Bu günlərdə Moskvada Beynəlxalq Rus dili günü və Puşkinin anadan olmasının 215 illiyinə həsr olunmuş məktəblilər arasında XIII Beynəlxalq rus dili olimpiadası keçirilmişdir.
BSU-nun mətbuat xidmətindən AzərTAc-a bildirmişlər ki, olimpiada Rusiya Federasiyası Təhsil və Elm Nazirliyi, Rossotrudniçestvo Federal Agentliyi, Rus Dili və Ədəbiyyat Müəllimlərinin Beynəlxalq Assosiasiyası və “Russkiy mir” fondunun dəstəyi ilə A.S.Puşkin adına Rus Dili İnstitutu tərəfindən təşkil olunmuşdur.
İntellektual olimpiadada Azərbaycan da daxil olmaqla, dünyanın 29 ölkəsindən (Avstriya, Bolqarıstan, İsrail, Serbiya, Niderland, Çernoqoriya, Finlandiya və s.) 205 məktəbli və müəllim iştirak etmişdir. Ölkəmizi həmin olimpiadada BSU-nun Məktəb-Lisey Kompleksinin rus dili müəllimi Rauf Ayzatullinin rəhbərliyi ilə bu təhsil müəssisəsinin X sinif şagirdləri Rauf Babayev, İrana Zeynalova, Hüseyn Abbasov, Vladlena Danoy, VII sinif şagirdi Zlat Danoy, həmçinin 160 nömrəli Klassik Gimnaziyanın X sinif şagirdi Maya Novruzova təmsil etmişdir.
Kompleksin təmayülünə uyğun olaraq slavyan dilləri, o cümlədən rus dili və ədəbiyyatı üzrə keçirilən beynəlxalq tədbirlərdə və bilik yarışlarında iştiraka xüsusi önəm verən rəhbərlik tərəfindən üç ay ərzində şagirdlərin beynəlxalq olimpiadaya hazırlaşması üçün xüsusi tədbirlər planı tərtib edilmişdir.
Gərgin və maraqlı keçən bu intellektual yarışmanın sonunda Beynəlxalq olimpiadanın 10 nəfər mütləq qalibinin siyahısı açıqlanmışdır. Sevindirici haldır ki, BSU-nun Məktəb-Lisey Kompleksinin X sinif şagirdi Hüseyn Abbasov da qalib adını qazanmışdır. Fəxri diplomla təltif olunan H.Abbasova Rusiya Federasiyası büdcəsi hesabına Rusiyanın aparıcı ali məktəblərində təhsil almaq hüququ da verilmişdir.
Kompleksin digər şagirdləri də bütün müsabiqə və imtahanlarda fəallıq göstərərək diplom və sertifikatlara layiq görülmüşlər. Rauf Babayev, İrana Zeynalova, Maya Novruzova birinci yeri, Zlata Danoy və Vladlena Danoy isə üçüncü yeri tutmuşlar.
jpg_1765410473.jpg)
jpg_1765188547.jpg)
