüksəldilməsi hədəflənir. Bununla Azərbaycan yalnız enerji ixracatçısı deyil, Avropa ilə Asiya arasında istehsal, logistika və kapital axınlarını birləşdirən iqtisadi qovşaq kimi mövqeyini gücləndirir. "Əsas məqam ondan ibarətdir ki, Forum siyasi bəyanatlarla məhdudlaşmadı. “Abşeron” qaz-kondensat yatağının tammiqyaslı işlənməsi üzrə Yekun İnvestisiya Qərarı, SOCAR–ExxonMobil hasilatın pay bölgüsü sazişi, “Oracle” ilə texnoloji əməkdaşlıq, “UFlex Group”, “Carlsberg Group” və Ələt Azad İqtisadi Zonası üzrə investisiya sənədlərinin mübadiləsi kapitalın enerji ilə yanaşı sənaye, rəqəmsal texnologiyalar və qeyri-neft istehsalına istiqamətləndirildiyini göstərir", - deyə o bildirib.
Deputat diqqətə çatdırıb ki, forumun iqtisadi fəlsəfəsini “Minkənd” KSES və “Tekstil Klasteri” layihələri də konkret şəkildə nümayiş etdirir. 3,2 MVt gücündə “Minkənd” stansiyasının illik 11,8 milyon kilovat-saat elektrik enerjisi istehsal etməsi nəzərdə tutulur. Dövlət-özəl tərəfdaşlığı əsasında həyata keçirilən beş KSES-in ümumi dəyəri 53,2 milyon manat, ümumi gücü 12,9 MVt, illik istehsal potensialı isə 44,1 milyon kilovat-saatdır. Bu, işğaldan azad edilmiş ərazilərdə yaşıl enerji potensialının iqtisadi dövriyyəyə daxil edilməsinin praktik nümunəsidir. Mingəçevir Sənaye Parkındakı “Tekstil Klasteri” isə digər strateji istiqaməti – xammaldan son məhsuladək dəyər zəncirinin ölkə daxilində qurulmasını göstərir. Layihədə pambıqdan başlayaraq mahlıc, iplik, boyalı parça və hazır geyim istehsalı nəzərdə tutulur. İllik istehsal gücü 16 min ton mahlıc, 11 min ton iplik, 7,3 min ton boyalı parça və 11 milyon köynək həcmində planlaşdırılır.
A.Hüseynov vurğulayıb ki, forumun Azərbaycan üçün strateji əhəmiyyəti xarici kapitalı sadəcə ölkəyə gətirmək deyil, onu istehsala, texnologiyaya, ixraca, enerji təhlükəsizliyinə və regional məşğulluğa çevirməkdən ibarətdir: “Dövlət siyasətinin yeni mərhələsində əsas göstərici investisiyanın həcmi ilə yanaşı, onun yaratdığı əlavə dəyər, texnologiya transferi, məhsuldarlıq və qeyri-neft ixracıdır. II Azərbaycan Beynəlxalq İnvestisiya Forumu məhz bu modelin beynəlxalq təqdimatı və konkret layihələrə çevrilməsi baxımından strateji iqtisadi platforma kimi çıxış edir”.
Əsmər QARDAŞXANOVA,
“Azərbaycan”
677jpg_1790033437.jpg)
