Vətən sevgisi yalnız bir coğrafi sahəyə bağlılıq deyil, bir millətin mənəvi kimliyini qorumaq və gələcək nəsillərə ötürmək istəyidir. Hər bir insanın vətənə olan sevgisi onun həyatı boyunca şəxsiyyətini formalaşdıran ən vacib amillərdən biridir. Millətin birlik və bərabərliyinin təməli bu sevgi ilə qoyulur.
Vətənpərvərlik gündəlik həyatın hər anında insanın milli-mənəvi dəyərlərinə sadiq qalmasında, cəmiyyətə xidmət etməsində və kökənlərinə bağlı qalmasında özünü göstərir. Vətənə olan sevgi həm də mənsub olduğun xalqın tarixinə, mədəniyyətinə, zəngin adət-ənənələrinə, dilinə ehtiram, təəssübkeşlikdir.
Azərbaycan xalqı tarixinin müxtəlif dövrlərində vətən sevgisi ilə sınağa çəkilib. Əsrarəngiz təbiətli, təbii sərvətlərlə zəngin olan məmləkətimiz zaman-zaman yadellilərin hücumlarına məruz qalıb. Xalqımız yurdunu yağılardan qorumaq üçün çox çətin sınaqlardan keçməli olub, cəsurluğunu, qəhrəmanlığını belə ağır məqamlarda nümayiş etdirib. İgid övladları heç vaxt düşmənin qarşısında boyun əyməyib, ondan aman diləməyib. Hər zaman qalib gələ bilməsələr də, doğma vətən torpaqlarımız işğala məruz qalsa da, mübarizə əzmini itirməyiblər.
Bu xalqa ruhundan gələn mərhəməti, xeyirxahlığı, humanistliyi bəzən bəlalar gətirib. Yurdunda sığınacaq, süfrəsində yer verdikləri yaxşılıqlarının əvəzini yamanlıqla "ödəyiblər". Çar Rusiyasının öz yerini möhkəmlətmək üçün Cənubi Qafqaza köçürdüyü ermənilər də Azərbaycanda yalnız rəhm, xeyirxalıq görmüşlər. Azərbaycan xalqı onlara yurdunda yaşamağa yer vermişdi. Məkrli ermənilər əvvəlcə özlərini yazıq, aciz göstərirdilər. Amma yerlərini möhkəmlətdikcə torpaq iddiasına düşmüşlər. Və havadarları sayəsində məqsədlərinə çatmışlar. Azərbaycan torpaqlarında tarixdə heç zaman mövcud olmamış Ermənistan dövləti qurmuşlar. Lakin bununla da kifayətlənməmişlər. Hər dəfə tarixin üzü dönəndə, iğtişaşlar, tətillər, üsyanlar, inqilablar baş verəndə işğalçı ermənilər fürsətdən istifadə etmək üçün hərəkətə keçmişlər. Eynilə XX əsrin sonlarında olduğu kimi...
O zaman da mürəkkəb, ziddiyyətli ictimai-siyasi hadisələr baş verməkdə idi. Sovet Sosialist Respublikaları İttifaqı (SSRİ) adlı nəhəng imperiyanın çöküşü Azərbaycan xalqının müstəqillik arzusunu daha da gücləndirmişdi. 1980-ci illərin axırlarına doğru sovet hakimiyyəti zəiflədikcə Azərbaycanda müstəqillik hərəkatı genişləndi. 70 illik sovet rejimi respublikamızın iqtisadi və sosial strukturunu dəyişdirmişdi. Uzun illər kütləvi həbslər həyata keçirməklə, ən ağır cəzalarla azərbaycanlıların gözünün odunu almağa çalışmışdılar. Amma Azərbaycan xalqının vətənpərvər ruhunu məhv etməyə gücləri yetməmişdi. 1990-cı ilin yanvarında baş verən faciə də bir daha göstərdi ki, heç bir qüvvə bu xalqı müstəqillik yolundan döndərə bilməz. Can verməkdə olan sovet hökumətinin rəhbərləri o zaman yenidən milli münaqişəyə rəvac verdi.
Qarabağdan ermənilərin azərbaycanlılara hücum etmələri barədə xəbərlər gəlməyə başladı. Erməni quldurları getdikcə münaqişə ocağını daha da körüklədilər və müharibə alovu Qarabağı, Şərqi Zəngəzuru bürüdü.
Birinci Qarabağ müharibəsində Azərbaycan xalqı tarixinin ən böyük faciələrini yaşadı. Təcavüzkar ermənilər Qarabağda və Şərqi Zəngəzurda azərbaycanlıların evlərinə od vurdular, yurdlarını yerlə bir etdilər. Minlərlə soydaşımız şəhid oldu, şikəst edildi, əsir götürüldü. Bir milyondan çox azərbaycanlı amansızlıqla yurdundan qovuldu. 1990-cı illərdə Ermənistanın işğalçı siyasəti nəticəsində Azərbaycan torpaqlarının 20 faizi işğal olundu. Həmin ərazilərimiz - Qarabağ və Şərqi Zəngəzur torpaqları 30 ilə yaxın Ermənistanın işğalı altında qaldı. Bu həm xalqımız, həm də dövlətimiz üçün olduqca ağır bir imtahan idi.
Bir sıra dövlətlər və beynəlxalq təşkilatlar Azərbaycanın haqq səsini "eşitmir", üzləşdiyi faciələri "görmürdülər". Məqsədləri işğal müddətini uzatmaq, Azərbaycan dövlətini və xalqını bu ədalətsizliklə barışdırmaq idi. Ancaq qarşılarında öz vətənini canından çox sevən Azərbaycan xalqı, ölkəsinin suverenliyini bərpa etmək üçün böyük qətiyyət göstərən Azərbaycan dövləti vardı. Azərbaycan xalqı Silahlı Qüvvələrinin Ali Baş Komandanının, Prezident İlham Əliyevin əmrini gözləyirdi.
2020-ci ilin payızında Ermənistan silahlı qüvvələrinin növbəti təxribatı nəticəsində baş verən İkinci Qarabağ müharibəsi Azərbaycanın yalnız hərbi gücünün, qüdrətinin nümayişi olmadı. Həm də xalqımızın vətən sevgisinin sönməz olduğunu bütün dünyaya göstərdi. İgid Azərbaycan oğulları ağır döyüşlərdə şücaət göstərərək Qarabağ və Şərqi Zəngəzur torpaqlarını düşməndən azad etdilər. İşğalçı Ermənistanın əsgər və zabitləri qəhrəman Azərbaycan Ordusunun qarşısında aciz qaldılar, çoxu silahını ataraq döyüş meydanından qaçdı.
2023-cü ilin sentyabrında aparılan antiterror əməliyyatı Azərbaycan Ordusunun qələbə əzmini, peşəkarlığını bir daha göstərdi. Ordumuzun qalibiyyəti ölkəmizin suverenliyinin tam bərpası ilə nəticələndi. Vətənin hər qarışı, hər guşəsi düşməndən təmizləndi. Bütün Azərbaycan xalqının qüruru olan üçrəngli, ay-ulduzlu bayrağımız bütün ərazilərimizdə dalğalandı.
Azərbaycan xalqı indi uzun illər həsrətində olduğu günlərə qovuşub. Keçmiş məcburi köçkünlər "Böyük qayıdış" proqramı çərçivəsində həyata keçirilmiş işlər nəticəsində yenidən salınmış yurdlarına qayıdırlar. Bu qayıdış Azərbaycan xalqının birliyinin, yurda bağlılığının, vətənə olan sonsuz sevgisinin təcəssümüdür,
Zöhrə FƏRƏCOVA,
"Azərbaycan"
