Minlərlə işçinin əmək müqaviləsinin rəsmiləşdirilərək sosial müdafiə sisteminə daxil edilməsi təmin olunub. Bu günədək 1 milyon 900 mindən artıq işçinin müqaviləsi əmək və məşğulluq alt sistemində rəsmiləşdirilib. Bütün bunlar isə Baş Kollektiv Sazişin sosial ədalətin, layiqli əməyin, rəqabətədavamlı əmək bazarının və sosial rifahın möhkəmləndirilməsində əvəzsiz rol oynadığını bir daha təsdiqləyir.
AZƏRTAC xəbər verir ki, bu sözləri Azərbaycan Həmkarlar İttifaqları Konfederasiyasının (AHİK) VIII Qurultayında konfederasiya sədri Sahib Məmmədov deyib.
O qeyd edib ki, hazırda Azərbaycanda 9 min 342 kollektiv müqavilə və 123 sahə kollektiv sazişi qüvvədədir. Azərbaycan həmkarlar ittifaqları kollektiv müqavilələrin icrasına nəzarəti gücləndirməklə üzvlərin hüquqlarının praktik qorunmasına nail olur. Dövrün tələblərinə uyğun olaraq, sosial tərəfdaşlığın formaları da ildən-ilə təkmilləşdirilir, hər yeni Baş Kollektiv Sazişdə müasir və perspektivli müddəalar öz əksini tapır.
“Əmək və sosial-iqtisadi hüquqların müdafiəsi ilə bağlı 2018-2024-cü illər ərzində ümumilikdə 45,9 min müraciətə baxılıb, onlardan 88,9 faizi müsbət həll edilib, 1000-dən artıq üzvümüz işə bərpa olunub. Bu illər ərzində müəssisə, təşkilat və istehsal sahələrində əməyin mühafizəsi üzrə ümumilikdə 3 minə yaxın monitorinq keçirilib.
Texnoloji avadanlıqların və əmək şəraitinin normativ hüquqi aktların tələblərinə uyğunluğuna dair 2 min 705 müəssisədə monitorinqlər aparılıb. Nəticədə 7 min 516 iş yeri sanitariya-gigiyena normalarına uyğunlaşdırılıb. Müdaxilələrimiz nəticəsində əlverişsiz əmək şəraitinə görə 28 min 280 halda işçilərə güzəşt tətbiq olunub, 169 min 435 nəfər norma tələblərinə uyğun fərdi mühafizə vasitələri ilə təmin edilib. Bununla yanaşı, bu il əməyin mühafizəsinə dair sağlamlıq mərkəzlərimizdə, Konfederasiyanın Əmək və Sosial Münasibətlər Akademiyasında, eləcə də Şuşa, Xocavənd, Kəlbəcər, Xankəndi, Quba, Şəki, İmişli və digər şəhər və rayonlarda maarifləndirici tədbirlər təşkil olunub. Təkcə son bir ildə keçirilən 34 təlim və tədbirlərdə 2 min 238 nəfər iştirak edib. Ölkəmizdə əməyin mühafizəsinə dair 88 milli standart qəbul olunub. Bu standartlar hazırlanarkən konfederasiyamız öz təkliflərini verib və qəbul olunmasında yaxından iştirak edib”, - deyə AHİK sədri vurğulayıb.
jpeg_1765884927.jpeg)
jpeg_1765884704.jpeg)
