Ailə, Qadın və Uşaq Problemləri üzrə Dövlət Komitəsinin sədri Bahar Muradova dekabrın 10-da Türkmənistanda keçirilən “Müasir cəmiyyətdə qadınların rolu: dayanıqlı inkişaf naminə beynəlxalq əməkdaşlığın inkişafı” adlı beynəlxalq konfransda çıxış edib.
Dövlət Komitəsindən AZƏRTAC-a bildirilib ki, Azərbaycan nümayəndə heyəti adından çıxış edən Bahar Muradova konfransın daha təhlükəsiz və dayanıqlı dünyanın qurulması naminə səylərin birləşdirilməsi üçün mühüm imkan yaratdığını qeyd edib. O, Azərbaycanın qadın və uşaq rifahına əsaslanan dövlət siyasətinin mərkəzində insanın layiqli həyat hüququ, sosial ədalət, humanizm və davamlı inkişaf prinsiplərinin dayandığını bildirib. Çıxışda Prezident İlham Əliyevin müəyyənləşdirdiyi sosial dövlət modeli, Birinci vitse-prezident Mehriban Əliyevanın təhsil, səhiyyə, uşaq müdafiəsi, mədəni irs və gender bərabərliyi üzrə həyata keçirdiyi layihələr, Heydər Əliyev Fondunun humanitar fəaliyyəti xüsusi vurğulanıb.
B.Muradova Böyük Zəfərdən sonra aparılan quruculuq və reinteqrasiya prosesləri barədə danışaraq təhlükəsiz yaşayış hüququnun bərpasının, qadınların iqtisadi fəallığının və uşaqların rifahının qorunmasının önəmini qeyd edib. Qayıdan ailələrin qarşısında duran çağırışların infrastrukturla yanaşı psixososial dəstək, məşğulluq və icma institutlarının bərpasını da əhatə etdiyini bildirib. O, qadınların reinteqrasiyada strateji rol oynadığını vurğulayaraq yeni icma liderliyi modelləri, ailə və uşaq dəstək mərkəzlərinin genişləndirilməsi, rəqəmsal sosial xidmətlər, qadın məşğulluğu və sahibkarlığı üzrə proqramların həyata keçirildiyini diqqətə çatdırıb.
Beynəlxalq tərəfdaşlığın vacibliyini qeyd edən komitə sədri Türk dövlətlərinin Qarabağ və Şərqi Zəngəzurda layihələr yerinə yetirdiyini, o cümlədən Türkmənistanın Füzuli rayonunda məscid inşa etdiyini bildirib. O, Türk dövlətləri ilə tarixi köklərə və humanist dəyərlərə əsaslanan əməkdaşlığın güc mənbəyi olduğunu vurğulayıb. Bu ilin yayında Türkmənistanın yüksəksəviyyəli nümayəndə heyətinin Azərbaycana səfərini və keçirilmiş görüşləri əməkdaşlığın möhkəmləndirilməsi baxımından mühüm addım kimi dəyərləndirib.
B.Muradova çıxışının sonunda konfrans müzakirələrinin sülh, inkişaf və təhlükəsizlik yolunda birliyi daha da gücləndirəcəyinə əminliyini ifadə edib.
Konfrans qadınların cəmiyyətdəki rolunun möhkəmləndirilməsi, onların iqtisadi-siyasi və sosial sahələrdə iştirakının artırılması, o cümlədən bu istiqamətdə beynəlxalq əməkdaşlığın genişləndirilməsi istiqamətində mövzuların müzakirəsi ilə davam edib.
jpg_1789906793.jpg)
