Azərbaycanda iqtisadi inkişaf modeli ümumi iqtisadiyyatın tələbləri və regional çağırışlara uyğun olaraq formalaşır və dəyişir. Növbəti 5-10 il ərzindəki iqtisadi model daha çox diversifikasiya olunmuş iqtisadiyyata malik olan bir model olacaq.
Bu fikirləri AZƏRTAC-a açıqlamasında Milli Məclisin deputatı, iqtisadçı-ekspert Vüqar Bayramov bildirib.
“Bütövlükdə müstəqillik illərində Azərbaycan iqtisadiyyatının inkişaf modelinə, eyni zamanda, iqtisadiyyatın keçdiyi yola diqqət yetirsək 1992-ci ildə iqtisadiyyatda ciddi tənəzzül müşahidə olunur. Daha sonra 1993-cü ildə Ümummilli Liderin hakimiyyətə gəlməsi iqtisadi tənəzzülün qarşısının alınmasına və növbəti dövrdə stabilliyin yaranmasına imkan yaratdı. Prezident İlham Əliyevin rəhbərliyi ilə biz xüsusən də iqtisadi modeldə yeni mərhələnin başlanmasını müşahidə etdik. Nəzərə almaq lazımdır ki, infrastrukturun formalaşması həyata keçirilib, yalnız paytaxtda deyil, regionlarda da iqtisadi inkişaf üçün infrastruktur yenilənib. Eyni zamanda, ekosistemin çağırışlarına uyğun olaraq biz həmin infrastrukturun dəyərə çevrilməsi prosesini müşahidə etdik. Növbəti mərhələ artıq yeni bir mərhələdir - yeni dövrün yeni hədəflərinə uyğun olaraq müəyyənləşdirilmiş istiqamətlərdir. Burada həm iqtisadiyyatın diversifikasiyası ilə bağlı islahatların daha da dərinləşməsi, eyni zamanda, iqtisadi inkişaf modelində dayanıqlığın və inklüzivliyin daha da gücləndirilməsi öz əksini tapır”, - deyə o bildirib.
V.Bayramov vurğulayıb ki, 2026-cı ildə Azərbaycanın fiskal gəlirlərində qeyri-neft sektorunun payı 57 faizə qədər yüksələcək: “Bu, praktik olaraq Azərbaycanın neft gəlirlərinin daxil olduğu dövrdə ən yüksək və ən yaxşı nəticə olaraq qiymətləndirilib. Həmçinin növbəti illərdə qeyri-neft sektorunun büdcə gəlirlərində payının artacağından xəbər verir. Bundan əlavə, ÜDM-də qeyri-neft sektorunun payı 70 faizə qədər yüksələcək. Bu isə təbii ki, iqtisadiyyatın daha çox qeyri-neft sektoru üzərində qurulacağından xəbər verir. Ona görə də, növbəti 5-10 il ərzindəki iqtisadi model daha çox diversifikasiya olunmuş iqtisadiyyata malik olan bir model olacaq. Bu, qeyri-neft sektorunun həm fiskal gəlirlərdə, həm ÜDM-də, həm də ümumi ixracatda payının daha da artması mənasına gəlir. Bu, eyni zamanda, ondan xəbər verir ki, mövcud iqtisadi siyasət növbəti illərdə iqtisadi inkişafın daha da dayanıqlığını təmin edəcək və gücləndirəcək. Həmçinin inklüziv inkişafla bağlı hədəflər qorunub, saxlanacaq. Burada xüsusilə hazırda yaranan dəyərin bir hissəsinin gələcək nəsillərə saxlanılması kimi hədəflər var. Bunlar dövlət aktivlərinin istifadəsində və digər istiqamətlərdə birbaşa tətbiq olunur.
Bu baxımdan 5-10 il sonrakı iqtisadiyyat birmənalı şəkildə dayanıqlı inklüziv və daha çox qeyri-neft sektorunun drayverə çevrildiyi bir iqtisadi model olacaq. Burada məqsəd əsasən də növbəti illərdə neftdən asılılığın minimumlaşdırılması, iqtisadiyyatın neftdən kənar sektor hesabına daha çox inkişaf etdirilməsindən ibarətdir”.
jpg_1767211798.jpg)
