Azərbaycanda fəaliyyət göstərən tanınmış xarici neft şirkətləri yerli kadrların bacarığını yüksək qiymətləndirirlər
1990-cı illərin sonunda Azərbaycanın xarici şirkətlərlə birgə işlənən neft-qaz layihələrində çalışanlar sırasında xeyli əcnəbi vətəndaş var idi. O vaxt hələ SOCAR-ın (Azərbaycan Respublikası Dövlət Neft Şirkəti) birinci vitse-prezidenti vəzifəsində çalışan İlham Əliyev böyük uzaqgörənliklə demişdi ki, vaxt gələcək, bu layihələrdə çalışanların 90 faizi öz vətəndaşlarımız və yalnız 10 faizi xaricilər olacaq.
O zaman bu fikrə inamsızlıqla yanaşanlar az deyildi. Hətta müxalifət mətbuatı deyilənin mümkün olmayacağını yazırdı. Lakin illər keçdikcə dövlətimizin başçısının bu proqnozu da özünü doğrultdu. İndi neft, qaz və ixrac layihələrimiz çərçivəsində çalışanların əksəriyyəti Azərbaycan vətəndaşıdır.
Təkcə BP şirkətində işləyənlərin sayını göstərən rəqəmlərə diqqət yetirmək kifayətdir. BP-nin keçən ilin yekunlarına aid hesabatında bildirilir ki, ilin sonunda şirkətin işçiləri olan Azərbaycan vətəndaşlarının sayı 2344 nəfər təşkil edib. Buraya müddətli müqavilə əsasında işləyənlər də daxildir.
Qeyd edək ki, 2018-ci ilin ortalarından BP-nin ixtisaslı işçilərinin 90 faizi milli kadrlardan ibarətdir. İxtisası olmayan işçilərin isə hamısı yerli vətəndaşlardır.
Şirkətin rəhbər heyətində də Azərbaycan vətəndaşları yüksək vəzifələr tuturlar. Məsələn, Bəxtiyar Aslanbəyli xeyli müddətdir BP-nin Xəzər bölgəsində Xarici əlaqələr və kommunikasiya üzrə vitse-prezidentidir. Və belə misallar çoxdur.
Elə bu yaxınlarda şirkətdən aldığımız bir məlumatı da diqqətə çatdıraq. Bu il aprelin 1-dən BP-nin Azərbaycan, Gürcüstan və Türkiyə regionu üçün maliyyə məsələləri üzrə vitse-prezidenti vəzifəsində Nadir İmanov çalışacaq. Nadir İmanov hazırda şirkətin Yaxın Şərq və Şimali Afrikada maliyyə üzrə vitse-prezidentidir. Yeni vəzifəsində isə BP-nin Azərbaycan, Gürcüstan və Türkiyə regionu üzrə maliyyə məsələlərinin idarə edilməsinə cavabdeh olacaq. O, BP-nin London ofisindəki hasilat və əməliyyatlar sahəsində maliyyə məsələləri üzrə baş vitse-prezidentinin rəhbərliyi altında çalışacaq.
Nadir İmanov bu vəzifədə Azərbaycan, Gürcüstan və Türkiyə regionunda maliyyə məsələləri üzrə hazırkı vitse-prezident Kolin Allanı əvəz edəcək. Kolin isə aprelin 1-dən Birləşmiş Krallığa qayıdacaq.
Bu vəzifədə N.İmanov BP-nin Azərbaycanda yerli vətəndaş olan yeddinci vitse-prezidenti kimi regional rəhbər heyətin üzvü olacaq. Onun 30 ildən artıq planlaşdırma və kommersiya sahəsində təcrübəsi var və əsasən də BP əməkdaşı kimi Azərbaycan, Türkiyə, Misir və Omanda çalışmaqla həmin ölkələrdə böyük komandalara və iri biznes sahələrinə rəhbərlik edib.
Bu gün Xəzərin qoynunda dünyaşöhrətli xarici neft şirkətləri ilə birlikdə yaradılan konsorsiumların həyata keçirdiyi qlobal layihələrdə çalışan soydaşlarımız səriştəsini daim artıran, qabaqcıl təcrübələri əxz edən yüksəksəviyyəli mütəxəssisdirlər. Xəzərin Azərbaycan bölməsindəki "Azəri-Çıraq-Günəşli" və "Şahdəniz" yataqlarında belələri onlarcadır. İndi bu yataqlardakı platformaların hamısına azərbaycanlı mütəxəssislər rəhbərlik edir. Siyahı bir qədər uzun olsa da, ürəyimizdən onların hər birini təqdim etmək keçir. Çünki bu, qürurludur. Beləliklə, "Çıraq" platformasına növbə ilə Vüqar Məmmədov və İlqar Qulubəyov, "Qərbi Çıraq"a Ruslan Dövlətov və Amal İbadzadə, "Şərqi Azəri"yə Fərman Ağaquliyev və Namiq Əliyev rəhbərlik edirlər. "Mərkəzi Azəri"də rəhbər Cavid İsgəndərli, "Qərbi Azəri"də Emin İbrahimov, "Dərinsulu Günəşli"də Emin Abdullazadədir. "Azəri Mərkəzi Şərqi" platformasına rəhbərlikdə isə Rəşad İsgəndərov və Bəhmən Quliyev növbələşirlər. "Şahdəniz Alfa" platformasına Fuad İsmayılov, "Şahdəniz Bravo" platformasına isə Cəlal Xalıqov rəhbərlik edirlər.
Şirkətdə çalışan, o cümlədən rəhbər vəzifə tutan xaricilər həmişə bir həqiqəti vurğulayırlar ki, Azərbaycanın neft mütəxəssislərinin bilik və bacarığına söz ola bilməz. Cari ayın əvvəlində BP-nin Azərbaycan, Gürcüstan və Türkiyə üzrə regional prezidenti Cio Kristofolinin jurnalistlər üçün keçirdiyi brifinqdə söylədikləri bunu bir daha təsdiqləyir. O dedi ki, bu vəzifədə çalışdığı vaxtdan əvvəl də keçmiş işləri ilə əlaqədar Bakıya gələndə istər BP-də çalışan, istərsə də ümumiyyətlə, ünsiyyətdə olduğu digər azərbaycanlı mütəxəssislərin yüksək qabiliyyətinə və səriştəsinə yaxşı mənada təəccüb edib . Onlarla birlikdə işləməyi arzulayıb.
Onu da əlavə edək ki, BP bu gün də yüksəksəviyyəli kadrlar yetişdirmək üzrə təlim və inkişaf proqramları həyata keçirir. Şirkət bundan sonra da həmin istiqamətdə səylərini davam etdirmək qərarındadır.
Flora SADIQLI,
"Azərbaycan"
jpeg_1777984769.jpeg)
